Yoxuwa 6:1-27
6 Kutani Yeriko a wu pfariwile wu tiya hikwalaho ka vana va Israyele, ku nga ri na munhu la humaka, naswona ku nga ri na munhu la nghenaka.+
2 Yehovha a ya emahlweni a byela Yoxuwa a ku: “Waswivo, ndzi nyikete Yeriko ni hosi ya wona ni vavanuna va matimba lava nga ni vurhena, ndzi va nyikete evokweni ra wena.+
3 N’wina vavanuna hinkwenu va nyimpi mi fanele mi gwirima mi rhendzela muti, mi rhendzela muti kan’we. Mi fanele mi endla tano ku ringana masiku ya tsevu.
4 Vaprista va nkombo va fanele va tamela tinanga ta makhuna ta nkombo, emahlweni ka Areka, kutani hi siku ra vunkombo mi fanele mi gwirima mi rhendzela muti ka nkombo, naswona vaprista va fanele va yimba tinanga.+
5 Kutani loko va pfumisa nanga ya khuna, loko mi twa mpfumawulo wa nanga, vanhu hinkwavo va fanele va ba hungwe ra nyimpi;+ kutani rirhangu ra muti ri fanele ri wa ri ku mpfuta,+ vanhu va fanele va tlhandluka, un’wana ni un’wana a wu kongoma.”
6 Hiloko Yoxuwa n’wana wa Nuni a vitana vaprista+ a ku eka vona: “Tekani areka ya ntwanano,+ naswona vaprista va nkombo va fanele va tamela tinanga ta makhuna emahlweni ka areka+ ya Yehovha.”
7 Kutani a ya emahlweni a byela vanhu a ku: “Hundzani mi gwirima mi rhendzela muti, naswona vandla leri hlomeleke nyimpi+ ri fanele ri hundza emahlweni ka areka ya Yehovha.”
8 Kutani swi endleka hilaha Yoxuwa a byeleke vanhu hakona; vaprista va nkombo lava a va tamele tinanga ta makhuna ta nkombo va hundza emahlweni ka Yehovha, va yimba tinanga, naswona areka ya ntwanano wa Yehovha a yi va landzela.
9 Vandla leri hlomeleke nyimpi a ri famba emahlweni ka vaprista ri yimba tinanga, kasi murindzi+ wa le ndzhaku a a landzela Areka a ri karhi a ya emahlweni a yimba tinanga.
10 Sweswi Yoxuwa a a lerise vanhu,+ a ku: “Mi nga tshuki mi huwelela kumbe mi twarisa marito ya n’wina, naswona ku nga tshuki ku huma rito enon’wini wa n’wina ku fikela siku ndzi vulaka ndzi ku, ‘Huwelelani!’ Kutani mi fanele mi huwelela.”+
11 Kutani a lerisa leswaku areka ya Yehovha yi rhendzeleka ni muti, yi rhendzeleka kan’we, endzhaku ka sweswo va ya enxaxeni kutani va etlela enxaxeni.
12 Kutani Yoxuwa a pfuka nimpundzu swinene,+ vaprista va rhwala areka+ ya Yehovha,
13 vaprista va nkombo lava va tameleke tinanga ta makhuna emahlweni ka areka ya Yehovha a va ri karhi va famba, va ya emahlweni va yimba tinanga, vandla leri hlomeleke nyimpi a ri famba emahlweni ka vona, kasi murindzi wa le ndzhaku a a landzela areka ya Yehovha a ri karhi a ya emahlweni a yimba tinanga.+
14 Hiloko va gwirima va rhendzela muti kan’we hi siku ra vumbirhi, endzhaku ka sweswo va vuyela enxaxeni. Va endlise sweswo masiku ya tsevu.+
15 Kutani hi siku ra vunkombo va pfuka nimpundzu swinene, hi ku hatlisa loko vurhonga byi tsuvukile, ivi va gwirima va rhendzela muti hi ndlela leyi ka nkombo. Hi siku rero ntsena, va gwirime va rhendzela muti ka nkombo.+
16 Hi ra vunkombo vaprista va yimba tinanga, kutani Yoxuwa a byela vanhu a ku: “Huwelelani;+ hikuva Yehovha u mi nyike muti.+
17 Naswona muti wu fanele wu va nchumu lowu nyikeriweke endzovisweni;+ wona ni swilo leswi nga eka wona i swa Yehovha. I Rahava+ lowa nghwavava ntsena la nga hambetaka a hanya, yena ni hinkwavo lava va nga na yena endlwini, hikuva u fihle varhumiwa lava a va rhumiwile.+
18 Loko ku ri n’wina, mi nga tshineli eka nchumu lowu nyikeriweke endzovisweni,+ hi ku chava leswaku mi nga wu navela+ kutani mi teka nchumu lowu nyikeriweke endzovisweni,+ mi endla nxaxa wa Israyele wu va nchumu lowu nyikeriweke endzovisweni, mi tisa khombo ehenhla ka wona.+
19 Kambe silivhere hinkwayo, nsuku ni swilo swa koporo ni nsimbi, i swilo swo kwetsima eka Yehovha.+ Swi fanele swi nghena exumeni xa Yehovha.”+
20 Hiloko vanhu va huwelela, loko va ri karhi va yimba tinanga.+ Kuteloko vanhu va twa mpfumawulo wa nanga, kutani vanhu va ba hungwe ra nyimpi, hiloko rirhangu ri sungula ku wa ri ku mpfuta!+ Endzhaku ka sweswo vanhu va tlhandlukela emutini, un’wana ni un’wana a wu kongoma, va teka muti.
21 Kutani va lovisa hinkwaswo leswi a swi ri emutini, ku sukela eka wanuna ku ya eka wansati, ku sukela eka jaha ku ya eka mukhalabye, ni nkunzi ni nyimpfu ni mbhongolo, va swi lovisa hi banga.+
22 Yoxuwa a byela vavanuna vambirhi lava kambeleke tiko a ku: “Yanani endlwini ya wansati lowa nghwavava, mi n’wi humesa, yena ni hinkwavo lava nga va yena, hilaha mi n’wi hlambanyeleke hakona.”+
23 Hiloko majaha lama kambeleke ma nghena kutani ma humesa Rahava ni tata wakwe ni mana wakwe ni vamakwavo ni hinkwavo lava nga va yena, ina, va humese maxaka yakwe hinkwawo;+ va va rhelerisa va va tshamisa enxaxeni wa Israyele.
24 Kutani va hisa muti hi ndzilo ni hinkwaswo leswi a swi ri eka wona.+ I silivhere ntsena ni nsuku ni swilo swa koporo ni nsimbi leswi va swi ngheniseke exumeni xa yindlu ya Yehovha.+
25 Kutani Rahava lowa nghwavava ni vandyangu wa tata wakwe ni hinkwavo lava nga va yena, Yoxuwa a va londzovota va hanya;+ naswona u tshame exikarhi ka Israyele ku fikela esikwini leri,+ hikuva u fihle varhumiwa lava Yoxuwa a va rhumeke leswaku va ya kambela Yeriko.+
26 Kutani Yoxuwa a tivisa xihlambanyo enkarhini wolowo, lexi a xi ku: “A a rhukaniwe emahlweni ka Yehovha munhu la nga ta yima a aka muti lowu, ku nga Yeriko. A a lahlekeriwe hi mativula yakwe loko a veka masungulo ya wona, a a lahlekeriwe hi rikotse rakwe loko a yimisa tinyangwa ta wona.”+
27 Hi ndlela yoleyo Yehovha a va na Yoxuwa,+ kutani ndhuma yakwe yi twala emisaveni hinkwayo.+
