Tihosi To Sungula 13:1-34
13 Loko Yerobuwamu a ha yimile ealtarini+ leswaku a endla gandzelo, ku fika munhu wa Xikwembu+ la humaka eYuda a ta eBethele hi ku landza rito ra Yehovha.
2 Hiloko a sandza altari hi ku landza rito ra Yehovha, a ku: “Altari, altari! Yehovha u ri: ‘Waswivo! Ndyangu wa Davhida wu ta velekeriwa n’wana loyi a nga ta vitaniwa Yosiya!+ U ta endla magandzelo ehenhla ka wena hi vaprista va tindhawu leti tlakukeke, lava endlaka magandzelo ehenhla ka wena, naswona u ta hisa marhambu ya vanhu ehenhla ka wena.’”+
3 U endle singita hi siku rero, a ku: “Leri i singita leri Yehovha a ri vuleke: Vona! Altari yi ta hlanhleka hi le xikarhi ni nkuma* lowu nga ehenhla ka yona wu ta hangalasiwa.”
4 Xikan’wekan’we loko hosi yi twa leswi nandza wa Xikwembu xa ntiyiso a swi vuleke loko a sandza altari eBethele, Yerobuwamu a tshambuluta voko a ri ealtarini, a ku: “N’wi khomeni!”+ Hi ku hatlisa voko leri a ri tshambuluteke ri oma,* a tsandzeka ni ku ri tlherisela endzhaku.+
5 Hiloko altari yi hlanhleka hi le xikarhi kutani nkuma wu halaka ealtarini, hi ku landza singita leri nandza wa Xikwembu xa ntiyiso a ri endleke hi rito ra Yehovha.
6 Kutani hosi yi byela nandza wa Xikwembu xa ntiyiso yi ku: “Ndzi kombela u kombela Yehovha Xikwembu xa wena hi ku titsongahata leswaku a ndzi twela vusiwana, u ndzi khongelela leswaku voko ra mina ri hola.”+ Hiloko nandza wa Xikwembu xa ntiyiso a kombela Yehovha hi ku titsongahata leswaku a n’wi twela vusiwana kutani voko ra hosi ri hola.
7 Endzhaku ka sweswo hosi yi byela nandza wa Xikwembu xa ntiyiso yi ku: “A hi muke swin’we u ya dya swakudya, ndzi ta ku nyika ni nyiko.”
8 Kambe nandza wa Xikwembu xa ntiyiso a hlamula hosi a ku: “Hambiloko a wo ndzi nyika hafu ya yindlu ya wena, a ndzi nga ta famba na wena ndzi ya dya xinkwa kumbe ndzi nwa mati endhawini leyi.
9 Hikuva Yehovha u ndzi lerise a ku: ‘U nga tshuki u dya xinkwa kumbe u nwa mati naswona u nga tshuki u muka hi ndlela leyi u teke ha yona.’”
10 Hiloko a tlhela hi ndlela yin’wana, a nga mukanga hi ndlela leyi a teke ha yona eBethele.
11 A ku ri ni muprofeta un’wana la dyuhaleke loyi a a tshama eBethele, vana vakwe va fike va n’wi rungulela swilo hinkwaswo leswi nandza wa Xikwembu xa ntiyiso a swi endleke siku rero eBethele ni leswi a swi byeleke hosi. Loko va heta ku rungulela tata wa vona,
12 tata wa vona a va vutisa, a ku: “Xana u fambe hi ndlela yihi?” Kutani vana vakwe va n’wi komba ndlela leyi nandza wa Xikwembu xa ntiyiso la humaka eYuda a fambeke ha yona.
13 Kutani a ku eka vana vakwe: “Ndzi boheleni mbhongolo.” Hiloko va n’wi bohela yona, kutani a yi gada.
14 A landza nandza wa Xikwembu xa ntiyiso hi le ndzhaku, a n’wi kuma a tshame ehansi ka murhi lowukulu. Kutani a ku eka yena: “Xana hi wena nandza wa Xikwembu xa ntiyiso loyi a humaka eYuda?”+ Yena a ku: “Hi mina.”
15 A ku eka yena: “A hi ye ekaya ka mina u ya dya xinkwa.”
16 Kambe a ku: “A ndzi nge fambi na wena naswona a ndzi nge dyi xinkwa kumbe ku nwa mati swin’we na wena endhawini leyi.
17 Hikuva Yehovha u te, ‘U nga tshuki u dya xinkwa kumbe u nwa mati endhawini yoleyo. U nga tshuki u muka hi ndlela leyi u teke ha yona.’”
