Yoxuwa 8:1-35
8 Kutani Yehovha a byela Yoxuwa a ku: “U nga chavi kumbe u tshuka.+ Teka vavanuna hinkwavo va nyimpi u tlhandluka u ya eAyi. Waswivo, hosi ya Ayi ni vanhu va yona ni muti wa yona ni tiko ra yona,+ ndzi swi nyikete evokweni ra wena.
2 U fanele u endla eka Ayi ni le ka hosi ya wona ku fana nileswi u swi endleke eYeriko ni le ka hosi ya wona.+ N’wina mi nga tiphangela rifuwo ra wona ni swifuwo swa wona ntsena.+ Tumbelelani muti hi le ndzhaku ka wona.”+
3 Hiloko Yoxuwa ni vanhu hinkwavo va nyimpi+ va tlhandluka va ya eAyi, Yoxuwa a hlawula vavanuna va 30 000, vavanuna va vurhena lava nga ni matimba,+ a va rhuma nivusiku.
4 Kutani a va lerisa, a ku: “Maswivo, mi ta tumbelela+ muti hi le ndzhaku. Mi nga yi ekule ngopfu ni muti, hinkwenu ka n’wina mi fanele mi lungheka.
5 Loko ku ri mina ni vanhu hinkwavo lava ndzi nga na vona, hi ta tshinela ekusuhi ni muti. Kutaku loko va huma ku ta hlangana na hina ku fana ni le ku sunguleni,+ hi fanele hi va baleka.
6 Va fanele va huma va hi sala endzhaku ku fikela loko hi va humesile emutini, hikuva va ta ku, ‘Va hi baleka ku fana ni le ku sunguleni.’+ Hi fanele hi va baleka.
7 Kutani n’wina—mi ta pfuka laha mi tumbeleleke kona, mi teka muti; kutani Yehovha Xikwembu xa n’wina xi ta wu nyiketa emavokweni ya n’wina.+
8 Hi ku hatlisa loko mi teke muti, mi fanele mi hisa muti.+ Mi ta endla hi ku landza rito ra Yehovha. Maswivo, ndzi mi lerisile.”+
9 Endzhaku ka sweswo Yoxuwa a va rhuma, kutani va gwirima va ya evutumbelweni, va tshama exikarhi ka Bethele na Ayi hi tlhelo ra vupela-dyambu bya Ayi, kasi Yoxuwa u ye emahlweni a tshama kwalaho exikarhi ka vanhu vusiku byebyo.
10 Hiloko Yoxuwa a pfuka ka ha ri mpundzu swinene+ a kambela vanhu ivi va tlhandluka, yena ni vakulukumba va Israyele, va ya emahlweni ka vanhu va Ayi.
11 Vanhu hinkwavo va nyimpi+ lava a va ri na yena va tlhandluka, leswaku va tshinela va fika emahlweni ka muti, kutani va dzima mixaxa en’walungwini wa Ayi, ku ri ni nkova exikarhi ka vona na Ayi.
12 Hi nkarhi wolowo a teka vavanuna va 5 000 a va veka va tumbelela+ exikarhi ka Bethele+ na Ayi, ku ya evupela-dyambu bya muti.
13 Kutani vanhu va dzima nxaxa lowukulu lowu a wu ri en’walungwini wa muti+ ni le ndzhaku ka wona evupela-dyambu bya muti,+ evusikwini byebyo Yoxuwa a ya exikarhi ka rivala ra le hansi.
14 Hi ku hatlisa loko hosi ya Ayi yi swi vona, vavanuna va muti va hatlisa va pfuka ka ha ri mpundzu swinene va huma ku ya hlangana na Israyele enyimpini, yena ni vanhu vakwe hinkwavo, hi nkarhi lowu vekiweke, emahlweni ka timbala ta le kwandzasini. Loko ku ri yona, a yi nga swi tivi leswaku ku ni lava va yi tumbeleleke endzhaku ka muti.+
15 Loko Yoxuwa ni tiko hinkwaro ra Israyele va weriwe hi khombo emahlweni ka vona,+ hiloko va baleka hi ndlela ya le mananga.+
16 Kutani vanhu hinkwavo lava a va ri emutini va vitaniwa leswaku va va hlongorisa, hiloko va hlongorisa Yoxuwa, va huma va va ekule ni muti.+
17 A ku salanga munhu eAyi ni le Bethele la nga humangiki a hlongorisa Israyele, lerova va siya muti wu nga ri na munhu va hlongorisa Israyele.
18 Kutani Yehovha a byela Yoxuwa a ku: “Tshambulutela tlhari leri nga evokweni ra wena ri languta eAyi,+ hikuva ndzi ta wu nyiketa evokweni ra wena.”+ Hiloko Yoxuwa a tshambulutela tlhari leri a ri ri evokweni rakwe ehenhla ka muti.
