Samuwele Wo Sungula 11:1-15
11 Hiloko Nahaxi wa Muamoni+ a fika a dzima nxaxa a ta lwa ni muti wa Yabexe+ eGiliyadi. Vavanuna hinkwavo va le Yabexe va byela Nahaxi va ku: “Endla ntwanano na hina, hi ta ku tirhela.”
2 Nahaxi wa Muamoni a ku eka vona: “Ndzi ta wu endla na n’wina loko mo pfumela leswi: leswaku matihlo ya n’wina hinkwawo ya xinene ma xokoriwa. Ndzi ta endla leswi leswaku ndzi khomisa Vaisrayele hinkwavo tingana.”
3 Vakulukumba va le Yabexe va ku: “Hi nyike masiku ya nkombo leswaku hi ta rhuma vanhu etikweni hinkwaro ra Israyele. Kutani loko ku nga ri na loyi a nga hi ponisaka hi ta tinyiketa eka wena.”
4 Hi ku famba ka nkarhi varhumiwa va ya fika ni le Gibiya+ wa Sawulo, va byela vanhu marito lawa, kutani vanhu hinkwavo va sungula ku rila swinene.
5 Kambe Sawulo a humelela a ta hi le masin’wini a ri karhi a khayima tihomu, kutani a ku: “Swi lo yini hi vanhu lava? Va rilela yini?” Hiloko va n’wi rungulela marito ya vavanuna va le Yabexe.
6 Moya wa Xikwembu wu nyika Sawulo matimba+ loko a twa marito lawa, kutani a hlundzuka ngopfu.
7 Hiloko a teka tinkuzi timbirhi a ti tsemelela a ti rhumela etikweni hinkwaro ra Israyele hi ku tirhisa varhumiwa, va ku: “Munhu un’wana ni un’wana loyi a nga ta ka a nga landzeli Sawulo na Samuwele, u fanele a swi tiva leswaku tihomu takwe ti ta endliwa leswi!” Hiloko vanhu va sungula ku chava Yehovha, lerova va huma va ri ni xikongomelo xin’we.
8 Kutani a va hlaya eBezeki, a ku ri ni Vaisrayele va 300 000 ni vavanuna va Yuda va 30 000.
9 Va byela varhumiwa lava a va tile va ku: “Mi fanele mi byela vavanuna va le Yabexe eGiliyadi mi ku, ‘Mundzuku loko dyambu ri sungula ku hisa, mi ta ponisiwa.’” Hiloko varhumiwa va fika va byela vavanuna va le Yabexe, kutani va tsaka swinene.
10 Hikwalaho vavanuna va le Yabexe va ku: “Mundzuku hi ta tinyiketa eka n’wina, mi nga hi endla swin’wana ni swin’wana leswi mi vonaka swi ri swinene eka n’wina.”+
11 Hi siku leri landzelaka, Sawulo a ava vanhu va va mavuthu manharhu, kutani va nghena exikarhi ka nxaxa dyambu ri nga si xa* va dlaya Vaamoni+ kukondza ku va ninhlikanhi. Lava poneke va hangalasiwile, lerova a ku salanga vanhu vambirhi va ri swin’we.
12 Hiloko vanhu va byela Samuwele va ku: “I vamani lava a va ku, ‘Xana Sawulo u ta va hosi ya hina?’+ Hi nyiketeni vavanuna volavo, hi ta va dlaya.”
13 Kambe Sawulo a ku: “A ku na munhu loyi a nga ta dlayiwa namuntlha,+ hikuva namuntlha Yehovha u ponise Vaisrayele.”
14 Endzhaku ka sweswo Samuwele a byela vanhu a ku: “Tanani, a hi yeni eGiligala+ leswaku hi ya tiyisa vuhosi.”+
15 Hiloko vanhu hinkwavo va ya eGiligala, va fika eGiligala va veka Sawulo ku va hosi emahlweni ka Yehovha. Kutani va endla magandzelo yo kombela ku rhula kwalaho emahlweni ka Yehovha,+ hiloko Sawulo ni vavanuna hinkwavo va Israyele va tlangela va tsakile swinene.+
Tinhlamuselo ta le hansi
^ Ku nga kwalomu ka 2:00 hi matakuxa ku fikela hi 6:00 nimixo.
