Samuwele Wo Sungula 30:1-31
30 Kuteloko Davhida ni vanhu vakwe va fika eSikilaga+ hi siku ra vunharhu, Vaamaleke+ a va hlasele edzongeni* ku katsa ni le Sikilaga, va wu hlasele va tlhela va wu hisa hi ndzilo.
2 A va teke vavasati+ ni vanhu hinkwavo lava a va ri kwalaho, ku sukela eka lontsongo ku ya eka lonkulu. A va dlayanga munhu, kambe va lo va teka va famba na vona.
3 Loko Davhida ni vanhu vakwe va fika emutini va kume leswaku wu hisiwe wu hela naswona vasati va vona ni vana va vona va majaha ni va vanhwanyana va tekiwile.
4 Hiloko Davhida ni vanhu vakwe va sungula ku tlakusa marito va rila swinene kukondza va heleriwa hi matimba.
5 Vasati vambirhi va Davhida ku nga Ahinowama wa le Yizriyele na Abigayele nsati wa mufi Nabali wa le Karimeli na vona a va tekiwile.+
6 Davhida a a ri ni gome swinene, hikuva vanhu vakwe a va vulavula hi ku n’wi khandla hi maribye hikwalaho ka leswi vavanuna hinkwavo a va twe ku vava hikwalaho ko lahlekeriwa hi vana va vona va majaha ni va vanhwanyana. Kambe Davhida a titiyisa hi Yehovha Xikwembu xakwe.+
7 Kutani Davhida a byela muprista Abiyatara+ n’wana wa Ahimeleke, a ku: “Ndzi kombela u tisa efodi haleni.”+ Abiyatara a tisa efodi eka Davhida.
8 Davhida a vutisa Yehovha,+ a ku: “Xana ndzi fanele ndzi hlongorisa vuthu leri ra vaphangi? Xana ndzi ta va kuma?” Hiloko A ku eka yena: “Va hlongorise, hikuva kunene u ta va kuma u tlhela u kuma hinkwaswo leswi va swi tekeke.”+
9 Hi ku hatlisa Davhida ni vanhu vakwe va 600+ va va hlongorisa, va famba ku ya fika eNkoveni wa Besori, laha vavanuna van’wana va nga sala kona.
10 Davhida ni vavanuna va 400 va ya emahlweni va va hlongorisa, kambe vavanuna va 200 lava a va karhele ngopfu va sala eNkoveni wa Besori.+
11 Hiloko va kuma wanuna wa Muegipta enhoveni kutani va n’wi yisa eka Davhida. Va n’wi nyika swakudya leswaku a dya ni mati leswaku a nwa,
12 va tlhela va n’wi nyika xiphemu xa khekhe ra makuwa lama omisiweke ni makhekhe mambirhi ya madiriva lama omisiweke. Endzhaku ka loko a dyile a sungula ku tiyelela,* hikuva a a nga dyanga nchumu kumbe ku nwa mati ku ringana masiku manharhu ni vusiku bya kona.
13 Davhida a n’wi vutisa a ku: “U nandza wa mani naswona u huma kwihi?” a hlamula a ku: “Ndzi Muegipta, ndzi hlonga ra wanuna wa Muamaleke, kambe n’wini wanga u ndzi siyile hikuva ndzi sungule ku vabya masiku manharhu lama hundzeke.
14 Hi hina hi nga hlasela edzongeni* wa tiko ra Vakereti+ ni tiko ra Yuda ni le dzongeni* wa tiko ra Kalebe,+ naswona Sikilaga hi wu hise hi ndzilo.”
15 Hiloko Davhida a ku: “Xana u nga ndzi yisa laha vuthu leri ra vaphangi ri nga kona?” A hlamula a ku: “Loko wo hlambanya hi Xikwembu leswaku a wu nge ndzi dlayi ni leswaku a wu nge ndzi nyiketi eka n’wini wanga, ndzi ta ku yisa laha vuthu leri ra vaphangi ri nga kona.”
