Swivuriso 30:1-33
30 Marito ya Aguri n’wana wa Yake, rungula ra ntikelo.+ Rito ra munhu la tiyeke emirini leri yaka eka Itiyele, eka Itiyele na Ukala.
2 Hikuva mina a ndzi anakanyi ku tlula van’wana,+ naswona ndzi hava ku twisisa loku vanhu va nga na kona;+
3 a ndzi byi dyondzanga vutlhari;+ ni vutivi bya Lowo Kwetsima Ngopfu a ndzi byi tivi.+
4 I mani la tlhandlukeleke etilweni leswaku a ta rhelela?+ I mani la hlengeleteke mheho+ emavokweni hamambirhi? I mani la tsondzeleke mati enkhancwini?+ I mani la endleke leswaku makumu hinkwawo ya misava ma tlakuka?+ I mani vito rakwe ni vito+ ra n’wana wakwe, loko u swi tiva?+
5 Rito rin’wana ni rin’wana ra Xikwembu ri tengile.+ I xitlhangu eka lava va tumbelaka eka xona.+
6 U nga engeteli nchumu emaritweni ya xona,+ leswaku xi nga ku tshinyi, leswaku u nga kumiwi u ri muhembi.+
7 Ndzi kombele swilo swimbirhi eka wena.+ U nga ndzi tsoni ndzi nga si fa.+
8 Leswi nga riki ntiyiso ni rito ro hemba swi veke ekule na mina.+ U nga ndzi nyiki vusiwana kumbe rifuwo.+ Ndzi tshike ndzi dya swakudya leswi ndzi averiweke swona,+
9 leswaku ndzi nga xurhi kutani ndzi ku landzula+ ndzi ku: “Yehovha i mani?”+ nileswaku ndzi nga vi xisiwana kutani ndzi yiva, ndzi thyakisa vito ra Xikwembu+ xanga.
10 U nga tshuki u onha vito ra nandza eka n’wini wa rona,+ leswaku ri nga ku rhukani, nileswaku u nga voniwi nandzu.+
11 Ku ni xitukulwana lexi rhukanaka tata wa xona naswona xi nga n’wi katekisiki hambi ku ri mana wa xona.+
12 Ku ni xitukulwana lexi tengeke ematihlweni+ ya xona kambe lexi nga hlantswiwangiki ethyakeni ra xona.+
13 Ku ni xitukulwana lexi mahlo ya xona ma titlakuseke swinene, ni mahlo ya xona lama vangamaka ma nga le henhla.+
14 Ku ni xitukulwana lexi meno ya xona ku nga mabanga ni tinhlaya ta xona ku nga mikwana yo dlaya ha yona,+ lexi nga ta xanisa lava xanisekaka emisaveni ni swisiwana evanhwini.+
15 Swigalana swi ni vana vambirhi vaxisati lava huwelelaka va ku: “Nyika! Nyika!” Ku ni swilo swinharhu leswi nga enerisekiki, mune wa swona leswi nga vulangiki swi ku: “Swi ringene!”
16 I Sheol+ ni mbeleko lowu sivekeke,+ tiko leri nga enerisiwangiki hi mati,+ ni ndzilo+ lowu nga vulangiki wu ku: “Swi ringene!”+
17 Tihlo leri hlekulaka tatana naswona ri swi langutelaka ehansi ku yingisa manana+—mawukuwuku ya le nkoveni ma ta ri xokola kutani vana va gama va ta ri dya.
18 Ku ni swilo swinharhu leswi nga vonaka swi hlamarisa swinene eka mina, ni mune wa swona leswi ndzi nga swi tivangiki:
19 ndlela ya gama ematilweni, ndlela ya nyoka eribyeni, ndlela ya xikepe exikarhi ka lwandle+ ni ndlela ya munhu la tiyeke emirini la nga ni nhwanyana.+
20 Hi leyi ndlela ya wansati wa vuoswi: u dyile, a sula nomu wakwe kutani a ku: “A ndzi endlanga nchumu lexi hoxeke.”+
21 Misava yi tsekatsekisiwe hi swilo swinharhu, naswona a yi swi koti ku yima hikwalaho ka swilo swa mune:
22 hikwalaho ka hlonga loko ri fuma,+ ni hikwalaho ka xihunguki loko xi ri ni swakudya leswi eneleke;+
23 hikwalaho ka wansati la vengiwaka loko a tekiwa a va nsati,+ ni hikwalaho ka nandza wa xisati loko a hlongola n’wini wakwe wa xisati.+
24 Ku ni swilo swa mune leswi nga switsongo ngopfu emisaveni, kambe hi ntumbuluko swi tlharihile:+
25 vusokoti ku nga rixaka leri nga riki na matimba,+ kambe byi lunghiselela swakudya+ swa byona hi ximumu;
26 timbila+ i rixaka leri nga riki na matimba, kambe yindlu ya tona ti yi veka ehenhla ka ribye;+
27 tinjiya+ a ti na hosi, kambe hinkwato ti famba hi mintlawa-ntlawa ya tona;+
28 xipululu+ xi khoma hi mavoko ya xona kambe xi tshama exigodlweni lexikulu xa hosi.
29 Ku na swinharhu leswi tsutsumaka kahle, ni swa mune leswi fambaka kahle:
30 nghala, yona yi ni matimba exikarhi ka swiharhi naswona a yi tlhentlhi emahlweni ka un’wana ni un’wana;+
31 mbyana leyi hlotaka kumbe xiphongo, ni hosi ya masocha ya varikwavo.+
32 Loko u endle hi ndlela ya vuhunguki hi ku titlakusa,+ naswona loko u dzikise miehleketo ya wena eka yona, veka voko enon’wini.+
33 Hikuva ku hakasa ntswamba swi humesa phehlwa, ku kama nhompfu swi humesa ngati ni ku hlohlotela ku hlundzuka swi pfuxa ku holova.+
