Tihosi To Sungula 10:1-29
10 Hosi ya xisati ya le Xeba yi twa xiviko mayelana na Solomoni ni ndlela leyi ndhuma yakwe a yi vangamisa vito ra Yehovha+ ha yona, hiloko yi ta leswaku yi ta n’wi vutisa swivutiso swo tika swinene.+
2 Kutani yi fika eYerusalema yi ri ni malandza ni tindhuna ta yona+ ni tikamela leti rhwaleke mafurha ya balsama+ ni nsuku wo tala swinene ku katsa ni maribye ya risima. Yi fike yi vutisa Solomoni hinkwaswo leswi a yi lava ku swi tiva.
3 Kutani Solomoni a swi hlamula hinkwaswo swivutiso swa yona. A xi kona ni xin’we lexi hosi yi tsandzekeke ku yi hlamula xona.
4 Loko hosi ya xisati ya le Xeba yi vone vutlhari hinkwabyo bya Solomoni+ yindlu leyi a yi akeke,+
5 swakudya etafuleni rakwe,+ ndlela leyi malandza yakwe a ma tshama ha yona etafuleni, matirhelo ya vaphameri vakwe ni maambalelo ya vona, vacheri va swakunwa ni magandzelo yo hisiwa lawa a a ma endla endlwini ya Yehovha nkarhi ni nkarhi, yi namba yi hela matimba hi ku hlamala.
6 Hiloko yi ku eka hosi: “Leswi ndzi swi tweke etikweni ra mina mayelana ni mitirho ya wena ni vutlhari bya wena i ntiyiso.
7 Hambiswiritano, a ndzi swi tshembanga leswi ndzi swi tweke ku fikela loko ndzi ta tivonela hi lawa ya ka mina. Kambe waswivo, leswi ndzi byeriweke swona a swi tati ni xandla. U swi tlula ekule leswi ndzi byeriweke swona hi vutlhari bya wena ni rifuwo ra wena.
8 Va tsaka vavanuna va wena, ma tsaka ni malandza ya wena lama yimaka emahlweni ka wena nkarhi ni nkarhi ma yingisa vutlhari bya wena!+
9 A ku dzunisiwe Yehovha Xikwembu xa wena,+ loyi a ku rhandzeke kutani a ku veka exiluvelweni xa Israyele. Hikwalaho ka rirhandzu ra Yehovha leri nga heriki eka Vaisrayele, u ku vekile tanihi hosi leswaku u avanyisa ni ku fuma hi ndlela leyinene.”
10 Hiloko hosi leyi ya xisati yi nyika hosi titalenta* ta nsuku ta 120 ni mafurha ya balsama+ yo tala ngopfu ni maribye ya risima.+ A ka ha tlhelanga ku tisiwa mafurha yo tala ku fana ni lawa hosi ya xisati ya le Xeba yi ma nyikeke Hosi Solomoni.
11 Swikepe swa Hiramu leswi a swi rhwala nsuku wa le Ofiri+ swi tlhele swi ta ni timhandzi to tala ta mirhi ya algama+ ni maribye ya risima+ ya le Ofiri.
12 Hosi yi tirhise timhandzi ta murhi wa algama ku endla swo tshega yindlu ya Yehovha ni swa yindlu ya hosi,* ni ku endla tiharipa ni switende swa vayimbeleri.+ Timhandzi to tano ta algama a ta ha tlhelanga ti tisiwa kumbe ku voniwa ku ta fikela namuntlha.
13 Nakambe Hosi Solomoni a nyika hosi ya xisati ya le Xeba xin’wana ni xin’wana lexi yi xi naveleke ni lexi yi xi kombeleke, ku engetela eka leswi se a a yi nyike swona hikwalaho ka ku hanana ka yena. Endzhaku ka sweswo, hosi leyi ya xisati yi tlhelela eka rikwavo ni malandza ya yona.+
14 Ntiko wa nsuku lowu Solomoni a a tiseriwa wona hi lembe a ku ri titalenta ta nsuku+ ta 666,
15 ku nga hlayiwi lowu a wu tisiwa hi vaxavisi ni xibalo lexi humaka eka van’wamabindzu ni le ka tihosi hinkwato ta Arabiya ni tindhunankulu ta tiko.
