Petro Wa Vumbirhi 1:1-25
1 Hi mina Petro, muapostola+ wa Yesu Kreste, eka vatshami va nkarhinyana lava hangalakeke ePonto, eGalatiya, eKapadokiya,+ eAsiya ni le Bitiniya, eka lava hlawuriweke
2 hi ku tiviwa ka ha ri emahlweni hi Xikwembu Tatana,+ hi ku kwetsimisiwa hi moya,+ leswaku mi ta xi yingisa ni ku n’wan’waseriwa hi ngati ya Yesu Kreste:+
Ndzi khongela leswaku Xikwembu xi va ni musa lowukulu eka n’wina xi tlhela xi mi nyika ku rhula.
3 A ku dzunisiwe Xikwembu tlhelo Tata wa Hosi ya hina Yesu Kreste, hikuva hikwalaho ka tintswalo ta xona letikulu xi endle leswaku hi tlhela hi tswariwa,+ hi va ni ntshembo lowu hanyaka+ hi ku pfuxiwa ka Yesu Kreste eka lava feke,+
4 leswaku hi kuma ndzhaka leyi nga onhakiki kumbe leyi nga nyamisiwangiki kumbe ku vuna.+ Mi vekeriwe yona ematilweni,+
5 n’wina lava hlayisiwaka hi matimba ya Xikwembu hi ripfumelo leswaku mi ta kuma ku ponisiwa loku nga ta paluxiwa enkarhini wo hetelela.
6 Ma tsaka swinene hikwalaho ka sweswo, hambileswi mi nga ha weriwaka hi miringo yo hambanahambana swa nkarhinyana,+
7 leswaku ripfumelo ra n’wina leri ringiweke,+ leri nga ra nkoka swinene ku tlula nsuku lowu lovaka hambiloko wu hundzisiwe* endzilweni, ri endla leswaku mi dzunisiwa ni ku vangamisiwa ni ku xiximiwa hi nkarhi lowu Yesu Kreste a nga ta humelela ha wona.*+
8 Hambileswi mi nga si tshamaka mi n’wi vona, ma n’wi rhandza. Hambileswi mi nga n’wi voniki sweswi, ma pfumela eka yena naswona ma tsaka swinene hi ntsako lowukulu lowu nga hlamuselekiki,
9 mi ri karhi mi fikelela xikongomelo xa ripfumelo ra n’wina, ku nga ku ponisiwa ka n’wina.+
10 Vaprofeta lava profeteke hi ta musa lowukulu lowu mi nga ta kombiwa wona, va vutisisile ni ku lavisisa hi vukheta hi ta ku ponisiwa loku.+
11 Va ye emahlweni va ringeta ku kumisisa leswaku i nkarhi wihi kumbe i nguva yihi leyi moya lowu a wu ri endzeni ka vona a wu yi kombisa mayelana na Kreste,+ loko wu nyikela vumbhoni ka ha ri emahlweni mayelana ni ku xanisiwa ka Kreste+ ni ku vangama kakwe loku a ku ta landzela.
12 Va paluxeriwe leswaku a va nga titirheli kambe a va tirhela n’wina, mayelana ni leswi ma ha ku tivisiwaka swona hi lava twariseke mahungu lamanene eka n’wina hi moya lowo kwetsima lowu rhumeriweke wu suka etilweni.+ Tintsumi ti swi navela swinene ku twisisa swilo leswi.
13 Kutani lunghekelani ntirho;+ hlayisani mianakanyo ya n’wina;+ vekani ntshembo wa n’wina eka musa lowukulu lowu mi nga ta kombiwa wona hi nkarhi lowu Yesu Kreste a nga ta humelela ha wona.*
14 Tanihi vana lava yingisaka, tshikani ku hanya hi ku navela loku a mi ri na kona loko mi nga si tiva nchumu,
15 kambe ku fana ni Mukwetsimi loyi a mi vitaneke, na n’wina kwetsimani emahanyelweni ya n’wina hinkwawo,+
16 hikuva ku tsariwile: “Mi fanele mi kwetsima, hikuva mina ndza kwetsima.”+
17 Loko mi vitana Tatana la avanyisaka a nga yi hi nghohe+ hi ku ya hi ntirho wa un’wana ni un’wana, kombisani xichavo+ loko ma ha ri vatshami va nkarhinyana.
18 Hikuva ma swi tiva leswaku a mi tshunxiwanga*+ hi swilo leswi onhakaka, silivhere kumbe nsuku, eka ndhavuko wa n’wina lowu nga pfuniki nchumu lowu mi wu kumeke eka vakokwa wa n’wina.
19 Kambe a ku ri hi ngati ya risima,+ ngati ya Kreste,+ leyi fanaka ni ya xinyimpfana+ lexi nga solekiki lexi pfumalaka xivati.
20 I ntiyiso leswaku u hlawuriwe khale misava yi nga si va kona,+ kambe u paluxiwe eku heleni ka mikarhi hikwalaho ka n’wina.+
21 Mi pfumela eka Xikwembu hikwalaho ka yena,+ xona lexi n’wi pfuxeke eka lava feke+ xi n’wi nyika ku vangama,+ leswaku mi ta tshemba ni ku va ni ripfumelo eka xona.
22 Leswi sweswi mi tibasiseke hi ku yingisa ntiyiso hi rirhandzu leri nga riki na vukanganyisi,+ kutani rhandzanani hi mbilu hinkwayo.+
23 Hikuva mi tlhele mi tswariwa+ ku nga ri hi mbewu leyi bolaka kambe hi mbewu leyi nga boliki,*+ hi rito ra Xikwembu lexi hanyaka, lexi tshamaka hi masiku.+
24 Phela “vanhu hinkwavo va fana ni byanyi naswona va saseke ku fana ni swiluva swa nhova; byanyi bya vuna ni xiluva xa wa,
25 kambe rito ra Yehovha* ri tshama hi masiku.”+ “Rito” leri i mahungu lamanene lawa mi byeriweke wona.+
Tinhlamuselo ta le hansi
^ Hi Xigriki, “hlavuteriwa.”
^ Kumbe “tengisiwile.”
^ Hi Xigriki, “hlavuteriwa.”
^ Hi Xigriki, “kutsuriwanga.”
^ Ku nga mbewu leyi kotaka ku mila kumbe ku tswala mihandzu.
^ Vona Xiengetelo A5.
