Petro Wa Vumbirhi 3:1-22
3 Hi ndlela leyi fanaka, n’wina vavasati lava tekiweke, titsongahateni eka vanuna va n’wina,+ leswaku loko ku ri ni lava nga yingisiki rito, va ta kokiwa handle ka rito hi mahanyelo ya vasati va vona,+
2 hileswi va nga ta va va vone mahanyelo ya n’wina lamanene+ swin’we ni xichavo xo enta.
3 Mi nga endli ku tibombisa ka n’wina ku va ka le handle, hi ku luka misisi ni ku ambala swin’wetsin’wetsi swa nsuku+ kumbe swiambalo swo durha,
4 kambe a ku ve ka munhu wa le xihundleni wa mbilu, la ambaleke swiambalo leswi nga onhakiki swa moya wo rhula ni wo olova,+ lowu nga wa nkoka swinene emahlweni ka Xikwembu.
5 Hikuva yoleyo i ndlela leyi vavasati vo kwetsima va khale lava a va tshemba Xikwembu a va tisasekisa ha yona, va titsongahata eka vanuna va vona,
6 hilaha Sara a yingiseke Abrahama, a n’wi vitana hosi.+ Se mi vana va yena, ntsena loko mi ya emahlweni mi endla leswinene, mi nga chavi nchumu.+
7 Na n’wina vavanuna lava tekeke, yanani emahlweni mi tshama na vona hi ndlela leyi kombisaka ku twisisa. Mi va xixima+ tanihi leswi va nga xibya xo tsana, va nga vavasati, leswi va nga vadyandzhaka swin’we na n’wina+ va musa lowukulu wa vutomi, leswaku swikhongelo swa n’wina swi nga siveriwi.
8 Xo hetelela, hinkwenu ka n’wina vanani ni mianakanyo leyi fanaka,+ mi twelana vusiwana, mi rhandzana, mi kombana tintswalo+ mi tlhela mi titsongahata.+
9 Mi nga tlheriseli swo biha hi swo biha+ kumbe mi rhukana loyi a mi rhukanaka+ kambe tlheriselani hi ku n’wi katekisa+ hikuva mi vitaneriwe endleleni leyi, leswaku mi ta katekisiwa.
10 Hikuva, “loyi a navelaka ku tiphina hi vutomi ni ku hanya nkarhi wo leha, u fanele a lawula ririmi rakwe ri nga vulavuli swo biha+ ni nomu wakwe leswaku wu nga vi ni vuxisi.
11 A a balekele swo biha+ a endla leswinene;+ a a lave ku rhula a tlhela a ku hlayisa.+
12 Hikuva matihlo ya Yehovha* ma langute lavo lulama ni tindleve takwe ti yingisa xikhongelo xa vona,+ kambe Yehovha* u lwisana ni lava endlaka swo biha.”+
13 Kunene, i mani la nga ta mi vavisa loko mi tikarhatela ku endla leswinene?+
14 Kambe hambiloko mi xaniseka hikwalaho ka leswo lulama, ma tsaka.+ Hambiswiritano, mi nga swi chavi leswi va swi chavaka* kumbe mi karhateka.+
15 Kambe dzunisani Kreste tanihi loyi a kwetsimaka etimbilwini ta n’wina hileswi a nga Hosi, mi tshama mi lunghekele ku tihlamulela eka un’wana ni un’wana loyi a lavaka ku tiva hi ntshembo lowu mi nga na wona, kambe mi swi endla hi moya wo rhula+ ni hi xichavo lexi enteke.+
16 Tshamani mi ri ni ripfalo lerinene,+ leswaku lava mi lumbetaka va ta khomiwa hi tingana+ loko va vona mahanyelo ya n’wina lamanene hileswi mi nga valandzeri va Kreste.+
17 Hikuva swa antswa ku xaniseka hikwalaho ko endla leswinene,+ loko Xikwembu xi swi pfumelela, ku ri ni ku xaniseka hikwalaho ka ku endla swo biha.+
18 Phela Kreste u fe kan’we swi helela kwalaho a fela swidyoho,+ munhu wo lulama a fela lava nga lulamangiki,+ leswaku a mi kongomisa eka Xikwembu.+ U dlayiwe a ri munhu wa nyama,+ kambe u pfuxiwe a ri munhu wa moya.+
19 Naswona loko a ri exiyin’weni lexi xa ku va munhu wa moya u tlhele a ya chumayela tintsumi leti pfaleriweke,+
20 leti nga yingisangiki hi nkarhi wa Nowa+ loko Xikwembu xa ha rindzile hi ku lehisa mbilu, loko ka ha akiwa ngalava,+ leyi vanhu va nga ri vangani, ku nga vanhu va nhungu ntsena va poneke ndhambi eka yona.+
21 Na n’wina ma ponisiwa hi nchumu lowu yelanaka ni lowu, ku nga nkhuvulo, (ku nga ri hi ku susa thyaka emirini kambe hi ku kombela ripfalo lerinene eka Xikwembu),+ hi ku pfuxiwa ka Yesu Kreste eka lava feke.
22 U le vokweni ra xinene ra Xikwembu,+ hikuva u ye etilweni naswona tintsumi ni valawuri ni lava nga ni matimba va vekiwe ehansi ka yena.+
Tinhlamuselo ta le hansi
^ Vona Xiengetelo A5.
^ Vona Xiengetelo A5.
^ Kumbexana “mi nga chavi loko va mi chavisa.”