16 Hikwalaho a n’wi yisa laha a va hangalakele kona ematlhelweni hinkwawo ya tiko, va ri karhi va dya ni ku nwa va endle ni nkhuvo hikwalaho ka swilo hinkwaswo leswi va swi tekeke etikweni ra Vafilista ni le tikweni ra Yuda.
17 Kutani Davhida a va dlaya ku sukela nimpundzu swinene ku fikela nimadyambu ya siku leri tlhandlamaka; a ku na munhu loyi a poneke+ handle ka vavanuna va 400 lava balekeke hi tikamela.
18 Davhida a tlhela a kuma hinkwaswo leswi Vaamaleke a va swi tekile,+ a ponisa ni vasati vakwe vambirhi.
19 Va kume swilo swa vona hinkwaswo, ku sukela eka lexitsongo ku ya eka lexikulu. Va kume vana va vona va majaha ni va vanhwanyana ni leswi a swi tekiwile;+ Davhida u kume swilo hinkwaswo leswi a va swi tekile.
20 Davhida a teka mintlhambi hinkwayo ya tinyimpfu ni mintlhambi hinkwayo ya tihomu kutani va yi khayima ni swifuwo swa vona. Va ku: “Leswi i swilo leswi phangiweke hi Davhida.”
21 Hiloko Davhida a fika eka vavanuna va 200 lava a va karhele ngopfu leswaku va nga famba na Davhida naswona a va sale eNkoveni wa Besori,+ kutani va huma va hlanganisa Davhida ni vanhu lava a a ri na vona. Loko Davhida a fika ekusuhi na vona a va xeweta.
22 Hambiswiritano, wanuna un’wana ni un’wana wa mona ni wo hunguka eka lava a va fambe na Davhida a ku: “Leswi va nga fambangiki na hina a hi nge va nyiki nchumu eka leswi hi vuyeke na swona, un’wana ni un’wana a a teke nsati wakwe ni vana vakwe a famba.”
23 Kambe Davhida a ku: “Vamakwerhu mi nga tshuki mi endla sweswo hi swilo leswi hi nyikiweke hi Yehovha. U hi sirhelerile a tlhela a nyiketa vuthu ra vaphangi leri a ri hi hlaserile evokweni ra hina.+
24 A nga kona loyi a nga yimaka na n’wina emhakeni leyi. Leswi nga ta kumiwa hi loyi a yeke enyimpini swi ta ringana ni swa loyi a saleke ni mindzhwalo.+ Hinkwavo va ta kuma xo karhi.”+
25 Ku sukela esikwini rero ku ya emahlweni, u swi veke swi va xileriso ni nawu eIsrayele ku ta fikela namuntlha.
26 Loko Davhida a fika eSikilaga, u teke swin’wana swa leswi phangiweke a swi rhumela vakulukumba va Yuda, lava a va ri vanghana vakwe a ku: “Leyi i nyiko ya n’wina leyi tekeriweke valala va Yehovha.”
27 U swi rhumele eka lava a va ri eBethele,+ lava a va ri eRhamoti leyi nga le Negebu,* lava a va ri eYatiri,+
28 lava a va ri eArowere, lava a va ri eSifimoti, lava a va ri eExitemowa,+
29 lava a va ri eRakala, lava a va ri emitini ya Vayeramiyele,+ lava a va ri emitini ya Vakena,+
30 lava a va ri eHorma,+ lava a va ri eBoraxani, lava a va ri eAtaki,
31 lava a va ri eHebroni+ ni le tindhawini hinkwato leti Davhida ni vanhu vakwe a va tala ku ya eka tona.
Tinhlamuselo ta le hansi
^ Kumbe “eNegebu.”
^ Hi Xiheveru, “moya wakwe wu vuyela eka yena.”
^ Kumbe “eNegebu.”
^ Kumbe “Negebu.”
^ Kumbe “dzongeni.”
