Tikronika To Sungula 14:1-17
14 Hosi Hiramu+ wa le Tiri a rhuma vanhu eka Davhida va famba ni timhandzi ta mukedari, lava tivaka ku tirha hi maribye* ni vanhu lava tivaka ntirho wo vatla leswaku va ya n’wi akela yindlu.*+
2 Davhida a a swi tiva leswaku Yehovha u tiyise vuhosi byakwe eIsrayele,+ hikuva vuhosi byakwe a byi tlakuke ngopfu hikwalaho ka vanhu va Yena, ku nga Vaisrayele.+
3 Davhida a teka vasati lava engetelekeke+ eYerusalema kutani a va ni vana van’wana va majaha ni va vanhwanyana.+
4 Lawa i mavito ya vana lava a velekeriweke vona eYerusalema:+ Xamuwa, Xobabu, Nathani,+ Solomoni,+
5 Ibehari, Elixuwa, Elipalete,
6 Noga, Nefege, Yafiya,
7 Elixama, Beliyada na Elifalete.
8 Loko Vafilista va twa leswaku Davhida u hlawuriwe ku va hosi etikweni hinkwaro ra Israyele,+ Vafilista hinkwavo va ta va ta n’wi hlota.+ Loko Davhida a swi twa, a huma a ya lwa na vona.
9 Vafilista va fika naswona va tshamela ku hlasela eNkoveni wa Refayimi.+
10 Davhida a vutisa Xikwembu a ku: “Xana ndzi nga tlhandluka ndzi ya lwa ni Vafilista? Xana u ta ndzi pfuna leswaku ndzi va hlula?” Yehovha a n’wi hlamula a ku: “Tlhandluka, hikuva kunene ndzi ta ku pfuna leswaku u va hlula.”+
11 Kutani Davhida a ya eBali-perazimi,+ a fika a va dlaya kwalaho. Hiloko Davhida a ku: “Xikwembu xa ntiyiso xi hangalase valala va mina hi voko ra mina, ku fana ni khumbi leri mbundzumuxiweke hi mati.” Hi yona mhaka va thyeke ndhawu yoleyo vito ra Bali-perazimi.*
12 Vafilista va siya swikwembu swa vona kwalaho, kutani Davhida a lerisa leswaku swi hisiwa hi ndzilo.+
13 Hi ku famba ka nkarhi Vafilista va tlhela va hlasela enkoveni.+
14 Davhida a tlhela a vutisa Xikwembu, kutani Xikwembu xa ntiyiso xi ku eka yena: “U nga tlhandluki u va kongoma. Tana hi le ndzhaku ka vona u fika u lwa na vona emahlweni ka swihlahla swa bakha.+
15 Loko u twa swigingi ehenhla ka swihlahla swa bakha, u nga ha yimayimi hikuva Xikwembu xa ntiyiso xi ta va se xi ku rhangerile ku ya hlasela vuthu ra Vafilista.”+
16 Hikwalaho Davhida a endla hilaha Xikwembu xa ntiyiso xi n’wi leriseke hakona,+ va dlaya masocha ya Vafilista ku suka eGibiyoni ku ya fika eGezere.+
17 Ndhuma ya Davhida yi hangalaka hinkwako naswona Yehovha a endla leswaku matiko wolawo ma n’wi chava.+
Tinhlamuselo ta le hansi
^ Kumbe “vaaki va makhumbi.”
^ Kumbe “yindlu ya vuhosi.”
^ Leswi vulaka “Loyi A Kotaka Ku Mbundzumuxa.”
