Tikronika To Sungula 10:1-14
-
Ku fa ka Sawulo ni vana vakwe (1-14)
10 Vafilista a va lwa ni Vaisrayele. Kutani vavanuna va Israyele va baleka Vafilista, ku dlayiwa vo tala eNtshaveni ya Gilbowa.+
2 Vafilista va sivelela Sawulo ni vana vakwe, hiloko va dlaya Yonathani, Abinadaba na Maliki-xuwa,+ vana va Sawulo.
3 Nyimpi yi ya yi hisa laha Sawulo a a ri kona, hiloko vacopi va miseve va n’wi kuma, va n’wi vavisa.+
4 Kutani Sawulo a byela mukhomi wa matlhari yakwe a ku: “Hlomula banga ra wena u ndzi dlaya, leswaku vavanuna lava va nga yimbangiki va nga fiki va ndzi endla nsele.”+ Kambe mukhomi wa matlhari yakwe a nga pfumelanga hikuva a a chava swinene. Hiloko Sawulo a teka banga a titlhava ha rona.+
5 Loko mukhomi wa matlhari ya yena a vona leswaku Sawulo u file, na yena a titlhava hi banga rakwe a fa.
6 Xisweswo Sawulo ni vana vakwe vanharhu ni ndyangu wakwe va fa swin’we.+
7 Loko vanhu hinkwavo va Israyele lava a va tshama exifundzheni xa le nkoveni va vona leswaku vanhu hinkwavo va balekile, nileswaku Sawulo ni vana vakwe va file na vona va baleka va siya miti ya vona; kutani Vafilista va fika va tshama eka yona.
8 Hi siku leri landzelaka, loko Vafilista va ta ku ta hluvula lava dlayiweke ni ku teka swilo swa vona, va kuma Sawulo ni vana vakwe va file eNtshaveni ya Gilbowa.+
9 Hiloko va n’wi hluvula swiambalo, va tsema nhloko yakwe va teka ni matlhari yakwe, kutani va rhumela rito etikweni hinkwaro ra Vafilista ku hangalasa mhaka leyi eka swikwembu+ swa vona ni le vanhwini.
10 Kutani va veka swiambalo swakwe swa nyimpi endlwini* ya xikwembu xa vona, xipalapala xakwe va xi belela endlwini ya Dagoni.+
11 Loko vaaki hinkwavo va le Yabexe+ eGiliyadi va twa hinkwaswo leswi Vafilista va swi endleke eka Sawulo,+
12 tinhenha hinkwato ti suka ti ya rhwala ntsumbu wa Sawulo ni mitsumbu ya vana vakwe. Ti yi yisa eYabexe, ivi ti lahla marhambu ya vona ehansi ka murhi lowukulu eYabexe+ kutani ti titsona swakudya masiku ya nkombo.
13 Sawulo u file hikwalaho ka leswi a nga tshembekangiki eka Yehovha, hikuva a nga ri yingisanga rito ra Yehovha+ ni hi leswi a yeke a ya hlahluva eka mungoma*+
14 ematshan’weni yo vutisa Yehovha. Hikwalaho U n’wi dlayile a teka vuhosi a byi nyika Davhida n’wana wa Yese.+