19 Lava va tumbeleleke va suka hi ku hatlisa endhawini ya vona, kutani va sungula ku tsutsuma hi nkarhi lowu a tshambuluteke voko rakwe ha wona, va nghena emutini va wu teka.+ Va hatlisa va hisa muti hi ndzilo.+
20 Kutani vanhu va le Ayi va hundzuluka, waswivo, musi wa muti a wu tlhandlukela ematilweni, naswona va nga swi koti ku balekela hala kumbe hala. Hiloko vanhu lava a va balekela emananga va hundzulukela lava va va hlongorisaka.
21 Yoxuwa ni tiko hinkwaro ra Israyele va vona leswaku lava a va tumbelerile+ va teke muti, nileswaku musi wa muti wu tlhandlukile, hiloko va hundzuluka va dlaya vanhu va le Ayi.
22 Lava van’wana va huma emutini ku ta hlangana na vona, lerova va va exikarhi ka Israyele, lava va va etlhelo leri lavan’wana va va etlhelo lerin’wana, va va dlayetela kukondza ku nga ha sali la poneke kumbe la balekeke.+
23 Hosi+ ya Ayi va yi khoma ya ha hanya va yi tshineta eka Yoxuwa.
24 Kutani loko Israyele a ha hetisa ku dlayetela vaaki hinkwavo va le Ayi enhoveni, emananga lawa va va hlongoriseleke eka wona, va hambeta va wa, hinkwavo ka vona, va dlayiwa hi banga kukondza va hela. Endzhaku ka sweswo tiko hinkwaro ra Israyele ri tlhelela eAyi ri ya wu hlasela hi banga.
25 Hinkwavo lava feke esikwini rero, ku suka eka wanuna ku ya eka wansati, va endle 12 000, vanhu hinkwavo va le Ayi.
26 Yoxuwa a nga ri tlherisanga voko rakwe leri a tshambuluteke tlhari+ ha rona ku fikela loko a lovise vaaki hinkwavo va le Ayi.+
27 Tiko ra Israyele ri tiphangele swifuwo ni rifuwo ra muti wolowo ntsena, hi ku landza rito ra Yehovha leri a ri leriseke Yoxuwa.+
28 Kutani Yoxuwa a hisa Ayi a wu endla tshuka ra hilaha ku nga heriki,+ wu va rhumbi ku fikela esikwini leri.
29 A hayeka hosi ya Ayi+ emhandzini ku fikela nimadyambu;+ loko dyambu ri ya eku peleni, Yoxuwa a humesa xileriso, kutani va hawula+ ntsumbu wa yona emhandzini, va wu hoxa evunghenweni bya nyangwa ya muti ivi va hlengeleta nhulu leyikulu ya maribye ehenhla ka yona, ku fikela esikwini leri.
30 Hi wona nkarhi lowu Yoxuwa a akeleke Yehovha Xikwembu xa Israyele altari,+ eNtshaveni ya Ebali,+
31 hilaha Muxe nandza wa Yehovha a leriseke vana va Israyele hakona, hi ku landza leswi tsariweke ebukwini ya nawu+ wa Muxe: “Alitari ya maribye lama heleleke, leyi ku nga si tshamaka ku tirhisiwa nsimbi ehenhla ka yona”;+ kutani va humesela Yehovha magandzelo yo hisiwa ehenhla ka yona ni ku endla switlhavelo swa xinakulobye.+
32 Kwalaho a tsala kopi+ ya nawu wa Muxe ehenhla ka maribye, leyi a yi tsaleleke vana va Israyele.+
33 Kutani tiko hinkwaro ra Israyele ni vakulukumba va rona,+ tindhuna ni vaavanyisi a va yimele etlhelo leri ni le tlhelo lerin’wana ra Areka emahlweni ka vaprista,+ ku nga Valevhi, lava a va rhwale areka ya ntwanano wa Yehovha,+ hiloko muluveri ni la tumbulukeke kwalaho,+ hafu ya vona eNtshaveni ya Gerizimu+ ni hafu leyin’wana eNtshaveni ya Ebali,+ (hilaha Muxe nandza wa Yehovha a leriseke hakona,)+ leswaku va sungula hi ku ku katekisa+ vanhu va Israyele.
34 Endzhaku ka leswi a ma hlayela ehenhla marito hinkwawo ya nawu,+ nkateko+ ni ndzhukano,+ hi ku landza hinkwaswo leswi tsariweke ebukwini ya nawu.
35 A ku vanga na rito ni rin’we eka hinkwawo lawa Muxe a ma leriseke lawa Yoxuwa a nga ma hlayelangiki ehenhla emahlweni ka nhlengeletano hinkwayo ya Israyele,+ swin’we ni vavasati+ ni vana+ ni valuveri+ lava a va ri exikarhi ka vona.
