Petro Wa Vumbirhi 4:1-19
4 Leswi Kreste a xanisekeke loko a ha ri munhu wa nyama,+ na n’wina hlomani hi mianakanyo leyi fanaka ni ya yena; hikuva munhu loyi a xanisekeke loko a ha ri wa nyama u tshike swidyoho,+
2 leswaku eka nkarhi wakwe lowu n’wi saleleke tanihi munhu wa nyama a nga ha hanyeli ku endla leswi rhandziwaka hi vanhu,+ kambe a hanyela ku endla ku rhandza ka Xikwembu.+
3 Hikuva swi ringene leswi enkarhini lowu hundzeke mi endleke ku rhandza ka vanhu va matiko,+ loko ma ha endla manyala,* mi ri ni ku navela loku nga lawulekiki, mi nwa ku tlula mpimo, mi va ni mikhuvo leyi nga lawulekiki, mi phikizana hi ku nwa ni ku gandzela swifaniso.+
4 Va hlamala hileswi mi nga ha endliki swilo swa manyala ku fana na vona, kutani va vulavula ku biha hi n’wina.+
5 Kambe vanhu lava va ta tihlamulela eka loyi a lunghekeleke ku avanyisa lava hanyaka ni lava feke.+
6 Kahlekahle, hi yona mhaka mahungu lamanene ma chumayeriweke ni le ka lava feke,+ leswaku hambiloko va avanyisiwa hi tlhelo ra nyama hi ku ya hi langutelo ra vanhu, va ta hanya hi ku pfumelelana ni moya hi ku ya hi langutelo ra Xikwembu.
7 Kambe makumu ya swilo hinkwaswo ma tshinele. Hikwalaho, vanani ni miehleketo yo hluteka,+ tshamani mi lunghekele ku khongela.+
8 Ku tlula hinkwaswo, rhandzanani swinene+ hikuva rirhandzu ri funengeta swidyoho swo tala.+
9 Kombisanani malwandla hi mbilu hinkwayo mi nga gunguli.+
10 Hilaha un’wana ni un’wana a amukeleke nyiko, tirhisani nyiko yoleyo ku pfuna van’wana hi leswi mi nga malandza* ya Xikwembu lawa xi ma kombeke musa lowukulu hi tindlela to hambanahambana.+
11 Loko munhu a lava ku vula swo karhi, a a vulavule leswi humaka eka Xikwembu; loko un’wana a tirhela van’wana, a a tirhe a titshege hi matimba lama humaka eka Xikwembu;+ leswaku eka swilo hinkwaswo Xikwembu xi ta dzunisiwa+ ha Yesu Kreste. Ku vangama ni matimba i swa xona hilaha ku nga heriki. Amen.
12 Varhandziwa, mi nga hlamarisiwi hi miringo yo tika leyi mi langutanaka na yona,+ onge hiloko mi humeleriwa hi nchumu lowu nga tolovelekangiki.
13 Kambe yanani emahlweni mi tsaka+ hileswi mi xanisiwaka ku fana na Kreste,+ leswaku mi ta tsaka mi tlhela mi khana hi nkarhi lowu ku vangama kakwe ku nga ta kombisiwa.+
14 Loko mi rhukaniwa hikwalaho ka vito ra Kreste, ma tsaka+ hikuva moya lowu vangamaka, ku nga moya wa Xikwembu wu le henhla ka n’wina.
15 Hambiswiritano, ku nga vi ni loyi a xanisiwaka hi ku va a ri mudlayi kumbe khamba kumbe muendli wa leswo biha kumbe hi leswi a nghenelelaka timhaka ta van’wana.+
16 Kambe loko munhu a xanisiwa hileswi a nga Mukreste, a nga khomiwi hi tingana,+ a a ye emahlweni a dzunisa Xikwembu tanihi Mukreste.
17 Hikuva lowu i nkarhi lowu vekiweke wa leswaku ku rhanga ku avanyisiwa yindlu ya Xikwembu.+ Kutani loko vuavanyisi byi sungula hi hina,+ xana ku ta endleka yini eka lava nga yingisiki mahungu lamanene ya Xikwembu?+
18 “Naswona loko swi tika ku va munhu loyi a lulameke a ponisiwa, xana ku ta endleka yini hi loyi a nga xiximiki Xikwembu ni mudyohi?”+
19 Hikwalaho, lava xanisekaka hileswi va endlaka ku rhandza ka Xikwembu a va ye emahlweni va hanyela Mutumbuluxi wo tshembeka va ri karhi va endla leswinene.+
Tinhlamuselo ta le hansi
^ Kumbe “mahanyelo lama khomisaka tingana.” I vunyingi bya rito ra Xigriki a·sel′gei·a. Vona Tinhlamuselo.
^ Kumbe “valanguteri.”
