Tihosi To Sungula 12:1-33
12 Rehobuwama a ya eXikeme, hikuva tiko hinkwaro ra Israyele a ri te eXikeme+ leswaku ri n’wi endla hosi.+
2 Kuteloko Yerobuwamu n’wana wa Nebati a twa mhaka leyi (a a ha ri eEgipta hikuva a a balekile hikwalaho ko chava Hosi Solomoni naswona a a tshama eEgipta),+
3 hiloko va rhumela vanhu leswaku va n’wi landza. Endzhaku ka sweswo Yerobuwamu ni ntshungu hinkwawo wa Israyele va ya eka Rehobuwama va fika va ku:
4 “Tata wa wena a a hi tikisela vutomi.+ Kambe loko wo hi twela vusiwana u hi vevukisela ndzhwalo lowu tata wa wena a hi rhwexeke wona, hi ta va malandza ya wena.”
5 A va hlamula a ku: “Fambani, mi vuya eka mina hi siku ra vunharhu.” Kutani vanhu va famba.+
6 Endzhaku ka sweswo, Hosi Rehobuwama a vutisa vakulukumba* lava a va tirhela tata wakwe Solomoni loko a ha hanya, a ku: “Xana mi ri yini hi mhaka leyi, ndzi nga va hlamula njhani vanhu lava?”
7 Va n’wi hlamula va ku: “Loko namuntlha wo va nandza wa vanhu lava, u va endlela leswi va swi kombelaka u tlhela u va hlamula kahle, va ta tshama va ri malandza ya wena.”
8 Hambiswiritano, a tshika xitsundzuxo lexi vakulukumba* va n’wi nyikeke xona, a ya vutisa majaha lawa a ma ri tintangha takwe, lawa se a ma n’wi tirhela.+
9 A ma vutisa a ku: “Xana ndzi nga va hlamula njhani vanhu lava, lava ndzi kombeleke va ku, ‘Hi vevukisele ndzhwalo lowu tata wa wena a hi rhwexeke wona’?”
10 Hiloko tintangha takwe ti n’wi hlamula ti ku: “U ta byela vanhu lava ku kombeleke va ku, ‘Tata wa wena a a hi tikisela vutomi, hi kombela u hi vevukisela’; va hlamule u ku, ‘Xintihwana xa mina xi ta bumbula ku tlula masenge ya tatana.
11 Tatana u mi rhwexe ndzhwalo wo tika, kambe mina ndzi ta wu engetela. Tatana a a mi ba hi minkhavi yinene, kambe mina ndzi ta mi ba hi minkhavi ya mitwa.’”
12 Yerobuwamu ni vanhu hinkwavo va tlhelela eka Rehobuwama hi siku ra vunharhu, hilaha hosi yi vuleke hakona yi ku: “Vuyani eka mina hi siku ra vunharhu.”+
13 Kambe hosi yi hlamula vanhu hi tihanyi, yi tshika xitsundzuxo lexi yi xi kumeke eka vakulukumba.*
14 Yi va hlamula hi ku landza xitsundzuxo xa majaha, yi ku: “Tatana u mi rhwexe ndzhwalo wo tika, kambe mina ndzi ta wu engetela. Tatana a a mi ba hi minkhavi yinene kambe mina ndzi ta mi ba hi minkhavi ya mitwa.”
15 Hosi a yi va yingisanga vanhu, mhaka leyi yi ve tano hikwalaho ka Yehovha,+ leswaku ku ta endleka leswi Yehovha a swi byeleke Yerobuwamu n’wana wa Nebati hi ku tirhisa Ahiya+ wa le Xilo.
16 Loko Vaisrayele hinkwavo va vona leswaku hosi a yi va yingisanga, va yi hlamula va ku: “Davhida a hi hosi ya hina, a hi na ndzhaka eka n’wana wa Yese. N’wina Vaisrayele, tlhelelani eka swikwembu swa n’wina! Sala ni yindlu ya wena n’wini, wena Davhida!” Hiloko Vaisrayele va muka.+
17 Kambe Rehobuwama a ya emahlweni a fuma Vaisrayele lava a va tshama emitini ya Yuda.+
18 Kutani Hosi Rehobuwama a rhuma Adorama,+ loyi a a ri ndhuna ya mahlonga, kambe Vaisrayele hinkwavo va n’wi khandla hi maribye, a fa. Kavaloko Hosi Rehobuwama a khandziya kalichi yakwe a balekela eYerusalema.+