16 Hosi Solomoni a endla switlhangu leswikulu swa 200 hi nsuku lowu pfanganisiweke ni nsimbhi+ (xitlhangu ha xin’we a xi endliwe hi nsuku lowu tikaka tikhilogiramu ta nkombo*)+
17 ni switlhangu leswitsongo swa nsuku lowu pfanganisiweke ni nsimbhi swa 300, (xitlhangu ha xin’we a xi endliwe hi nsuku lowu tikaka tikhilogiramu timbirhi*). Hiloko hosi yi swi veka eNdlwini ya Khwati ra Lebanoni.+
18 Hosi yi tlhele yi endla xiluvelo+ lexikulu hi timhondzo ta tindlopfu yi xi nameka nsuku wa xiyimo xa le henhla.+
19 A ku ri ni switepisi swa tsevu leswi yaka exiluvelweni, endzhaku ka xitulu lexi a ku ri ni xisirhelelo xa xirhendzevutana nakambe a xi ri ni swo tshega mavoko matlhelo hamambirhi, a ku yime swifaniso swa tinghala+ timbirhi ematlhelo ka swo tshega mavoko.
20 A ku vekiwe swifaniso swa tinghala swa 12 ehenhla ka switepisi swa tsevu, xitepisi xin’wana ni xin’wana a xi ri ni nghala hala ni hala emakumu ka xona. A ku nga ri na mfumo wun’wana lowu a wu endle nchumu wo fana ni wolowo.
21 Swibya hinkwaswo swo nwa ha swona swa Hosi Solomoni a swi endliwe hi nsuku ni swibya hinkwaswo swa Yindlu ya Khwati ra Lebanoni+ a swi ri swa nsuku wo tenga. A ku nga ri na xibya lexi endliweke hi silivhere, hikuva silivhere a yi tekiwa yi nga ri nchumu hi nkarhi wa Solomoni.+
22 Hosi a yi ri ni swikepe swa le Taraxixi+ elwandle leswi a swi famba ni swikepe swa Hiramu. Swikepe leswi swa le Taraxixi a swi vuya kan’we endzhaku ka malembe manharhu swi rhwale nsuku, silivhere, timhondzo ta tindlopfu,+ tinkawu ni tiphikoko.
23 Hikwalaho Hosi Solomoni a a tlula tihosi hinkwato ta misava hi rifuwo+ ni vutlhari.+
24 Naswona vanhu vo huma emisaveni hinkwayo a va endzela Solomoni leswaku va ta twa vutlhari byakwe lebyi Xikwembu xi n’wi nyikeke byona.+
25 Lembe ni lembe a va n’wi tisela tinyiko—swilo swa silivhere, swilo swa nsuku, swiambalo, matlhari, mafurha ya balsama, tihanci ni timeyila.
26 Solomoni a ya emahlweni a hlengeleta makalichi ni tihanci;* a a ri ni makalichi ya 1 400 ni tihanci*+ ta 12 000, leswi a swi vekeke emitini ya makalichi ni le kusuhi ni hosi eYerusalema.+
27 Hosi yi endla leswaku silivhere yi tala ngopfu eYerusalema ku fana ni maribye, timhandzi ta mukedari na tona a ti tele ku fana ni mirhi ya makuwa leyi nga eXefela.+
28 Solomoni a a xava tihanci eEgipta, vaxavisi lava tirhelaka hosi a va ti xava ti tele* hi mali yo karhi.+
29 Kalichi yin’we leyi a yi xaviwa eEgipta, a yi xaviwa hi swiphemu swa silivhere swa 600, kasi hanci a yi xaviwa hi swiphemu swa 150; kutani vona a va ti xavisela tihosi hinkwato ta Vaheti+ ni tihosi ta Siriya.
Tinhlamuselo ta le hansi
^ Talenta a yi tika 34,2 wa tikhilogiramu. Vona Xiengetelo B14.
^ Kumbe “yindlu ya vuhosi.”
^ Hi Xiheveru, “tixikele ta 600.” Xikele a yi tika 11,4 wa tigiramu. Vona Xiengetelo B14.
^ Hi Xiheveru, “timayina tinharhu.” Mayina eka Matsalwa ya Xiheveru a yi tika 570 wa tigiramu. Vona Xiengetelo B14.
^ Kumbe “vagadi va tihanci.”
^ Kumbe “vagadi va tihanci.”
^ Kumbexana “eEgipta ni le Kuwe; vaxavisi lava tirhelaka hosi a va ti xava eKuwe,” swi nga endleka ku vulavuriwa hi le Kilikiya.
