Tikronika To Sungula 12:1-40
-
Vaseketeri va vuhosi bya Davhida (1-40)
12 Lava i vavanuna lava nga ya eka Davhida eSikilaga+ hi nkarhi lowu a a baleka Sawulo+ n’wana wa Kixi naswona i van’wana va tinhenha leti n’wi pfuneke enyimpini.+
2 A va hlome hi vurha naswona a va kota ku tirhisa voko ra xinene ni ra ximatsi+ va hoxa maribye hi xipelupelu+ kumbe va copa miseve hi vurha. A va ri vamakwavo va Sawulo, eka nyimba ya Benjamini.+
3 Murhangeri wa vona a ku ri Ahiyezere, ku landzela Yowasi, lava a va ri vana va Xemaha wa le Gibiya;+ Yeziyele na Peleti vana va Azamavhete,+ Beraka na Yehu, wa le Anathoti,
4 Iximaya wa le Gibiyoni,+ nhenha ya matimba exikarhi ka lava 30+ naswona a a ri ndhuna ya vona; ku katsa na Yeremiya, Yahaziyele, Yohanani, Yozabadi wa le Gedera,
5 Eluzayi, Yerimoto, Beyaliya, Xemariya, Xefatiya wa le Harifi,
6 Elkana, Ixaya, Azarele, Yowezere na Yaxobuwamu, va ka Kora;+
7 na Yuwela, Zebadiya vana va Yerohamu wa le Gedori.
8 Van’wana va vana va Gadi va ye laha Davhida a a ri kona endhawini leyi swi tikaka ku yi fikelela emananga;+ a va ri tinhenha ta matimba, masocha lama leteriweke ku lwa nyimpi, a va tshama va khome xitlhangu lexikulu ni tlhari, swikandza swa vona a swi fana ni swikandza swa tinghala naswona a va ri ni rivilo ku fana ni timhala loko ti tsutsuma ehenhla ka tintshava.
9 Ezere a a ri ndhuna ya vona, Obadiya a a ri wa vumbirhi, Eliyabu a a ri wa vunharhu,
10 Mixamana a a ri wa vumune, Yeremiya a a ri wa vuntlhanu,
11 Atayi a a ri wa vutsevu, Eliyele a a ri wa vunkombo,
12 Yohanani a a ri wa vunhungu, Elizabada a a ri wa vukaye,
13 Yeremiya a a ri wa vukhume, Makibanayi a a ri wa vu-11.
14 Lava a ku ri vana va Gadi,+ tindhuna ta vuthu. Lontsongo eka vona a a ringana ni masocha ya 100 kasi lonkulu a a ringana ni masocha ya 1 000.+
15 Lava hi vona va peleke nambu wa Yordani hi n’hweti yo sungula hi nkarhi lowu a wu tele naswona va hlongole vanhu hinkwavo lava a va tshama etindhawini leti nga rivala, ku ya fika evuxeni ni le vupeladyambu.
16 Vavanuna van’wana va ka Benjamini ni va ka Yuda na vona va ye laha Davhida a a tumbele kona.+
17 Kutani Davhida a ya eka vona a fika a ku: “Loko mi te eka mina hi leswinene leswaku mi ta ndzi pfuna, hi ta va vanghana. Kambe loko mi tele ku ndzi xenga eka valala va mina hambileswi ndzi nga endlangiki nchumu, onge Xikwembu xa vakokwa wa mina xi nga swi vona, kutani xi mi avanyisa.”+
18 Kutani moya wa Xikwembu wu fika eka Amasayi,+ ndhuna ya tinhenha ta 30, a ku:
“Hi malandza ya wena, Wena Davhida n’wana wa Yese naswona hi ta ku seketela.+
Vana ni ku rhula, wena ni loyi a ku pfunaka,Hikuva Xikwembu xa wena xa ku pfuna.”+
Hiloko Davhida a va amukela kutani a va veka ku va van’wana va tindhuna ta masocha.
