Yoxuwa 5:1-15
5 Kuteloko tihosi hinkwato ta Vaamori,+ leti a ti ri etlhelo ra Yordani evupela-dyambu, ni tihosi hinkwato ta Vakanana,+ leti a ti ri ekusuhi ni lwandle, ti twa leswaku Yehovha u omise mati ya Yordani emahlweni ka vana va Israyele ku fikela loko va perile, timbilu ta tona ti sungula ku n’oka,+ kutani ti heleriwa hi nkhinkhi hikwalaho ka vana va Israyele.+
2 Hi nkarhi wolowo Yehovha a byela Yoxuwa a ku: “Endla mikwana hi maribye yo tiya, u yimbisa+ vana va Israyele, ra vumbirhi.”
3 Hiloko Yoxuwa a endla mikwana hi maribye yo tiya kutani a yimbisa vana va Israyele eGibeyati-haraloti.+
4 Xivangelo lexi endleke Yoxuwa a va yimbisa hi lexi: vanhu hinkwavo lava humeke aEgipta, vaxinuna, vanhu hinkwavo va nyimpi, va fele+ emananga endleleni loko va huma aEgipta.
5 Hikuva vanhu hinkwavo lava humeke a va yimbisiwile, kambe vanhu hinkwavo lava velekeriweke emananga endleleni loko va huma aEgipta a va nga yimbisiwanga.
6 Hikuva vana va Israyele va fambe malembe ya 40+ emananga, ku fikela loko tiko hinkwaro ra vanhu va nyimpi lava humeke aEgipta leri nga ri yingisangiki rito ra Yehovha ri hela, leri Yehovha a ri hlambanyeleke leswaku a ri nge pfuki ri vone tiko+ leri Yehovha a ri hlambanyeleke vatata wa rona ku hi nyika rona,+ tiko leri khulukaka ntswamba ni vulombe.+
7 Kutani a veka vana va vona ematshan’weni ya vona.+ Yoxuwa a va yimbisa, hikwalaho ka leswi a va nga yimbanga, hikuva a va va yimbisanga endleleni.
8 Kuteloko va hete ku yimbisa tiko hinkwaro, va tshama endhawini ya vona enxaxeni ku fikela loko va hola.+
9 Kutani Yehovha a byela Yoxuwa a ku: “Namuntlha ndzi suse ndzhukano wa Egipta eka n’wina.”+ Hiloko ndhawu yoleyo yi thyiwa vito ra Giligala+ ku fikela esikwini leri.
10 Vana va Israyele va dzima mixaxa eGiligala, kutani va endla paseka hi siku ra vu-14 ra n’hweti,+ nimadyambu, etimbaleni ta le kwandzasini ra Yeriko.
11 Kutani hi siku leri landzeleke ra paseka, va dya swin’wana leswi va swi tshoveleke etikweni, swinkwa leswo-ke-comela+ ni mavele lama katingiweke, hi siku leri.
12 Hiloko manna yi hela esikwini leri landzeleke loko va dye swin’wana leswi va swi tshoveleke etikweni, manna a ya ha tlhelanga yi va kona eka vana va Israyele,+ kutani va sungula ku dya swin’wana leswi va swi tshoveleke etikweni ra Kanana elembeni rero.+
13 Kuteloko Yoxuwa a ri eYeriko, a tlakusa mahlo a languta, lahaya a ku ri ni munhu+ la yimeke emahlweni ka yena a tamele banga.+ Hiloko Yoxuwa a ya eka yena, a ku: “Xana u yima na hina kumbe u yima ni swirha swa hina?”
14 Yena a ku: “E-e, kambe mina—ndzi tile+ ndzi ri hosana ya vuthu ra Yehovha.” Kutani Yoxuwa a wa, xikandza xakwe xi langute emisaveni, a tiwisela+ eka yena a ku: “Xana hosi ya mina yi ri yini eka nandza wa yona?”
15 Hiloko hosana ya vuthu ra Yehovha yi ku eka Yoxuwa: “Susa maphaxani emilengeni ya wena, hikuva ndhawu leyi u yimeke eka yona ya kwetsima.” Xikan’we-kan’we Yoxuwa a endla tano.+
