Samuwele Wo Sungula 25:1-44
25 Hi ku famba ka nkarhi Samuwele+ a fa; kutani tiko hinkwaro ra Israyele ri hlengeletana leswaku ri n’wi rila ni ku n’wi lahla emutini wakwe eRhama.+ Kutani Davhida a suka a ya emananga ya Parani.
2 A ku ri ni wanuna un’wana eMawoni+ loyi a a tirhela eKarimeli.*+ Wanuna loyi a a fuwile swinene; a a ri ni tinyimpfu ta 3 000 ni timbuti ta 1 000, hi nkarhi wolowo a a tsemeta tinyimpfu takwe eKarimeli.
3 Vito ra wanuna loyi a ku ri Nabali,+ kasi nsati wakwe a ku ri Abigayele.+ Nsati wakwe a a tlharihile a tlhela a saseka, kambe nuna wa kona a a ri wa ndyangu wa Kalebe,+ a a karhata naswona a a ri ni mahanyelo yo biha.+
4 Davhida a swi twa a ri emananga leswaku Nabali a a tsemeta tinyimpfu takwe.
5 Hiloko Davhida a rhuma majaha ya khume, a ku eka wona: “Tlhandlukelani eKarimeli, loko mi fika eka Nabali, n’wi pfuxeleni hi vito ra mina.
6 Mi ku, ‘Onge u nga hanya nkarhi wo leha naswona onge wena ni ndyangu wa wena ni swilo hinkwaswo leswi u nga na swona mi nga va ni ku rhula.
7 Ndzi swi twile leswaku u le ku tsemeteni ka tinyimpfu. Loko varisi va wena va ri na hina, a hi va karhatanga+ naswona a va lahlekeriwanga hi nchumu nkarhi hinkwawo loko va ri eKarimeli.
8 Vutisa malandza ya wena, ma ta ku byela. Onge majaha ya mina u nga ma komba tintswalo, hikuva hi te hi nkarhi wa ntsako.* Ndzi kombela u nyika malandza ya wena ni n’wana wa wena Davhida, xin’wana ni xin’wana lexi u nga hi nyikaka xona.’”+
9 Majaha ya Davhida ma ya eka Nabali ma fika ma n’wi byela hinkwaswo leswi Davhida a swi vuleke. Loko ma heta,
10 Nabali a hlamula malandza ya Davhida a ku: “Davhida i mani naswona n’wana wa Yese i mani? Masiku lawa malandza yo tala ma balekela vini va wona.+
11 Xana ndzi fanele ku teka xinkwa xa mina ni mati ya mina ni nyama leyi ndzi yi tlhaveleke vatirhi va mina, ndzi swi nyika vanhu lava ndzi nga tiviki ni lomu va humaka kona?”
12 Hiloko majaha ya Davhida ma tlhela, ma fika ma n’wi byela marito lawa hinkwawo.
13 Xikan’wekan’we Davhida a byela vanhu vakwe a ku: “Un’wana ni un’wana a khame banga rakwe!”+ Hiloko hinkwavo va khama mabanga ya vona, Davhida na yena a khama banga rakwe, kutani vavanuna va kwalomu ka 400 va tlhandluka na Davhida, va 200 va sala ni mindzhwalo.
14 Hi nkarhi wolowo, un’wana wa malandza a ya byela Abigayele nsati wa Nabali, a ku: “Davhida u rhume vanhu va suka emananga va ta pfuxela n’wini wa hina, kambe yena u va haxe hi nhlambha.+
15 Vavanuna lava a va hi khome kahle. A va hi karhatanga naswona a hi lahlekeriwanga hi nchumu nkarhi hinkwawo lowu a hi ri na vona enhoveni.+
16 A va fana ni khumbi leri hi sirhelelaka vusiku ni nhlikanhi, nkarhi hinkwawo loko hi ri na vona hi risa ntlhambi.
17 Sweswi ehleketa leswi u nga ta swi endla, hikuva n’wini wa hina ni yindlu yakwe hinkwayo va kunguhateriwe khombo,+ yena u hunguke ngopfu+ lerova a nga kona loyi a nga n’wi byelaka nchumu.”
