Samuwele Wo Sungula 21:1-15
21 Hi ku famba ka nkarhi Davhida a fika eNobo+ eka muprista Ahimeleke. Ahimeleke a sungula ku rhurhumela loko a hlangana na Davhida, a ku eka yena: “Swi lo yini u ngo ta u ri wexe?”+
2 Davhida a hlamula muprista Ahimeleke a ku: “Hosi yi ndzi lerise ku ya endla swo karhi, kambe yi te, ‘U nga byeli munhu mhaka leyi ndzi ku rhumaka yona ni leswi ndzi ku leriseke swona.’ Ndzi twanane ni majaha ya mina leswaku hi ta hlangana endhawini yo karhi.
3 Loko u ri ni swinkwa swa ntlhanu, ndzi nyike swona, kumbe xin’wana ni xin’wana lexi nga kona.”
4 Kambe muprista a hlamula Davhida a ku: “A ku na xinkwa xa ntolovelo, ko va ni xinkwa xo kwetsima+ ntsena, majaha ma nga xi dya loko ma nga tshinelanga eka vavasati.”*+
5 Davhida a hlamula muprista a ku: “Vavasati va ve ekule na hina ku fana ni le mikarhini yin’wana loko ndzi huma ku ya endla ntirho wo karhi.+ Leswi mimiri ya majaha yi vaka yi tengile hambiloko ku endliwa ntirho lowu tolovelekeke, namuntlha yi fanele yi tenge hilaha ku tlurisaka!”
6 Kutani muprista a n’wi nyika xinkwa xo kwetsima,+ hikuva a ku nga ri na xin’wana handle ka xinkwa xo kwetsima, lexi a xi susiwile etabernakeleni ya Yehovha leswaku ku vekiwa lexintshwa hi siku rero.
7 Kambe un’wana wa malandza ya Sawulo a a ri kwalaho siku rero, a pfaleriwe emahlweni ka Yehovha. Vito rakwe a ku ri Dowege+ wa Muedomu,+ ndhuna ya varisi va Sawulo.
8 Kutani Davhida a vutisa Ahimeleke a ku: “Xana ku ni tlhari kumbe banga laha? Ndzi siye banga ni matlhari ya mina loko ndzi suka, hikuva ntirho wa hosi a wu ri wa xihatla.”
9 Hiloko muprista a ku: “Ku ni banga ra Goliyadi+ lowa Mufilista, loyi u n’wi dlayeke eNkoveni wa Elaha,+ ri phutseriwe hi lapi endzhaku ka efodi.+ Loko u ri lava u nga ri teka hikuva a ku na rin’wana handle ka rona.” Davhida a ku: “A ri kona leri fanaka na rona. Ndzi nyike rona.”
10 Hi siku rero Davhida a suka a famba a ya emahlweni a balekela+ Sawulo, a hetelela a fike eka Hosi Akixi wa le Gati.+
11 Hiloko malandza ya Akixi ma ku eka yena: “Xana loyi a hi yena Davhida hosi ya tiko? Xana a hi yena loyi a va n’wi yimbelelela va ri karhi va cina, va ku,‘Sawulo u dlaye magidi yakwe,Kambe Davhida u dlaye makume yakwe ya magidi’?”+
12 Davhida u swi tekele enhlokweni leswi va swi vuleke, kutani a sungula ku chava+ Hosi Akixi wa le Gati swinene.
13 Hikwalaho a tiendla onge u hlangane nhloko+ a tipengapengisa exikarhi ka vona. A a halahala mavanti ya gede ni ku tshika marha ma xiririka emalepfini.
14 Eku heteleleni Akixi a byela malandza yakwe a ku: “Ma swi vona leswaku munhu loyi wa penga. Hikwalaho ka yini mi n’wi tisa eka mina?
15 Xana mi twe leswaku ndzi lava swipengi leswi mi ndzi tiselaka munhu loyi a ta ndzi pengela? Xana munhu loyi u fanele a nghena endlwini ya mina?”
Tinhlamuselo ta le hansi
^ Kumbe “loko ma nga etlelanga ni vavasati.”