19 Ku sukela kwalaho, Vaisrayele va pfukele+ yindlu ya Davhida ku ta fikela namuntlha.
20 Kuteloko Vaisrayele hinkwavo va twa leswaku Yerobuwamu u vuyile, va n’wi vitana laha a va hlengeletane kona, va n’wi endla hosi ya tiko hinkwaro ra Israyele.+ A nga kona loyi a seketeleke yindlu ya Davhida handle ka nyimba ya Yuda.+
21 Loko Rehobuwama a fika eYerusalema, xikan’wekan’we a hlengeleta yindlu hinkwayo ya Yuda ni nyimba ya Benjamini, ku huma tinhenha leti leteriweke* ta 180 000, ti lunghekela ku ya lwa ni vanhu va Israyele leswaku vuhosi byi ta tlhelela eka Rehobuwama n’wana wa Solomoni.+
22 Hiloko rito ra Xikwembu xa ntiyiso ri fika eka Xemaya,+ nandza wa Xikwembu xa ntiyiso, ri ku:
23 “Byela Rehobuwama n’wana wa Solomoni hosi ya Yuda ni yindlu hinkwayo ya Yuda ni ya Benjamini ni vanhu hinkwavo u ku,
24 ‘Yehovha u ri: “Mi nga yi mi ya lwa ni vamakwenu, Vaisrayele. Un’wana ni un’wana wa n’wina a a muke, hikuva leswi endlekeke i ku rhandza ka mina.”’”+ Hiloko va yingisa rito ra Yehovha, va muka hilaha Yehovha a va byeleke hakona.
25 Hiloko Yerobuwamu a pfuxa muti wa Xikeme+ endhawini ya tintshava ya Efrayimi a tshama kona. Ku suka kwalaho a ya pfuxa muti wa Penuwele.+
26 Yerobuwamu a sungula ku ehleketa a ku: “Sweswi mfumo wu ta tlhelela endlwini ya Davhida.+
27 Loko vanhu lava va tshamela ku ya endla magandzelo endlwini ya Yehovha le Yerusalema,+ timbilu ta vona ti ta tlhelela eka hosi ya vona, Hosi Rehobuwama wa Yuda. Kutani va ta ndzi dlaya va tlhelela eka Hosi Rehobuwama wa le Yuda.”
28 Endzhaku ko vutisisa hi mhaka leyi, hosi yi endla marhole mambirhi ya nsuku,+ kutani yi byela vanhu yi ku: “Swa mi tikela ku ya eYerusalema. Hi lexi Xikwembu xa wena, wena Israyele, lexi ku humeseke etikweni ra Egipta.”+
29 Hiloko a veka rin’we eBethele+ lerin’wana a ri veka eDani.+
30 Leswi swi endle leswaku va dyoha,+ vanhu a va ya ni le ka rhole leri nga eDani va ya ri gandzela.
31 U ake ni tiyindlu to gandzela eka tona etindhawini leti tlakukeke, a tlhela a hlawula vaprista eka vanhu lava a va nga ri Valevhi.+
32 Yerobuwamu a tlhela a endla nkhuvo hi n’hweti ya vunhungu hi siku ra vu-15 ra n’hweti, ku fana ni nkhuvo lowu a wu endliwa eYuda.+ U endle magandzelo ealtarini leyi a yi akeke eBethele+ a endlela marhole lawa a ma vumbeke, a tlhela a hlawula vaprista a va veka etindhawini leti tlakukeke leti a ti akeke eBethele.
33 Hi siku ra vu-15 hi n’hweti ya vunhungu, ku nga n’hweti leyi a tihlawuleleke yona, u sungule ku endla magandzelo ealtarini leyi a yi akeke eBethele; a tlhela a endlela Vaisrayele nkhuvo ni ku endla magandzelo ealtarini ku tuvika ni musi.
Tinhlamuselo ta le hansi
^ Kumbe “vakulu.”
^ Kumbe “vakulu.”
^ Kumbe “vakulu.”
^ Hi Xiheveru, “hlawuriweke.”
