Tihosi To Sungula 18:1-46
18 Endzhaku ka nkarhi, hi lembe ra vunharhu,+ rito ra Yehovha ri fika eka Eliya ri ku: “Famba u ya humelela emahlweni ka Akabu hikuva ndzi ta nisa mpfula.”+
2 Kutani Eliya a famba a ya humelela emahlweni ka Akabu hi nkarhi lowu ndlala a yi tinyike matimba+ eSamariya.
3 Hi nkarhi wolowo, Akabu a vitana Obadiya loyi a a ri mulanguteri wa ndyangu wa hosi. (Obadiya a a ri munhu la chavaka Yehovha swinene,
4 kutani hi nkarhi lowu Yezabele+ a a dlayetela vaprofeta va Yehovha, Obadiya u teke vaprofeta va 100 a va fihla ebakweni hi mitlawa ya vanhu va 50, a va nyika xinkwa ni mati.)
5 Akabu a byela Obadiya a ku: “Jikajika etikweni u ya eswihlobyeni ni le mikoveni hinkwayo. Kumbexana hi nga kuma byanyi leswaku hi ta nyika tihanci ni timeyila ti dya leswaku swiharhi swa hina swi nga hi feli hinkwaswo.”
6 Kutani va avelana tiko leri a va ta hundza eka rona. Akabu a famba a ri yexe hi ndlela yin’wana, Obadiya na yena a famba a ri yexe hi ndlela yin’wana.
7 Loko Obadiya a ha ri endleleni, Eliya a ta a ta hlangana na yena. Xikan’wekan’we Obadiya a swi xiya leswaku a ku ri Eliya, hiloko a khinsama xikandza xakwe xi languta ehansi, a ku: “Xana hi wena loyi hosi yanga Eliya?”+
8 A n’wi hlamula a ku: “Hi mina. Famba u ya byela hosi ya wena u ku: ‘Eliya u kona.’”
9 Kambe a ku: “Xana ndzi dyohe yini leswi u lavaka leswaku ndzi dlayiwa hi Akabu?
10 Ndza hlambanya hi Yehovha Xikwembu xa wena lexi hanyaka, a ri kona ni tiko ni rin’we kumbe mfumo laha hosi ya mina yi nga rhumangiki vanhu leswaku va ya ku lava. Endzhaku ka loko va te, ‘A nga kona laha,’ yi endle leswaku mfumo ni tiko swi hlambanya leswaku a wu kumeki.+
11 Sweswi u ri, ‘Famba u ya byela hosi ya wena u ku: “Eliya u kona.”’
12 Loko ndzi hambana na wena, moya wa Yehovha wu ta ku teka+ wu ku yisa laha ndzi nga taka ndzi nga ku tivi, loko ndzi byela Akabu kutani a nga ku kumi u ta ndzi dlaya. Kambe nandza wa wena u chave Yehovha ku sukela evuntshweni byakwe.
13 Xana hosi yanga a yi byeriwanga leswi ndzi swi endleke loko Yezabele a dlaya vaprofeta va Yehovha, ndlela leyi ndzi tumbeteke vaprofeta va 100 va Yehovha hi mitlawa ya vanhu va 50 ebakweni, ndzi hamba ndzi va nyika xinkwa ni mati?+
14 Kambe sweswi wena u ri, ‘Famba u ya byela hosi ya wena u ku: “Eliya u kona.”’ Kunene yi ta ndzi dlaya.”
15 Hambiswiritano, Eliya a ku: “Ndza hlambanya hi Yehovha Xikwembu lexi hanyaka xa mavuthu lexi ndzi xi gandzelaka* leswaku ndzi ta ya ndzi ya humelela eka yena namuntlha.”
16 Hiloko Obadiya a ya eka Akabu a fika a n’wi byela, kutani Akabu a suka a ya hlanganisa Eliya.
17 Xikan’wekan’we loko Akabu a vona Eliya a n’wi vutisa a ku: “Xana hi wena loyi, muvangi wa khombo lerikulu eIsrayele?”
18 Hiloko a n’wi hlamula a ku: “A hi mina ndzi vangelaka Israyele khombo, kambe ri vangiwa hi wena ni ndyangu wa tata wa wena, hi ku tshika milawu ya Yehovha ni hi ku landzela Vabali.+
19 Sweswi rhumela rito leswaku tiko hinkwaro ra Israyele ri hlengeletana eNtshaveni ya Karimeli,+ swin’we ni vaprofeta va Bali va 450 ni vaprofeta lava gandzelaka mhandzi ya Axera* va 400,+ lava dyaka etafuleni ra Yezabele.”