18 Hiloko a ku eka yena: “Na mina ndzi muprofeta ku fana na wena, ntsumi yi ndzi byerile hi ku landza rito ra Yehovha yi te, ‘Vuya na yena ekaya ka wena leswaku a ta dya xinkwa ni ku nwa mati.’” (A a n’wi xisa.)
19 Kutani a tlhela na yena leswaku a ya dya xinkwa ni ku nwa mati endlwini yakwe.
20 Loko va ha tshame etafuleni, rito ra Yehovha ri fika eka muprofeta loyi a n’wi tlheriseke,
21 kutani a huwelela nandza wa Xikwembu xa ntiyiso loyi a humaka eYuda, a ku, “Yehovha u ri: ‘Leswi u xandzukeleke xileriso xa Yehovha, u nga xi yingisangiki xileriso lexi Yehovha Xikwembu xa wena a ku leriseke xona,
22 kambe u tlheleke u ya dya xinkwa ni ku nwa mati endhawini leyi u byeriweke leswi ha yona, “U nga tshuki u dya xinkwa kumbe u nwa mati,” ntsumbu wa wena a wu nge lahliwi exilahlweni xa vakokwa wa wena.’”+
23 Endzhaku ka loko nandza wa Xikwembu xa ntiyiso a dye xinkwa ni ku nwa mati, muprofeta loyi a dyuhaleke a n’wi bohela mbhongolo.
24 Hiloko a khoma ndlela, kambe ku humelela nghala endleleni yi n’wi dlaya.+ Ntsumbu wakwe wu wela endleleni, mbhongolo a yi yime etlhelo ka wona; ni nghala a yi yime etlhelo ka ntsumbu.
25 A ku ri ni vavanuna lava a va hundza, lava voneke ntsumbu lowu weleke endleleni ni nghala yi yime etlhelo ka wona. Va fika va vulavula ha wona emutini lowu muprofeta la dyuhaleke a a tshama eka wona.
26 Loko muprofeta loyi a n’wi tlheriseke endleleni a swi twa, u nambe a ku: “I nandza wa Xikwembu xa ntiyiso loyi a nga yingisangiki xileriso xa Yehovha;+ hikwalaho Yehovha u n’wi nyikete eka nghala leswaku yi n’wi phatlulela yi n’wi dlaya, hi ku landza rito ra Yehovha leri a n’wi byeleke rona.”+
27 Kutani a byela vana vakwe, a ku: “Ndzi boheleni mbhongolo.” Hiloko va n’wi bohela yona.
28 Kutani a khoma ndlela a fika a kuma ntsumbu wu wele endleleni, mbhongolo ni nghala swi yime etlhelo ka wona. Nghala a yi nga wu dyanga ntsumbu wolowo hambi ku ri ku phatlulela mbhongolo.
29 Hiloko muprofeta a tlakula ntsumbu wa nandza wa Xikwembu xa ntiyiso a wu tlhandleka ehenhla ka mbhongolo, a tlhela na wona emutini leswaku a ta n’wi rilela ni ku n’wi lahla.
30 Kutani a lahla ntsumbu wakwe exilahlweni xakwe, va hambeta va n’wi rilela, va ku: “I khombo, makwerhu!”
31 Endzhaku ka loko a n’wi lahlile, a byela vana vakwe, a ku: “Loko ndzi fa mi fanele mi ndzi lahla laha nandza wa Xikwembu xa ntiyiso a lahliweke kona. Mi lahla marhambu ya mina etlhelo ka marhambu yakwe.+
32 Leswi Yehovha a swi vuleke hi ku landza rito rakwe mayelana ni altari leyi nga eBethele ni tiyindlu hinkwato leti ku gandzeriwaka eka tona etindhawini leti tlakukeke+ emitini ya Samariya swi ta endleka.”+
33 Hambiloko ku endleke leswi, Yerobuwamu a nga tshikanga ku endla swilo swo biha, kambe u ye emahlweni a hlawula vanhu lava a swi nga faneli leswaku va va vaprista va tindhawu leti tlakukeke to gandzela eka tona.+ Un’wana ni un’wana loyi a tsakela ku va muprista, a a n’wi hlawula, a ku: “A a ve un’wana wa vaprista va tindhawu leti tlakukeke.”+
34 Xidyoho lexi xa ndyangu wa Yerobuwamu+ xi endle leswaku wu lovisiwa.+
Tinhlamuselo ta le hansi
^ Kumbe “nkuma wa mafurha,” ku nga nkuma lowu nga ni mafurha ya magandzelo.
^ Kumbe “khwanyana.”
