Samuwele Wo Sungula 26:1-25
26 Hi ku famba ka nkarhi vavanuna va le Sifi+ va ya eka Sawulo eGibiya,+ va fika va ku: “Xana Davhida a nga tumbelanga exintshabyanini xa Hakila lexi langutaneke na Yeximoni?”*+
2 Hiloko Sawulo a ya emananga ya Sifi a ri ni vavanuna va 3 000, lava hlawuriweke etikweni hinkwaro ra Israyele va ya lava Davhida emananga ya Sifi.+
3 Sawulo a fika a dzima nxaxa exintshabyanini xa Hakila lexi langutaneke na Yeximoni ekusuhi ni ndlela. Davhida a a tshama emananga hi nkarhi wolowo, kutani a twa leswaku Sawulo u tile emananga ku ta n’wi hlota.
4 Hiloko Davhida a rhumela vanhu leswaku va ya kumisisa loko Sawulo a tile hakunene.
5 Endzhaku ka sweswo, Davhida a ya laha Sawulo a a dzime nxaxa kona, hiloko Davhida a vona laha Sawulo na Abinere+ n’wana wa Nere, ndhuna ya masocha ya Sawulo, a va etlele kona; Sawulo a a etlele vurhongo enxaxeni lowu nga biyeriwa, masocha ma n’wi rhendzele hinkwako.
6 Kutani Davhida a vutisa Ahimeleke lowa Muheti+ na Abixayi+ n’wana wa Seruya,+ makwavo wa Yowabu a ku: “I mani la nga ta rhelela na mina eka Sawulo enxaxeni?” Abixayi a ku: “Ndzi ta rhelela na wena.”
7 Davhida na Abixayi va ye laha ku nga ni masocha nivusiku, va kuma Sawulo a etlele vurhongo tlhari rakwe ri dzimiwe hi le tinhlokweni takwe; Abinere ni masocha a va etlele ematlhelo ka yena.
8 Abixayi a ku eka Davhida: “Namuntlha Xikwembu xi nyikete nala wa wena evokweni ra wena.+ Sweswi ndzi kombela u ndzi pfumelela ndzi n’wi tlhava kan’we ntsena ndzi n’wi patsa ni misava hi tlhari, a swi nge lavi ndzi engeta.”
9 Kambe Davhida a ku eka Abixayi: “U nga n’wi dlayi, hikuva i mani la nga tlakusaka voko rakwe ku lwa ni muhlawuriwa wa Yehovha+ ivi a nga vi na nandzu?”+
10 Davhida a ya emahlweni a ku: “Ndza hlambanya hi Yehovha Xikwembu lexi hanyaka leswaku Yehovha hi byakwe u ta n’wi dlaya,+ kumbe siku ra yena ri ta ta+ kutani u ta fa, kumbe u ta rhelela a ya enyimpini a ya fela kona.+
11 A hi swinene ematihlweni ya Yehovha leswaku ndzi tlakusa voko ra mina ndzi dlaya muhlawuriwa wa Yehovha!+ Ndzi kombela u teka tlhari leri nga etinhlokweni takwe ni gula ra mati hi famba.”
12 Hiloko Davhida a teka tlhari ni gula ra mati etinhlokweni ta Sawulo, kutani va famba. A ku na munhu loyi a va voneke+ kumbe ku pfuka, a va etlele hinkwavo ka vona, hikuva Yehovha a va be hi vurhongo lebyikulu.
13 Kutani Davhida a tlulela entsungeni, a fika a yima ehenhla ka ntshava leyi nga ekulenyana ni laha Sawulo a a etlele kona.
14 Davhida a huwelela masocha na Abinere+ n’wana wa Nere, a ku: “Abinere, u miyelela yini?” Abinere a hlamula a ku: “Hi wena mani u huwelelaka hosi?”
15 Davhida a ku eka Abinere: “Xana a wu wanuna? I mani la fanaka na wena eIsrayele? Kutani hikwalaho ka yini u tsandzekile ku rindza hosi ya wena? Hikuva un’wana wa masocha u tile a lava ku dlaya hosi ya wena.+
16 Leswi u swi endleke a hi swinene. Ndza hlambanya hi Yehovha Xikwembu lexi hanyaka leswaku u faneriwa hi ku fa, hikuva a mi yi rindzanga hosi ya n’wina, muhlawuriwa wa Yehovha.+ Halahalani! Ri kwihi tlhari ra hosi ni gula ra mati+ leswi a swi ri etinhlokweni ta yona?”
17 Hiloko Sawulo a swi twa leswaku i Davhida loyi a vulavulaka kutani a ku: “Xana leri i rito ra wena n’wananga Davhida?”+ Davhida a ku: “I rito ra mina hosi yanga.”
18 A tlhela a ku: “Hikwalaho ka yini hosi yanga yi hlongorisa nandza wa yona,+ ndzi dlawela yini, xana ndzi dyohe yini?+
19 Ndzi kombela hosi yanga yi yingisa marito ya nandza wa yona: Loko ku ri leswaku i Yehovha loyi a ku hlohloteleke ku lwa na mina, a amukele gandzelo ra mina ra mavele. Kambe loko u hlohloteriwe hi vanhu,+ va rhukaniwile emahlweni ka Yehovha, hikuva namuntlha va ndzi hlongorile leswaku ndzi nga tshami ni vanhu* va Yehovha,+ va ku, ‘Famba u ya tirhela swikwembu swin’wana!’
20 Kutani sweswi u nga pfumeleli ngati ya mina yi wela emisaveni ekule na Yehovha, hikuva hosi ya Israyele yi humile ku ya lava dzedze rin’we,+ onge hiloko yi hlongorisa n’hwari* etintshaveni.”
21 Hiloko Sawulo a ku: “Ndzi dyohile.+ Vuya Davhida n’wananga, a ndzi nge he ku endli leswo biha, hikuva u teke vutomi bya mina byi ri bya nkoka+ namuntlha. Ndzi endle vuphukuphuku naswona ndzi endle xihoxo lexikulu.”
22 Davhida a hlamula a ku: “Hi leri tlhari ra hosi. Rhuma un’wana wa majaha ya wena a ta ri teka.
23 Yehovha hi yena loyi a nga ta hakela un’wana ni un’wana hikwalaho ka ku lulama kakwe+ ni ku tshembeka kakwe, hikuva Yehovha a a ku nyikete evokweni ra mina namuntlha, kambe a ndzi swi lavanga ku tlakusa voko ra mina ndzi lwa ni muhlawuriwa wa Yehovha.+
24 Yingisa! Leswi namuntlha ndzi tekeke vutomi bya wena byi ri bya risima, ni bya mina a byi ve bya risima eka Yehovha, a a ndzi ponise emaxangwini hinkwawo.”+
25 Hiloko Sawulo a ku eka Davhida: “Onge u nga katekisiwa Davhida n’wananga. Kunene u ta endla swilo swo hlamarisa naswona u ta hlula.”+ Kutani Davhida a famba, Sawulo a tlhelela endhawini yakwe.+
