Samuwele Wo Sungula 12:1-25
12 Eku heteleleni Samuwele a byela Vaisrayele hinkwavo a ku: “Maswivo, ndzi endle hinkwaswo leswi mi ndzi kombeleke leswaku ndzi swi endla, ndzi mi vekele hosi leswaku yi mi fuma.+
2 Sweswi hi leyi hosi leyi mi rhangelaka!*+ Loko ku ri mina, se ndzi dyuharile, ndzi base ni nhloko naswona vana va mina va na n’wina laha,+ ndzi mi rhangerile ku sukela evuntshweni bya mina ku fikela namuntlha.+
3 Hi mina loyi. Loko ku ri ni lexi mi vilerisaka hi mina, xi vuleni emahlweni ka Yehovha ni le mahlweni ka muhlawuriwa wakwe:+ Xana ndzi teke nkuzi ya mani kumbe mbhongolo ya mani?+ Kumbe i mani loyi ndzi n’wi dyeleleke kumbe ku n’wi xanisa? Xana u kona loyi ndzi pfumeleke loko a ndzi xava leswaku ndzi tipfala matihlo?+ Loko a ri kona ndzi ta n’wi tlherisela swona.”+
4 Hiloko va ku: “A wu hi dyelelanga kumbe ku hi xanisa kumbe ku pfumela ku xaviwa.”
5 Kutani a ku eka vona: “Yehovha i mbhoni ku lwisana na n’wina naswona muhlawuriwa wakwe i mbhoni namuntlha leswaku a mi kumanga nchumu xo ndzi hehla ha xona.”* Hiloko va ku: “I mbhoni.”
6 Hikwalaho Samuwele a byela vanhu a ku: “Yehovha, loyi a tirhiseke Muxe na Aroni ni loyi a humeseke vakokwa wa n’wina etikweni ra Egipta,+ i mbhoni.
7 Kutani sweswi, lunghekani, ndzi ta mi avanyisa emahlweni ka Yehovha hikwalaho ka swilo hinkwaswo leswinene leswi Yehovha a mi endleleke swona ni vakokwa wa n’wina.
8 “Hi ku hatlisa loko Yakobo a nghene eEgipta+ naswona vakokwa wa n’wina va sungule ku kombela mpfuno eka Yehovha,+ Yehovha u rhume Muxe+ na Aroni leswaku va humesa vakokwa wa n’wina eEgipta, va va tshamisa endhawini leyi.+
9 Kambe va rivale Yehovha Xikwembu xa vona kutani a va nyiketa+ evokweni ra Sisera,+ murhangeri wa vuthu ra Hasora ni le vokweni ra Vafilista+ ni le vokweni ra hosi ya Mowabu,+ kutani va lwa na vona.
10 Va kombela Yehovha leswaku a va pfuna,+ va ku, ‘Hi dyohile+ hikuva hi tshike Yehovha hi ya tirhela swifaniso swa Bali+ ni swa Axitoreti;+ sweswi hi kutsule evokweni ra valala va hina leswaku hi ta ku tirhela.’
11 Hiloko Yehovha a rhuma Yerubali+ na Bedani na Yefta+ na Samuwele+ va mi ponisa evokweni ra valala va n’wina lava a va mi rhendzerile, leswaku mi ta tshama mi sirhelelekile.+
12 Loko mi vona leswaku Nahaxi+ hosi ya Vaamoni wa mi hlasela, a mi tshamela ku vula leswi eka mina, ‘E-e, hina hi lava hosi,’+ hambileswi Yehovha Xikwembu xa n’wina a nga Hosi ya n’wina.+
13 Kutani hi leyi hosi leyi mi yi hlawuleke, leyi mi yi kombeleke. Maswivo! Yehovha u mi nyike hosi.+
14 Loko mi chava Yehovha+ mi tlhela mi n’wi tirhela,+ mi yingisa rito rakwe,+ mi nga fularheli xileriso xa Yehovha naswona n’wina ni hosi ya n’wina leyi mi fumaka mi landzela Yehovha Xikwembu xa n’wina, swi ta mi fambela kahle.
15 Kambe loko mi nga ri yingisi rito ra Yehovha, mi fularhela xileriso xa Yehovha, voko ra Yehovha ri ta lwa na n’wina ni vatata wa n’wina.+
16 Sweswi lunghekani mi vona nchumu lowu wo hlamarisa lowu Yehovha a mi endlelaka wona.
17 Xana a ku tshoveriwi koroni namuntlha? Ndzi ta khongela eka Yehovha leswaku a endla tilo ri dzindza ni ku nisa mpfula; kutani swi tiveni mi tlhela mi swi twisisa leswaku mi endle nchumu wo homboloka ematihlweni ya Yehovha hi ku tikombelela hosi.”+
18 Hiloko Samuwele a khongela eka Yehovha, Yehovha a endla tilo ri dzindza ni ku nisa mpfula hi siku rero, lerova vanhu hinkwavo va chava Yehovha na Samuwele swinene.
19 Vanhu hinkwavo va byela Samuwele va ku: “Khongelela malandza ya wena eka Yehovha Xikwembu xa wena,+ hileswi hi nga laviki ku fa, hikuva hi engetele xidyoho xin’wana eka leswi hi nga na swona hi ku kombela hosi.”
20 Hiloko Samuwele a byela vanhu a ku: “Mi nga chavi. I ntiyiso leswaku mi dyohile. Kambe ntsena mi nga hambuki mi tshika ku landzela Yehovha,+ mi tirhela Yehovha hi mbilu ya n’wina hinkwayo.+
21 Mi nga hambuki mi landzela swikwembu swin’wana,+ leswi nga pfuniki nchumu,+ leswi nga ponisiki, hikuva a swi nge mi yisi helo.
22 Yehovha a nge va tshiki vanhu vakwe+ hikwalaho ka vito rakwe lerikulu,+ hikuva Yehovha u mi hlawurile leswaku mi va vanhu vakwe.+
23 A hi swinene eka mina ku dyohela Yehovha hi ku tshika ku mi khongelela naswona ndzi ta ya emahlweni ndzi mi dyondzisa hi ndlela leyinene ni leyi lulameke.
24 Ntsena chavani Yehovha,+ mi n’wi tirhela hi ku tshembeka* hi timbilu ta n’wina hinkwato, tsundzukani swilo swo hlamarisa leswi a mi endleleke swona.+
25 Kambe loko mi ya emahlweni mi endla swo homboloka, mi ta lovisiwa,+ n’wina ni hosi ya n’wina.”+
Tinhlamuselo ta le hansi
^ Hi Xiheveru, “fambaka emahlweni ka n’wina.”
^ Hi Xiheveru, “a mi kumanga nchumu evokweni ra mina.”
^ Kumbe “hi ntiyiso.”
