Yoxuwa 1:1-18
1 Endzhaku ka ku fa ka Muxe nandza wa Yehovha, Yehovha a byela Yoxuwa+ n’wana wa Nuni, mutirheli+ wa Muxe a ku:
2 “Muxe nandza wa mina u file;+ sweswi suka u yima, u pela Yordani, wena ni vanhu lava hinkwavo, u nghena etikweni leri ndzi va nyikaka rona, vana va Israyele.+
3 Ndhawu yin’wana ni yin’wana leyi nkondzo wa nenge wa n’wina wu nga ta kandziya eka yona, kunene ndzi ta mi nyika yona, hilaha ndzi tshembiseke Muxe hakona.+
4 Ndhawu ya n’wina yi ta sukela emananga na kona laha Lebanoni ku ya fika enambyeni lowukulu, enambyeni wa Yufrata, hileswaku tiko hinkwaro ra Vaheti,+ ku ya eLwandle Lerikulu etlhelo ra laha dyambu ri pelaka kona.+
5 A nga kona la nga ta yima a tiya emahlweni ka wena emasikwini hinkwawo ya ku hanya ka wena.+ Hilaha a ndzi ri na Muxe hakona, ndzi ta va na wena.+ A ndzi nge ku tshiki kumbe ku ku siya hilaha ku heleleke.+
6 Vana ni xivindzi, u tiya,+ hikuva hi wena la nga ta endla leswaku vanhu lava va dya ndzhaka+ ya tiko leri ndzi ri hlambanyeleke vatata wa vona ku va nyika rona.+
7 “Ntsena vana ni xivindzi, u tiya ngopfu leswaku u khathalela ku endla hi ku landza nawu hinkwawo lowu Muxe nandza wa mina a ku leriseke wona.+ U nga hambuki eka wona u ya exineneni kumbe eximatsini,+ leswaku u endla hi vutlhari kun’wana ni kun’wana laha u yaka kona.+
8 Buku leyi ya nawu yi nga suki enon’wini wa wena,+ naswona u fanele u yi hlaya hi rito ra le hansi nhlikanhi ni vusiku, leswaku u ta hisekela ku endla hi ku landza hinkwaswo leswi tsariweke eka yona;+ hi kona u nga ta endla ndlela ya wena yi humelela kutani u endla hi vutlhari.+
9 Xana a ndzi ku lerisanga?+ Vana ni xivindzi, u tiya. U nga rhurhumeli kumbe u chava,+ hikuva Yehovha Xikwembu xa wena u na wena kun’wana ni kun’wana laha u yaka kona.”+
10 Kutani Yoxuwa a sungula ku lerisa tindhuna ta vanhu, a ku:
11 “Tsemakanyani exikarhi ka nxaxa kutani mi lerisa vanhu, mi ku, ‘Tilunghiseleleni swakudya, hikuva emasikwini manharhu ku sukela sweswi, mi ta pela Yordani lowu, leswaku mi nghena ni ku teka tiko leri Yehovha Xikwembu xa n’wina xi mi nyikaka rona leswaku ri va ra n’wina.’”+
12 Kutani Yoxuwa a byela va ka Ruveni ni va ka Gadi ni hafu ya nyimba ya Manase, a ku:
13 “Tsundzukani rito leri Muxe nandza wa Yehovha a mi leriseke rona,+ a ku, ‘Yehovha Xikwembu xa n’wina xi mi nyika ku wisa naswona xi mi nyike tiko leri.
14 Vasati va n’wina, vana va n’wina ni swifuwo swa n’wina swi ta tshama etikweni leri Muxe a mi nyikeke rona etlhelweni leri ra Yordani;+ kambe n’wina mi ta hundza mi lunghekele nyimpi+ emahlweni ka vamakwenu, mi fanele mi pfuna vavanuna hinkwavo va vurhena lava nga ni matimba.+
15 Eku sunguleni loko Yehovha a wisisa vamakwenu ku fana na n’wina naswona va tshame etikweni leri Yehovha Xikwembu xa n’wina a va nyikaka rona,+ na n’wina mi fanele mi vuyela etikweni ra ndzhaka ya n’wina mi tshama eka rona,+ leri Muxe nandza wa Yehovha a mi nyikeke rona etlhelweni ra Yordani ku ya etlhelo ra vuhuma-dyambu.’”+
16 Hikwalaho va hlamula Yoxuwa, va ku: “Hinkwaswo leswi u hi leriseke swona hi ta swi endla, naswona kun’wana ni kun’wana laha u nga ta hi rhuma kona hi ta ya.+
17 Hilaha hi yingiseke Muxe eka hinkwaswo, na wena hi ta ku yingisa hilaha ku fanaka. Onge Yehovha Xikwembu xa wena a nga va na wena+ hilaha a veke na Muxe hakona.+
18 Munhu un’wana ni un’wana la xandzukaka a nga yingisi xileriso xa wena+ naswona a nga ma yingisi marito ya wena eka hinkwaswo leswi u nga ha n’wi lerisaka swona, u ta dlayiwa.+ Ntsena vana ni xivindzi, u tiya.”+
