Samuwele Wo Sungula 22:1-23
22 Kutani Davhida a suka kwalaho+ a balekela ebakweni ra Adulamu.+ Loko vamakwavo ni ndyangu hinkwawo wa tata wakwe va swi twa, va suka va ya kwalaho eka yena.
2 Hinkwavo lava a va ri ni swiphiqo ni lava a va ri ni swikweleti ni lava a va dya mbitsi va hlengeletana eka yena kutani a va ndhuna ya vona. A a ri ni vavanuna va kwalomu ka 400.
3 Endzhaku ka sweswo, Davhida a suka a ya eMizpa le Mowabu, a fika a byela hosi ya Mowabu+ a ku: “Ndzi kombela u pfumelela tatana na manana va tshama na wena kukondza ndzi tiva leswi Xikwembu xi nga ta ndzi endlela swona.”
4 Hiloko a va siya ni hosi ya Mowabu, va tshame kwalaho loko Davhida a a ri endhawini leyi sirhelelekeke.+
5 Hi ku famba ka nkarhi muprofeta Gadi+ a byela Davhida a ku: “U nga ha tshami endhawini leyi sirhelelekeke. Famba u ya etikweni ra Yuda.”+ Hiloko Davhida a suka a ya ekhwatini ra Hereta.
6 Sawulo a twa leswaku Davhida ni vavanuna lava a va ri na yena va kumiwile. Hi nkarhi wolowo Sawulo a a tshame ehansi ka murhi wa mutamarisiki eGibiya+ endhawini leyi tlakukeke, a khome tlhari naswona malandza yakwe hinkwawo ma yime ekusuhi na yena.
7 Hiloko Sawulo a byela malandza lama yimeke ekusuhi na yena a ku: “Ndzi kombela mi yingisa n’wina va ka Benjamini. Xana n’wana wa Yese+ u ta mi nyika ndhawu leswaku mi rima a tlhela a mi nyika ni masimu ya madiriva hinkwenu ka n’wina? Xana u ta mi endla tindhuna ta vanhu va magidi ni ta vanhu va madzana?+
8 Hinkwenu ka n’wina mi ndzi jikerile! A nga kona loyi a ndzi byeleke loko n’wana wa mina a endla ntwanano ni n’wana wa Yese!+ Naswona a nga kona ni un’we eka n’wina loyi a ndzi tweleke vusiwana, a ndzi byela leswaku n’wana wa mina u kucetele nandza wa mina leswaku a ndzi tumbelela, hilaha a endlaka hakona sweswi.”
9 Hiloko Dowege+ wa Muedomu, loyi a a yime kwalaho a ri murhangeri wa malandza ya Sawulo a hlamula a ku:+ “Ndzi vone n’wana wa Yese a ta eNobo eka Ahimeleke n’wana wa Ahithuba.+
10 U n’wi vutisele eka Yehovha, a tlhela a n’wi nyika ni swakudya. U kale a n’wi nyika ni banga ra Goliyadi lowa Mufilista.”+
11 Xikan’wekan’we hosi yi rhuma vanhu leswaku va ya vitana Ahimeleke n’wana wa muprista Ahithuba ni vaprista hinkwavo va ndyangu wa tata wakwe, lava a va ri eNobo. Kutani hinkwavo va ta eka hosi.
12 Sawulo a ku: “Ndzi kombela u yingisa wena n’wana wa Ahithuba,” hiloko a ku: “Ndzi yingisile hosi yanga.”
13 Sawulo a ku eka yena: “Hikwalaho ka yini wena ni n’wana wa Yese mi ndzi bohele xikungu, hi ku n’wi nyika xinkwa ni banga ni hi ku tlhela u n’wi vutisela eka Xikwembu? Yena u lwa na mina naswona u ndzi tumbelerile sweswi ndzi vulavulaka na wena.”
14 Hiloko Ahimeleke a hlamula hosi a ku: “Xana i mani eka malandza ya wena hinkwawo loyi a tshembekaka ku fana na Davhida?+ I mukon’wana wa hosi+ ni ndhuna ya varindzi va wena naswona wa xiximiwa endlwini ya wena.+
15 Xana a ku ri ro sungula ndzi n’wi vutisela eka Xikwembu?+ Leswi u swi vulaka a ndzi nge pfuki ndzi swi endlile. Hosi yi nga rhwexi nandza wa yona nandzu ni ndyangu hinkwawo wa tatana, hikuva nandza wa wena a a nga tivi nchumu nikatsongo hi mhaka leyi.”+
16 Kambe hosi yi ku: “Ahimeleke u ta fa hakunene,+ wena ni ndyangu hinkwawo wa tata wa wena.”+
17 Endzhaku ka sweswo hosi yi byela varindzi lava a va yime ekusuhi na yona yi ku: “Hundzulukani mi dlaya vaprista va Yehovha, hikuva va yime na Davhida! A va swi tiva leswaku a a ri eku balekeni naswona a va ndzi byelanga!” Kambe malandza ya hosi a ma nga swi lavi ku tlakusa mavoko ya wona ma hlasela vaprista va Yehovha.
18 Kutani hosi yi byela Dowege+ yi ku: “Wena, hundzuluka u hlasela vaprista!” Xikan’wekan’we Dowege wa Muedomu+ a hundzuluka a hlasela vaprista. Hi siku rero u dlaye vavanuna va 85 lava ambaleke efodi leyi endliweke hi lapi.+
19 U tlhele a hlasela Nobo,+ muti wa vaprista, hi banga; wanuna swin’we ni wansati, n’wana swin’we ni ricece, nkuzi, mbhongolo ni nyimpfu u swi hlasele hi banga.
20 Hambiswiritano, n’wana un’we wa Ahimeleke n’wana wa Ahithuba, loyi vito rakwe a ku ri Abiyatara+ u balekile a landzela Davhida.
21 Abiyatara a byela Davhida a ku: “Sawulo u dlaye vaprista va Yehovha.”
22 Hiloko Davhida a byela Abiyatara a ku: “Ndzi swi tivile siku leriya+ loko Dowege wa Muedomu a ri kwalaho, leswaku hakunene a a ta byela Sawulo. Hi mina ndzi dlayiseke hinkwavo endlwini ya tata wa wena.
23 Tshama na mina. U nga chavi, hikuva loyi a lavaka vutomi bya wena u lava ni bya mina; ndzi ta ku sirhelela.”+
