Swivuriso 8:1-36
8 Xana vutlhari a byi hambeti byi huwelela,+ ni ku twisisa a ku hambeti ku humesa rito?+
2 Byi yime ehenhla eku tlakukeni,+ endleleni, emahandzeni ya tindlela.
3 Byi hambeta byi huwelela ngopfu etlhelo ka tinyangwa, enon’wini wa muti,+ ni le vunghenweni bya tinyangwa byi ku:+
4 “Ndzi vitana N’wina vavanuna, naswona rito ra mina ri ta eka vana va vanhu.+
5 Oho n’wina lava nga riki na ntokoto, twisisani vutlhari;+ na n’wina swihunguki, twisisani mbilu.+
6 Yingisani, hikuva i swilo swa nkoka leswi ndzi swi vulavulaka,+ naswona ndzi pfula milomu ya mina hi vululami.+
7 Hikuva malaka ya mina ma hlevetela ntiyiso ntsena;+ naswona vuhomboloki i nchumu lowu nyenyetsaka emilon’wini ya mina.+
8 Marito hinkwawo ya nomu wa mina i ya ku lulama.+ Eka wona a ku na nchumu lexi gombonyokeke kumbe lexi hombolokeke.+
9 Hinkwawo ka wona ma kongomile eka munhu la twisisaka, naswona ma lulamile eka munhu la kumaka vutivi.+
10 Tekani ndzayo ya mina, hayi silivhere, ni vutivi ematshan’weni ya nsuku lowu hlawulekeke.+
11 Hikuva vutlhari bya antswa ku tlula tikorala,+ naswona swilo hinkwaswo leswi tsakisaka a swi nge endliwi swi ringana na byona.+
12 “Mina vutlhari, ndzi tshame swin’we ni vukheta+ naswona ndzi kuma vutivi bya vuswikoti byo ehleketa.+
13 Ku chava Yehovha swi vula ku venga swo biha.+ Ndzi swi vengile ku titlakusa, ku tinyungubyisa,+ ndlela yo biha ni nomu+ lowu vulaka leswi humeke endleleni.
14 Ndzi ni xitsundzuxo+ ni vutlhari lebyi pfunaka.+ Mina—ku twisisa;+ ndzi ni matimba.+
15 Ha mina tihosi ti hambeta ti fuma, ni tindhuna leti tlakukeke ti hambeta ti lerisa ku lulama.+
16 Ha mina tihosana ti va tihosana,+ naswona vanhu va xiyimo xa le henhla hinkwavo va avanyisa hi ku lulama.+
17 Lava va ndzi rhandzaka, na mina ndza va rhandza,+ naswona lava va ndzi lavaka va ndzi kuma.+
18 Rifuwo ni ku vangama swi le ka mina,+ xuma lexi nga ndzhaka ni ku lulama.+
19 Mihandzu ya mina ya antswa ku tlula nsuku, ku tlula ni nsuku lowu tengisiweke, ntshovelo wa mina wu tlula silivhere yo hlawuleka.+
20 Ndzi famba+ hi ndlela ya ku lulama, exikarhi ka tindlela ta vuavanyisi,+
21 ku endla lava va ndzi rhandzaka va kuma swilo;+ naswona switlati swa vona ndzi tshama ndzi swi tatile.+
22 “Yehovha u ndzi humesile ndzi ri masungulo ya ndlela yakwe,+ masungulo ya mintirho yakwe ya khale swinene.+
23 Ndzi vekiwe ku sukela enkarhini lowu nga riki na makumu,+ ku sukela eku sunguleni, eminkarhini yo sungula misava yi nga si va kona.+
24 Ndzi tisiwe onge hiloko ndzi tisiwa hi switlhavi swa ku veleka,+ swidziva swa mati swi nga si va kona, swihlovo leswi khulukaka mati yo tala swi nga si va kona.
25 Ndzi tisiwe onge hiloko ndzi tisiwa hi switlhavi swa ku veleka, tintshava ti nga si simekiwa,+ switsunga swi nga si va kona,
26 a nga si endla misava+ ni tindhawu leti pfulekeke ta masungulo ya ntshuri wa misava ya tiko leri noneke.+
27 A ndzi ri kona loko a lunghiselela matilo;+ loko a lerisa leswaku ku va ni xirhendzevutana ehenhla ka xidziva xa mati,+
28 loko a tiyisa mapapa ehenhla,+ loko a endla leswaku minseledyana ya xidziva xa mati yi tiya,+
29 loko a lerisa lwandle leswaku mati ya rona ma nga hundzi xileriso xakwe,+ loko a simeka masungulo ya misava,+
30 hi nkarhi wolowo a ndzi ri etlhelo ka yena ndzi ri mutirhi la nga ni vuswikoti,+ a ndzi ri munhu loyi a n’wi rhandzaka hilaha ku hlawulekeke+ siku ni siku, mina ndzi tsakile emahlweni ka yena nkarhi hinkwawo,+
31 ndzi tsakile hikwalaho ka tiko leri noneke ra misava yakwe,+ naswona swilo leswi a ndzi swi rhandza a swi ri ni vana va vanhu.+
32 “Kutani N’wina vana, ndzi yingiseni; ina, va tsaka lava va hlayisaka tindlela ta mina.+
33 Yingisani ndzayo kutani mi tlhariha,+ mi nga honisi nchumu.+
34 Wa tsaka munhu loyi a ndzi yingisaka hi ku tshama a xalamukile etinyangweni ta mina siku ni siku, hi ku langutela a ri etinsikeni ta vungheno bya mina.+
35 Hikuva loyi a ndzi kumaka kunene u ta kuma vutomi,+ kutani a kuma vunene lebyi humaka eka Yehovha.+
36 Kambe loyi a ndzi hupaka u vangela moya-xiviri wakwe madzolonga;+ hinkwavo lava ndzi vengaka swinene hi lava va rhandzaka rifu.”+
