Swivuriso 28:1-28
28 Lavo homboloka va baleka ku nga ri na loyi a va hlongorisaka,+ kambe lavo lulama va fana ni xinghalana lexi titshembaka.+
2 Ti tele tihosana leti tlhandlamanaka hikwalaho ka ku tluriwa ka nawu wa tiko,+ kambe hosana yi ta tshama nkarhi wo leha hikwalaho ka munhu la twisisaka, la tivaka leswi lulameke.+
3 Munhu la tiyeke emirini, la pfumalaka naswona a dyelelaka+ swisiwana u fana ni mpfula leyi khukhulaka ku sala ku nga ha ri na swakudya.
4 Lava va tshikaka nawu va dzunisa lowo homboloka,+ kambe lava va hlayisaka nawu va lwa na wona.+
5 Vanhu lava tinyiketeleke ku endla vubihi a va nge ku twisisi ku avanyisa, kambe lava va lavaka Yehovha va nga swi twisisa hinkwaswo.+
6 Wa antswa la pfumalaka kambe a fambaka hi vutshembeki ematshan’weni ya loyi a hombolokeke etindleleni takwe, hambiloko a fuwile.+
7 N’wana la twisisaka u hlayisa nawu,+ kambe loyi a nga ni vunakulobye ni vanhu va makolo, u tsongahata tata wakwe.+
8 Loyi a andzisaka swilo swakwe swa nkoka hi ntswalo+ ni ku bindzurisa u swi hlengeletela loyi a kombisaka swisiwana tintswalo.+
9 Loyi a kendlusaka ndleve yakwe leswaku yi nga yingisi nawu+—hambi ku ri xikhongelo xakwe i nchumu wo nyenyetsa.+
10 Loyi a hambukisaka+ lavo lulama va nghena endleleni yo biha u ta wela emugodini wakwe,+ kambe lava pfumalaka xihoxo va ta dya ndzhaka ya leswinene.+
11 Munhu la fuweke u tlharihile ematihlweni yakwe,+ kambe la nga xisiwana, la xiyaka wa n’wi kambela.+
12 Loko lavo lulama va khana,+ ku ni ku saseka ko tala; kambe loko lavo homboloka va yima, munhu wa titumbeta.+
13 Loyi a fihlaka ku tlula nawu kakwe a nge humeleli,+ kambe loyi a tiphofulaka kutani a tshika, u ta kombiwa tintswalo.+
14 Wa tsaka munhu la chavaka nkarhi hinkwawo,+ kambe loyi a nonon’hwisaka mbilu yakwe u ta wela ekhombyeni.+
15 Mufumi wo homboloka la fumaka swisiwana u fana ni nghala leyi bongaka ni bere leyi hlaselaka.+
16 Murhangeri la pfumalaka ku twisisa ka ntiyiso u ni vukanganyisi byo tala,+ kambe loyi a vengaka mpindzulo+ lowu nga lulamangiki u ta lehisa masiku yakwe.
17 Munhu la tikiwaka hi nandzu wa ngati wa moya-xiviri, u ta balekela emugodini.+ Va nga n’wi khomi.
18 Loyi a fambaka hi ku pfumala xihoxo u ta ponisiwa,+ kambe loyi a hombolokeke etindleleni takwe u ta wa xikan’we-kan’we.+
19 Loyi a rimaka misava yakwe u ta kuma xinkwa lexi eneleke,+ naswona loyi a lavaka swilo leswi nga pfuniki nchumu u ta kuma vusiwana lebyikulu.+
20 Munhu wa swiendlo swo tshembeka u ta kuma mikateko yo tala,+ kambe loyi a hatliselaka ku kuma rifuwo a nge tshami a nga ri na nandzu.+
21 Xihlawu-hlawu a hi xinene,+ nileswaku munhu la tiyeke emirini a tlula nawu hikwalaho ka xipandzwa xa xinkwa ntsena.
22 Munhu wa tihlo leri xondzolotaka u tiyimisela ku kuma swilo swa nkoka,+ kambe a nga swi tivi leswaku u ta pfumala.
23 Loyi a tshinyaka munhu+ u ta kuma tintswalo to tala endzhaku ka swona ku tlula loyi a tikurisaka hi ririmi rakwe.
24 Loyi a kanganyisaka tata wakwe ni mana+ wakwe naswona a ku: “A hi ku tlula nawu,”+ u tirhisana ni munhu la tisaka ndzoviso.
25 Loyi a titlakusaka hi moya-xiviri u pfuxa mholovo,+ kambe loyi a tshembaka Yehovha u ta endliwa leswaku a nona.+
26 Loyi a tshembaka mbilu yakwe i xihunguki,+ kambe loyi a fambaka hi vutlhari u ta pona.+
27 Loyi a nyikaka munhu la pfumalaka a nge kayiveli nchumu,+ kambe loyi a fihlaka mahlo yakwe u ta rhukaniwa ngopfu.+
28 Loko lavo homboloka va yima, munhu wa tumbela;+ kambe loko va lova, lavo lulama va tala.+