18 Hi ku hatlisa Abigayele+ a teka swinkwa swa 200, makhuwana mambirhi lamakulu ya vhinyo, tinyimpfu ta ntlhanu leti yevuriweke, mimpimo ya ntlhanu ya tiseya* ya mbhacha, makhekhe ya 100 lama endliweke hi madiriva lama omisiweke, ni makhekhe ya 200 lama endliweke hi makuwa lama omisiweke, a swi rhwala hi timbhongolo.+
19 Hiloko a byela malandza yakwe a ku: “Rhangani; ndzi ta mi landzela.” Kambe a nga n’wi byelanga nchumu Nabali nuna wakwe.
20 Loko a ri karhi a rhelela a gade mbhongolo a sirhiwe hi ntshava, hi nkarhi wolowo Davhida ni vanhu vakwe a va rhelela va n’wi kongomile kutani a hlangana na vona.
21 Davhida a a ku: “Ndzi lo tikarhatela mahala leswi ndzi sirheleleke swilo hinkwaswo swa munhu loyi emananga. A xi kona ni xin’we lexi nga lahleka,+ kambe u ndzi tlherisela hi leswo biha eka leswinene leswi ndzi n’wi endleleke swona.+
22 Xikwembu a xi xupule valala va Davhida loko ro xa ka ha ri ni wanuna* loyi a saleke endyangwini wa Nabali.”
23 Loko Abigayele a vona Davhida, a hatla a xika embhongolweni, a khinsama emahlweni ka Davhida xikandza xakwe xi khumba ehansi.
24 Kutani a wela emilengeni yakwe, a ku: “Hosi yanga, nandzu lowu a wu rhwexiwe mina; pfumelela nandza wa wena a vulavula, kutani u n’wi yingisa.
25 Hosi yanga, ndzi kombela u nga n’wi tekeli enhlokweni Nabali loyi wo hunguka,+ hikuva u fana ni vito rakwe. Vito rakwe i Nabali,* naswona u hungukile. Kambe mina nandza wa wena a ndzi ma vonanga majaha ya hosi yanga lawa u ma rhumeke.
26 Sweswi hosi yanga, ndza hlambanya hi Yehovha Xikwembu lexi hanyaka na leswi wena u hanyaka leswaku i Yehovha loyi a ku siveleke+ ku va ni nandzu wa ngati+ nileswaku u nga rihiseli. Onge valala va wena ni lava va lavaka ku vavisa hosi yanga va nga fana na Nabali.
27 Kutani nyiko+ leyi nandza wa wena a yi tiseleke hosi yanga a yi nyikiwe majaha lama fambaka ni hosi yanga.+
28 Ndzi kombela u rivalela xihoxo xa nandza wa wena, hikuva kunene Yehovha u ta endla yindlu ya hosi yanga yi tshama nkarhi wo leha,+ hikwalaho ka leswi hosi yanga yi lwaka tinyimpi ta Yehovha+ naswona a wu endlanga nchumu xo biha emasikwini ya wena hinkwawo.+
29 Loko un’wana a ku hlongorisa a lava ku ku dlaya, vutomi bya hosi yanga byi ta va byi tsondzeriwile swi tiya enkwameni wa vutomi swin’we na Yehovha Xikwembu xa wena, kambe vutomi bya valala va wena u ta byi cukumetela ekule ku fana ni maribye lama humaka eka xipelupelu.
30 Naswona loko Yehovha a ta va a endlele hosi yanga swilo hinkwaswo leswinene leswi a swi tshembiseke kutani a ku veka u va murhangeri wa Israyele,+
31 a wu nge tisoli embilwini ya wena eku halatiweni ka ngati handle ka xivangelo ni hi ku pfumelela voko ra wena ri tirihisela.+ Loko Yehovha a ku katekisa, u nga rivali nandza wa wena.”
32 Hiloko Davhida a byela Abigayele a ku: “A ku dzunisiwe Yehovha Xikwembu xa Israyele loyi a ku rhumeke namuntlha leswaku u ta hlangana na mina!
