Petro Wa Vumbirhi 5:1-14
5 Hikwalaho, ndzi khutaza vakulu lava nga exikarhi ka n’wina tanihi leswi na mina ndzi nga un’wana wa vona, ndzi vone ku xaniseka ka Kreste naswona ndzi ta kuma ku vangama loku nga ta kombisiwa,+ ndzi ri:
2 Risani ntlhambi wa Xikwembu+ lowu mi wu hlayisaka, mi wu langutela, ku nga ri hi ku sindzisiwa kambe hileswi mi rhandzaka ku endla ku rhandza ka Xikwembu;+ ku nga ri hi leswi mi lavaka ku kuma swo karhi+ kambe hi ku tinyiketela;
3 ku nga ri hi ku tikisela lava nga ndzhaka ya Xikwembu,+ kambe mi va swikombiso entlhambini.+
4 Naswona loko murisi lonkulu+ a humelela, mi ta amukela harhi yo vangama leyi nga onhakiki.+
5 Hi ndlela leyi fanaka, n’wina majaha titsongahateni eka vakulukumba.+ Kambe hinkwenu tivekeni ehansi ka van’wana, hikuva Xikwembu xi nyenya lava tikurisaka kambe lava titsongahataka xi va komba musa lowukulu.+
6 Hikwalaho, tivekeni ehansi ka voko ra matimba ra Xikwembu leswaku xi ta mi tlakusa hi nkarhi lowu faneleke,+
7 mi ri karhi mi lahlela ku vilela* ka n’wina hinkwako eka xona,+ hikuva xa khathala hi n’wina.+
8 Tlharihani mi va ni vuxiyaxiya.+ Nala wa n’wina Diyavulosi wa fambafamba ku fana ni nghala leyi bongaka, yi lava wa ku n’wi dya.+
9 Kambe lwanani na yena,+ mi va ni ripfumelo ro tiya, mi tiva leswaku maxangu lama fanaka ma va wela vamakwenu hinkwavo emisaveni hinkwayo.+
10 Kambe loko mi xaniseke swa xinkarhana, Xikwembu xa musa lowukulu hinkwawo lexi mi vitaneleke eku vangameni ka xona loku nga heriki+ ha Kreste xi ta hetisa ku leteriwa ka n’wina. Xi ta mi tiyisa,+ xi mi nyika matimba,+ xi ta endla leswaku mi nga tsekatseki.
11 Matimba a ma ve ya xona hilaha ku nga heriki. Amen.
12 Ndzi mi tsalele marito ma nga ri mangani hi ku tirhisa Silvhano,*+ makwerhu wo tshembeka, leswaku ndzi mi khutaza ni ku mi tiyisekisa leswaku lowu hi wona musa lowukulu wa ntiyiso wa Xikwembu. Khomelelani swi tiya eka wona.
13 Wansati loyi a nga eBabilona, loyi na yena a hlawuriweke ku fana na n’wina wa mi rungula, na Marka+ loyi a fanaka ni n’wana eka mina, na yena wa mi rungula.
14 Xewetanani hi ku tswontswana.*
Onge hinkwenu lava mi nga ni vun’we na Kreste mi nga va ni ku rhula.
Tinhlamuselo ta le hansi
^ Kumbe “leswi mi karhataka.”
^ Vito ra yena rin’wana i Silasi.
^ Vakreste a va tolovele ku xewetana hi ku tswontswana loko va hlangana.