20 Kutani Akabu a rhumela rito eka vanhu hinkwavo va Israyele, a hlengeleta vaprofeta eNtshaveni ya Karimeli.
21 Hiloko Eliya a tshinela emahlweni ka vanhu hinkwavo, a ku: “Xana mi ta khwita hi milenge yimbirhi ku fikela rini?+ Loko Yehovha a ri Xikwembu xa ntiyiso, landzelani yena;+ kambe loko ku ri Bali, landzelani yena.” Kambe a nga hlamuriwanga hi munhu.
22 Kutani Eliya a ku eka vanhu: “Ku lo sala mina ntsena eka vaprofeta va Yehovha,+ kasi vaprofeta va Bali i vavanuna va 450.
23 A va hi nyike swinkuzana swimbirhi, a va tihlawulele xinkuzana xin’we va xi tsemelela va xi tlhandleka ehenhla ka tihunyi kambe va nga lumeki ndzilo. Na mina ndzi ta endla leswi fanaka hi xinkuzana lexin’wana, ndzi xi tlhandleka ehenhla ka tihunyi kambe a ndzi nge lumeki ndzilo.
24 Kutani mi fanele mi vitana vito ra xikwembu xa n’wina+ na mina ndzi ta vitana vito ra Yehovha. Xikwembu lexi nga ta hlamula hi ku rhumela ndzilo, hi xona Xikwembu xa ntiyiso.”+ Hiloko vanhu hinkwavo va hlamula va ku: “Leswi u swi vulaka swi kahle.”
25 Eliya a ya emahlweni a byela vaprofeta va Bali a ku: “Tihlawuleleni xinkuzana mi rhanga mi xi lunghisa, hikuva n’wina mi tele. Endzhaku mi vitana vito ra xikwembu xa n’wina kambe mi nga xi tshiveleli ndzilo.”
26 Hiloko va teka xinkuzana lexi va nyikiweke xona, va xi lulamisa, va ya emahlweni va vitana vito ra Bali ku sukela nimixo ku fikela ninhlikanhi va ku: “Hi hlamule, Bali!” Kambe a ku nga twali rito kumbe nhlamulo.+ Va cinacina va ri karhi va rhendzeleka ni altari leyi va yi akeke.
27 Kutani ninhlikanhi Eliya a sungula ku va hlekula a ku: “Huwelelani hi rito lerikulu! Phela i xikwembu!+ Swi nga endleka u le ku anakanyisiseni kumbe u ye exihambukelweni.* Kumbe u etlele swi lava a pfuxiwa!”
28 A va huwelela hi rito lerikulu, va tixeka hi masavula ni matlhari hi ku ya hi ntolovelo wa vona, ku fikela loko va xiririka ngati.
29 Loko dyambu ri rhenga va ya emahlweni va tikhoma hi ndlela leyi nga tolovelekangiki* kukondza ku fika nkarhi wa ku nyikeriwa ka gandzelo ra mavele ra nimadyambu kambe a ku nga twali rito kumbe nhlamulo; a ku nga ri na loyi a va yingisaka.+
30 Endzhaku ka nkarhi Eliya a byela vanhu hinkwavo, a ku: “Tshinelani haleno.” Hiloko vanhu hinkwavo va tshinela. Kutani a pfuxa altari ya Yehovha leyi a yi hirimuxiwile.+
31 Eliya a teka maribye ya 12 hi ku landza nhlayo ya tinyimba ta vana va Yakobo, loyi Yehovha a nga n’wi byela a ku: “Vito ra wena u ta va Israyele.”+
32 Hi maribye wolawo u ake altari+ hi vito ra Yehovha. Kutani a cela khele ri rhendzela altari, a ri ringana ni ndhawu ya ku byala mbewu leyi ku nga talaka tilitara ta kwalomu ka 15.*
33 Endzhaku ka sweswo a veketela tihunyi, a tsemelela xinkuzana a xi tlhandleka ehenhla ka tihunyi.+ Hiloko a ku: “Tatani makhuwana ya mune lamakulu hi mati, mi ma chela ehenhla ka gandzelo ro hisiwa ni le henhla ka tihunyi.”