33 Nakambe a ku katekisiwe vutlhari bya wena! Onge u nga katekisiwa hileswi namuntlha u ndzi siveleke ku va ni nandzu wa ngati+ ni leswaku ndzi nga tirihiseli hi mavoko ya mina.
34 Handle ka swona, ndza hlambanya hi Yehovha Xikwembu lexi hanyaka, Xikwembu xa Israyele loyi a ndzi siveleke ku ku endla swo biha,+ loko a wu nga hatlisanga u ndzi hlanganisa,+ nimixo a ku nga ta va ni wanuna* loyi a a ta va a sele endyangwini wa Nabali.”+
35 Hiloko Davhida a amukela leswi a a n’wi tele na swona, kutani a ku eka yena: “Tlhandlukela endlwini ya wena hi ku rhula. Waswivo, ndzi ku yingisile, ndzi ta ku endlela leswi u swi kombeleke.”
36 Endzhakunyana Abigayele a tlhelela eka Nabali, loyi a a ri eku titlonyeni ku fana ni hosi endlwini yakwe, Nabali* a a tsakile naswona a a dakwe ngopfu. Abigayele a nga n’wi byelanga nchumu kukondza ri xa.
37 Nimixo loko Nabali a xalamukile, nsati wakwe a n’wi byela swilo leswi. Mbilu yakwe yi fana ni ya munhu la feke, a etlela a ome swirho ku fana ni ribye.
38 Endzhaku ka masiku ya kwalomu ka khume, Yehovha a ba Nabali a fa.
39 Loko Davhida a twa leswaku Nabali u file, a ku: “A ku dzunisiwe Yehovha loyi a kambisiseke mhaka ya mina+ ya ku rhukaniwa hi Nabali,+ a tlhela a sivela nandza wakwe ku endla leswo biha,+ Yehovha u ndzi rihiserile eka Nabali!” Hiloko Davhida a rhumela rito leswaku va ya n’wi gangisela Abigayele leswaku a ta n’wi teka a va nsati wakwe.
40 Kutani malandza ya Davhida ma fika eka Abigayele eKarimeli, ma ku eka yena: “Davhida u hi rhume eka wena leswaku hi ta ku teka u va nsati wakwe.”
41 Xikan’wekan’we a suka a yima kutani a khinsama xikandza xakwe xi khumba ehansi, a ku: “Hi leri hlonga ra wena tanihi nandza loyi a nga ta hlambisa milenge+ ya malandza ya hosi yanga.”
42 Kutani Abigayele+ a suka a yima hi ku hatlisa a ya gada mbhongolo yakwe malandza yakwe ya xisati ya ntlhanu ma famba endzhaku ka yena; a famba ni varhumiwa va Davhida a ya va nsati wakwe.
43 Davhida a a teke na Ahinowama+ wa le Yizriyele,+ kutani vavasati lava havambirhi va va vasati vakwe.+
44 Kambe Sawulo u teke Mikala+ n’wana wakwe, nsati wa Davhida, a n’wi nyika Palati+ n’wana wa Layixi, loyi a a huma eGalimi.
Tinhlamuselo ta le hansi
^ I muti lowu nga eYuda; a hi ndhawu yin’we ni Ntshava ya Karimeli.
^ Hi Xiheveru, “siku lerinene.”
^ Seya a yi ringana ni 7,33 wa tilitara. Vona Xiengetelo B14.
^ Hi Xiheveru, “un’wana ni un’wana loyi a tsakamiselaka ekhumbini.” I xivulavulelo xa Xiheveru xo nyaja loko ku vulavuriwa hi vavanuna.
^ Leswi vulaka, “Xiphukuphuku.”
^ Hi Xiheveru, “un’wana ni un’wana loyi a tsakamiselaka ekhumbini.” I xivulavulelo xa Xiheveru xo nyaja loko ku vulavuriwa hi vavanuna.
^ Hi Xiheveru, “mbilu ya Nabali.”