19 Van’wana va ka Manase na vona va balekele eka Davhida hi nkarhi lowu a a te ni Vafilista leswaku a ta va pfuna ku lwa na Sawulo; kambe a nga ha va pfunanga hikuva tihosi ta Vafilista+ ti kanerisanile kutani ti n’wi tlherisa ti ku: “A nga hi jikela a seketela hosi yakwe Sawulo kutani hi dlayiwa.”+
20 Loko a fika eSikilaga,+ lava va balekele eka yena va suka eka va ka Manase: Adina, Yozabadi, Yediyayele, Mikayele, Yozabadi, Elihu na Ziletayi, tindhuna ta masocha ya gidi ya va ka Manase.+
21 Va pfune Davhida ku lwa ni vuthu ra vaphangi, hikuva hinkwavo a va ri vavanuna va matimba ni xivindzi+ naswona va ve tindhuna ta masocha.
22 Siku ni siku vanhu a va ya eka Davhida+ leswaku va ta n’wi pfuna, kukondza va tala va fana ni vuthu lerikulu ra masocha, leri fanaka ni ra Xikwembu.+
23 Leyi i nhlayo ya tindhuna leti a ti hlomele nyimpi leti yeke eka Davhida eHebroni,+ ku ya n’wi pfuna ku teka vuhosi eka Sawulo, hi ku landza xileriso xa Yehovha.+
24 Vavanuna va Yuda lava a va tshama va hlomele nyimpi ni ku khoma xitlhangu lexikulu ni tlhari a va ri 6 800.
25 Eka va ka Simiyoni, a ku ri ni masocha lama nga ni xivindzi ya 7 100.
26 Eka Valevhi a ku ri 4 600.
27 Yoyada+ a a ri ndhuna ya vana va Aroni+ naswona a a ri ni masocha ya 3 700
28 na Sadoki+ socha leri nga ni matimba ni xivindzi ku katsa ni tindhuna ta 22 leti a ti huma eka ndyangu wa tata wakwe.
29 Eka va ka Benjamini, vamakwavo va Sawulo,+ a ku ri na 3 000, lava vo tala va vona va nga tshama va rindza yindlu ya Sawulo.
30 Eka va ka Efrayimi a ku ri ni vavanuna lava tivekaka va matimba ni xivindzi emindyangwini ya vatata wa vona va 20 800.
31 Eka hafu ya nyimba ya Manase, a ku hlawuriwe vanhu va 18 000 leswaku va ta veka Davhida ku va hosi.
32 Lava humaka eka nyimba ya Isakara, lava a va kota ku twisisa mikarhi ni ku tiva leswi tiko ra Israyele ri faneleke ri swi endla, a ku ri ni tindhuna ta 200 leti a ti rhangela vamakwavo hinkwavo.
33 Eka va ka Zebuloni, a ku ri ni vanhu va 50 000 lava a va lunghekele nyimpi, hinkwavo ka vona a va hlomele nyimpi naswona a va seketela Davhida hi mbilu hinkwayo.
34 Eka va ka Neftali a ku ri ni tindhuna ta 1 000 naswona a ti ri ni vanhu va 37 000 lava a va khoma xitlhangu lexikulu ni tlhari.
35 Eka va ka Dani, lava a va hlomele nyimpi a va ri 28 600.
36 Naswona eka va ka Axere, lava a va hlomele nyimpi a va ri 40 000.
37 Entsungeni wa Yordani,+ eka va ka Rhuveni, va ka Gadi ni hafu ya nyimba ya Manase, a ku ri ni masocha ya 120 000 lawa a ma ri ni matlhari yo hambanahambana ya nyimpi.
38 Hinkwavo ka vona a va ri masocha lama hlomeleke nyimpi; va te eHebroni va tiyimisele ku veka Davhida ku va hosi ya tiko hinkwaro ra Israyele naswona Vaisrayele lavan’wana hinkwavo na vona a va pfumelelanile ku endla Davhida hosi.+
39 Va tshame na Davhida kwalaho ku ringana masiku manharhu, va dya ni ku nwa hikuva vamakwavo a va va lunghiselerile.
40 Nakambe lava a va tshama ekusuhi na vona ni lava a va ri ekule ku ya fika etikweni ra Isakara, Zebuloni ni ra Neftali, a va tisa swakudya hi timbhongolo, tikamela, timeyila ni tihomu, mapa yo baka, makhekhe lama endliweke hi makuwa lama omisiweke ni makhekhe lama endliweke hi madiriva lama omisiweke, vhinyo, mafurha ni tihomu ni tinyimpfu to tala, hikuva a ku ri ni ntsako eIsrayele.
