Samuwele Wo Sungula 27:1-12
-
Vafilista va nyika Davhida muti wa Sikilaga (1-12)
27 Hambiswiritano, Davhida a tibyela a ku: “Sawulo u ta ndzi dlaya siku rin’wana. Swa antswa ndzi balekela+ etikweni ra Vafilista; kutani Sawulo u ta lan’wa a nga ha ndzi hloti etikweni hinkwaro ra Israyele,+ ndzi ta va ndzi ponile hi ndlela yoleyo.”
2 Kutani Davhida a famba ni vanhu vakwe va 600+ va ya eka Akixi+ n’wana wa Mawoko, hosi ya le Gati.
3 Davhida a fika a tshama na Akixi eGati, yena ni vanhu vakwe, wanuna ha un’we a ri ni ndyangu wakwe. Davhida a a ri ni vasati vakwe vambirhi Ahinowama+ lowa le Yizriyele na Abigayele+ wa le Karimeli loyi a a ri nsati wa mufi Nabali.
4 Loko Sawulo a twa leswaku Davhida u balekele eGati, u tshike ku n’wi hlongorisa.+
5 Kutani Davhida a byela Akixi a ku: “Loko u swi rhandza, a va ndzi nyike ndhawu yo tshama eka yona eka wun’wana wa miti ya wena leswaku ndzi ta tshama kona. Hikwalaho ka yini nandza wa wena a fanele a tshama na wena emutini wa vuhosi?”
6 Kutani Akixi a n’wi nyika muti lowu vuriwaka Sikilaga+ hi siku rero. Hi yona mhaka leyi Sikilaga wu nga muti wa tihosi ta Yuda ku ta fikela namuntlha.
7 Davhida u tshame lembe ni tin’hweti ta mune etikweni ra Vafilista.+
8 Davhida a a tlhandluka ni vanhu vakwe va hlasela Vagexura,+ Vagiriza ni Vaamaleke,+ hikuva a va tshama etikweni leri a ri sukela eTelama ku ya eXure+ ni ku ya fika etikweni ra Egipta.
9 Loko Davhida a hlasela tiko, a a dlaya vavanuna ni vavasati hinkwavo,+ kambe a a teka tinyimpfu, tihomu, timbhongolo, tikamela ni swiambalo, endzhaku ka sweswo a tlhelela eka Akixi.
10 Loko Akixi a ku: “Xana a mi hlasela kwihi namuntlha?” Davhida a a ku: “Edzongeni* wa tiko ra Yuda”+ kumbe “Edzongeni wa tiko ra Vayeramiyele”+ kumbe “Edzongeni wa tiko ra Vakena.”+
11 Davhida a a dlaya vavanuna ni vavasati hinkwavo leswaku a nga vuyi na vona eGati, a tibyela a ku: “Leswaku va nga hi dlayisi va ku, ‘Davhida u endle hi ndlela leyi.’” (Davhida a a endla tano loko a ha tshama etikweni ra Vafilista.)
12 Kutani Akixi a tshemba Davhida, a tibyela a ku: ‘Davhida u tiendlele vito ro biha etikweni ra rikwavo eIsrayele, u ta va nandza wa mina vutomi bya yena hinkwabyo.’
Tinhlamuselo ta le hansi
^ Kumbe “ENegebu.”