34 Kutani a ku: “Chelani nakambe.” Hiloko va tlhela va chela. A tlhela a ku: “Chelani ra vunharhu.” Hiloko va chela ra vunharhu.
35 Mati ma khuluka ma rhendzela altari, khele na rona a ri tata hi mati.
36 Kutani hi nkarhi lowu a ku nyikeriwa gandzelo ra mavele ra nimadyambu,+ muprofeta Eliya a tshinela a ku: “Yehovha, Xikwembu xa Abrahama,+ Isaka+ na Israyele, namuntlha a swi tiviwe leswaku u Xikwembu eIsrayele nileswaku ndzi nandza wa wena nileswaku ndzi endle swilo leswi hinkwaswo hi ku landza rito ra wena.+
37 Ndzi hlamule, Yehovha! Ndzi hlamule leswaku vanhu lava va ta swi tiva leswaku wena Yehovha, u Xikwembu xa ntiyiso nileswaku u lava va tlhelela eka wena.”+
38 Hiloko ndzilo wu wa wu huma eka Yehovha, wu fika wu hisa gandzelo ro hisiwa,+ tihunyi, maribye ni ntshuri, wu tlhela wu hisa ni mati lawa a ma ri ekheleni.+
39 Loko vanhu hinkwavo va swi vona, xikan’wekan’we va khinsama swikandza swa vona swi languta ehansi, va ku: “Yehovha i Xikwembu xa ntiyiso! Yehovha i Xikwembu xa ntiyiso!”
40 Endzhaku ka sweswo Eliya a byela vanhu a ku: “Khomani vaprofeta va Bali! Mi nga tshiki ni un’we wa vona a baleka!” Hiloko va va khoma, Eliya a va yisa enkoveni wa Kixoni,+ a fika a va dlayela kona.+
41 Kutani Eliya a ku eka Akabu: “Tlhandluka u ya dya, u nwa, hikuva ndzi twa mpfumawulo wa mpfula leyikulu.”+
42 Xisweswo Akabu a famba a ya dya ni ku nwa, Eliya a khandziya a ya ehenhla ka ntshava ya Karimeli a fika a khinsama, a nghenisa xikandza xakwe exikarhi ka matsolo.+
43 Hiloko a byela mutirhi wakwe a ku: “Ndzi kombela u khupuka, u languta etlhelo ra lwandle.” Kutani a khupuka a ya languta, ivi a ku: “A ku vonaki nchumu.” Eliya a n’wi byela ka nkombo a ku, “Tlhelela.”
44 Ra vunkombo mutirhi wakwe a ku: “Languta! Ku ni papa leritsongo leri fanaka ni xandla xa munhu ri huma elwandle.” Hiloko a ku: “Famba u ya byela Akabu, u ku, ‘Pana kalichi ya wena! Rhelela leswaku mpfula yi nga ku siveleli!’”
45 Hi nkarhi wolowo ku va ni mapapa ya ntima ni moya, kutani mpfula ya matimba yi sungula ku na.+ Akabu a famba a ya fika eYizriyele.+
46 Kambe voko ra Yehovha ri va ehenhla ka Eliya kutani a teka nguvu yakwe a tiboha xisuti* a tsutsuma a rhangela Akabu ku fika eYizriyele.
Tinhlamuselo ta le hansi
^ Hi Xiheveru, “lexi ndzi yimaka emahlweni ka xona.”
^ Vona Tinhlamuselo.
^ Kumbexana “u endzile.”
^ Kumbe “va tikhoma ku fana ni vaprofeta.”
^ Hi Xiheveru, “tiseya timbirhi.” Seya a yi ringana na 7,33 wa tilitara. Vona Xiengetelo B14.
^ Kumbe “a tikhama masenge.”
