Samuwele Wo Sungula 31:1-13
-
Rifu ra Sawulo ni vana vakwe vanharhu va majaha (1-13)
31 Vafilista a va lwa ni Vaisrayele.+ Kutani vavanuna va Israyele va baleka Vafilista, ku dlayiwa vo tala eNtshaveni ya Gilbowa.+
2 Vafilista va sivelela Sawulo ni vana vakwe, hiloko va dlaya Yonathani,+ Abinadaba na Maliki-xuwa, vana va Sawulo.+
3 Nyimpi yi ya yi hisa laha Sawulo a a ri kona, hiloko vacopi va miseve va n’wi kuma, va n’wi vavisa swinene.+
4 Kutani Sawulo a byela mukhomi wa matlhari yakwe a ku: “Hlomula banga ra wena u ndzi dlaya, leswaku vavanuna lava va nga yimbangiki+ va nga fiki va ndzi tlhava va ndzi endla nsele.” Kambe mukhomi wa matlhari yakwe a nga pfumelanga hikuva a a chava swinene. Hiloko Sawulo a teka banga a titlhava ha rona.+
5 Loko mukhomi wa matlhari ya yena a vona leswaku Sawulo u file,+ na yena a titlhava hi banga rakwe a fa swin’we na yena.
6 Xisweswo Sawulo ni vana vakwe vanharhu ni mukhomi wa matlhari yakwe ku katsa ni malandza yakwe hinkwawo va fa swin’we hi siku rero.+
7 Loko vanhu va Israyele lava a va tshama exifundzheni xa le nkoveni ni le xifundzheni xa Yordani va vona leswaku vavanuna va Israyele va balekile, nileswaku Sawulo ni vana vakwe va file na vona va baleka va siya miti ya vona;+ kutani Vafilista va fika va tshama eka yona.
8 Hi siku leri landzelaka, loko Vafilista va ta ku ta hluvula lava dlayiweke ni ku teka swilo swa vona, va kuma Sawulo ni vana vakwe vanharhu va file eNtshaveni ya Gilbowa.+
9 Hiloko va tsema nhloko yakwe va n’wi hluvula swiambalo swakwe swa nyimpi, kutani va rhumela rito etikweni hinkwaro ra Vafilista ku hangalasa mhaka leyi+ etindlwini* ta swikwembu swa vona+ ni le xikarhi ka vanhu.
10 Kutani va veka swiambalo swakwe swa nyimpi etempeleni ya Axitoreti, ntsumbu wakwe va wu belela ekhumbini ra Beta-xani.+
11 Loko vaaki va le Yabexe-giliyadi+ va twa leswi Vafilista va swi endleke eka Sawulo,
12 tinhenha hinkwato ti suka ti famba vusiku hinkwabyo ti ya teka ntsumbu wa Sawulo ni mitsumbu ya vana vakwe ekhumbini ra Beta-xani. Ti tlhelela na yona eYabexe ti fika ti yi hisa.
13 Hiloko ti teka marhambu ya vona+ ti ma lahla ehansi ka murhi wa mutamarisiki eYabexe,+ kutani ti titsona swakudya masiku ya nkombo.
Tinhlamuselo ta le hansi
^ Kumbe “etitempeleni.”
