Samuwele Wo Sungula 29:1-11
-
Vafilista va nga n’wi tshembi Davhida (1-11)
29 Vafilista+ va hlengeleta masocha ya vona hinkwawo eAfeke, kasi Vaisrayele a va dzime mixaxa ekusuhi ni xihlovo eYizriyele.+
2 Tihosi ta Vafilista a ti ri karhi ti hundza ti ri ni mitlawa ya masocha ya madzana ni ya magidi, Davhida ni masocha yakwe a va landzela hi le ndzhaku va ri na Akixi.+
3 Kambe tihosana ta Vafilista ti ku: “Xana Vaheveru lava va lava yini laha?” Akixi a hlamula tihosana ta Vafilista a ku: “Loyi i Davhida nandza wa Hosi Sawulo wa le Israyele, loyi se a nga ni lembe kumbe ku tlula a tshama na mina.+ A ndzi si vona nchumu xo biha eka yena hi mpfhuka a balekele eka mina ku ta fikela namuntlha.”
4 Kambe tihosana ta Vafilista ti n’wi hlundzukela ti ku: “Tlherisa munhu loyi.+ A a tlhelele endhawini leyi u n’wi nyikeke yona. U nga n’wi pfumeleli a famba na hina enyimpini leswaku a nga hi jikeli enyimpini.+ Hikuva a nga tshuka a lava ku tsakisa hosi yakwe hi tinhloko ta masocha ya hina.
5 Xana loyi a hi yena Davhida loyi a va n’wi yimbelelela va ri karhi va cina va ku:
‘Sawulo u dlaye magidi yakwe,Kambe Davhida u dlaye makume yakwe ya magidi’?”+
6 Hiloko Akixi+ a vitana Davhida a ku: “Ndza hlambanya hi Yehovha Xikwembu lexi hanyaka leswaku u lulamile naswona a ndzi ta swi tsakela leswaku u famba na masocha ya mina enyimpini,+ hikuva a ndzi si vona nchumu xo biha eka wena hi mpfhuka u ta eka mina ku fikela namuntlha.+ Kambe tihosana a ti ku tshembi.+
7 Hikwalaho timukele hi ku rhula, u nga endli nchumu lexi nga ta hlundzukisa tihosana ta Vafilista.”
8 Kambe Davhida a ku eka Akixi: “Swi lo yini, xana ndzi endle yini? Xana ku ni nchumu wo biha lowu u wu voneke eka nandza wa wena hi mpfhuka ndzi ta eka wena ku fikela namuntlha? Hikwalaho ka yini ndzi nga fanelanga ndzi famba na wena ndzi ya lwa ni valala va hosi yanga?”
9 Akixi a hlamula Davhida a ku: “Eka mina u lulamile ku fana ni ntsumi ya Xikwembu.+ Kambe tihosana ta Vafilista ti te, ‘U nga n’wi pfumeleli a famba na hina enyimpini.’
10 Kutani pfuka ka ha ri mpundzu swinene ni malandza ya hosi ya wena lama teke na wena; vindzukani mi muka ka ha ri mpundzu swinene loko ri sungula ku xa.”
11 Hikwalaho Davhida ni vanhu vakwe va pfuka ka ha ri mpundzu swinene va tlhelela etikweni ra Vafilista, Vafilista vona va tlhandlukela eYizriyele.+
