Swivuriso 18:1-24
18 Loyi a tihambanisaka ni van’wana u tilavela swa yena ntsena;+ u ta hambana ni vutlhari hinkwabyo lebyi pfunaka.+
2 Un’wana ni un’wana la nga xihunguki a nga ku tsakeli ku twisisa,+ handle ka loko mbilu yakwe yo tifunungula.+
3 Loko lowo homboloka a fika, ku fanele ku fika ni ku hlekula;+ niloko tingana+ ti fika, ku ni ndzhukano.
4 Marito ya nomu wa munhu i mati yo enta.+ Xihlovo xa vutlhari i xinambyana lexi khaphakhapaka.+
5 Ku kombisa ku ya hi nghohe eka lowo homboloka a hi kunene,+ hambi ku ri ku bakanya la lulameke ehubyeni.+
6 Milomu ya lowo hunguka yi nghenela timholovo,+ ni nomu wakwe wu vitana minkhavi.+
7 Nomu wa xihunguki hi wona wu xi lovisaka,+ ni milomu ya xona i mintlhamu ya moya-xiviri wa xona.+
8 Marito ya mulumbeti ma fana ni swilo leswi faneleke swi mitiwa hi makolo,+ leswi rhelelaka swi ya endzeni-ndzeni ka khwiri.+
9 Nakambe, loyi a lolohaka entirhweni wakwe+—i makwavo wa loyi a onhaka.+
10 Vito ra Yehovha i xihondzo xo tiya.+ Lowo lulama u tsutsumela eka xona naswona u kuma nsirhelelo.+
11 Swilo swa nkoka swa la fuweke i muti wakwe lowu tiyeke,+ naswona swi fana ni rirhangu leri sirhelelaka loko a anakanya.+
12 Mbilu ya munhu ya titlakusa loko a nga si wa,+ naswona emahlweni ka ku vangama ku ni ku titsongahata.+
13 Loko munhu a angula malunghana ni mhaka yo karhi kambe a nga si yi twa,+ sweswo i vuphukuphuku eka yena ni ku tsongahatiwa.+
14 Moya wa munhu wu nga tiyisela vuvabyi byakwe;+ kambe loko ku ri moya lowu biweke, i mani la nga wu tiyiselelaka?+
15 Mbilu ya la twisisaka yi kuma vutivi,+ ni ndleve ya lavo tlhariha yi lava ku kuma vutivi.+
16 Nyiko ya munhu yi ta n’wi pfulela ndlela leyikulu,+ yi ta n’wi rhangela ni le vanhwini vo tala.+
17 Lowo sungula enandzwini wakwe u lulamile;+ munhu-kulobye wa fika kutani a n’wi lavisisa hakunene.+
18 Vuhlolotwana byi herisa timholovo,+ naswona byi hambanisa ni lava matimba.+
19 Makwavo la dyoheriwaka u tlula muti lowu tiyeke;+ naswona ku ni timholovo leti fanaka ni xigogo xa xihondzo xo tshama eka xona.+
20 Khwiri ra munhu ri ta xurhisiwa hi mihandzu leyi humaka enon’wini wa munhu;+ u ta xurhisiwa ni hi leswi swi humaka emilon’wini yakwe.+
21 Rifu ni vutomi swi le matimbeni ya ririmi,+ naswona swi ta dya mihandzu ya loyi a swi rhandzaka.+
22 Xana u kona la kumeke nsati lonene?+ Munhu yoloye u kume nchumu lowunene,+ naswona munhu yoloye u kume vunene lebyi humaka eka Yehovha.+
23 Loyi a pfumalaka wa kombela,+ kambe loyi a fuweke u hlamula hi ndlela ya matimba.+
24 Ku ni vanakulobye lava tshamaka va lunghekele ku tshovelelana,+ kambe ku ni munghana la namarhelaka ku tlula makwavo.+
