Tikronika To Sungula 13:1-14
13 Davhida a kanerisana ni tindhuna ta vanhu va magidi ni ta vanhu va madzana ni murhangeri un’wana ni un’wana.+
2 Kutani Davhida a byela ntshungu hinkwawo wa Vaisrayele a ku: “Loko mi vona swi fanerile naswona swi amukeleka eka Yehovha Xikwembu xa hina, a hi rhumeleni rito eka vamakwerhu lava saleke etindhawini hinkwato ta Israyele ni le ka vaprista ni Valevhi lava nga emitini ya vona+ leyi nga ni madyelo, leswaku va ta va ta hlangana na hina.
3 A hi landzeni Areka+ ya Xikwembu xa hina.” Hikuva a va nga yi khathaleli enkarhini wa Sawulo.+
4 Vanhu hinkwavo lava hlengeletaneke va pfumela ku endla sweswo hikuva a va swi vona swi fanerile.
5 Hiloko Davhida a hlengeleta tiko hinkwaro ra Israyele ku suka enambyeni* wa Egipta ku ya fika eLebo-hamati,*+ leswaku va landza Areka ya Xikwembu xa ntiyiso eKiriyati-yeyarimi.+
6 Kutani Davhida ni tiko hinkwaro ra Israyele va ya eBala+ le Kiriyati-yeyarimi, lowu nga wa Yuda, va landza Areka ya Xikwembu xa ntiyiso Yehovha, loyi a tshamaka ehenhla* ka makerubu,+ laha vito rakwe ri vitaniwaka kona.
7 Hambiswiritano, va rhwala Areka ya Xikwembu xa ntiyiso hi golonyi leyintshwa+ ku suka endlwini ya Abinadaba naswona Uza na Ahiyo a va rhangele golonyi yoleyo.+
8 Davhida ni tiko hinkwaro ra Israyele a va ri karhi va cina va tsakile va cinela Xikwembu xa ntiyiso, va ri karhi va yimbelela, va chaya tiharipa, switende, swingomana,+ swiphambati+ ni timhalamhala.+
9 Kambe loko va fika exivuyeni xa Kidoni, Uza a tshambulutela voko eka Areka a yi khoma hikuva a ku sale katsongo tihomu ti yi wisa.
10 Kutani Yehovha a hlundzukela Uza, A n’wi dlaya hileswi a khomeke Areka,+ u fele kwalaho emahlweni ka Xikwembu.+
11 Kambe Davhida a hlundzuka hileswi Yehovha a dlayeke Uza; kutani ndhawu yoleyo yi thyiwa Perezi-uza* ku ta fikela namuntlha.
12 Davhida a chava Xikwembu xa ntiyiso ngopfu esikwini rero kutani a ku: “Ndzi ta yi tisa njhani Areka ya Xikwembu xa ntiyiso eka mina?”+
13 Davhida a nga ha yi tisanga Areka eMutini wa Davhida laha a a tshama kona, kambe u lerise leswaku yi yisiwa endlwini ya Obede-edomu wa Mugati.
14 Areka ya Xikwembu xa ntiyiso a yi ri endyangwini wa Obede-edomu endlwini yakwe ku ringana tin’hweti tinharhu, kutani Yehovha a ya emahlweni a katekisa ndyangu wa Obede-edomu ni hinkwaswo leswi a a ri na swona.+
Tinhlamuselo ta le hansi
^ Kumbe “ku suka eXihoro.”
^ Kumbe “enyangweni ya Hamati.”
^ Kumbexana “exikarhi.”
^ Leswi vulaka “Ku Hlundzukeriwa Ka Uza.”
