Tikronika To Sungula 18:1-17
18 Hi ku famba ka nkarhi Davhida a lwa ni Vafilista a va hlula, a teka muti wa Gati+ ni swimitana leswi nga ekusuhi emavokweni ya Vafilista.+
2 Hiloko a hlula Mowabu+ kutani Vamowabu va va malandza ya Davhida va hakela xibalo.+
3 Davhida a hlula Hosi Hadadezera+ wa le Soba+ ekusuhi ni le Hamati+ loyi a a ri endleleni yo ya tiyisa vuhosi byakwe eNambyeni wa Yufrata.+
4 Davhida a n’wi tekela makalichi ya 1 000 ni vagadi va tihanci va 7 000 ni masocha ya 20 000 lama fambaka hi milenge.+ Endzhaku ka sweswo Davhida a tsema misiha ya tihanci to koka makalichi, a siya ta 100 ntsena.+
5 Loko Vasiriya va le Damaska va ta lamulela Hosi Hadadezera wa le Soba, Davhida a dlaya Vasiriya va 22 000.+
6 Kutani Davhida a veka masocha eSiriya wa Damaska, leswi endleke leswaku Vasiriya va va malandza ya Davhida lama hakelaka xibalo. Yehovha a a nyika Davhida matimba yo hlula hinkwako laha a a ya kona.+
7 Ku tlula kwalaho, Davhida a teka switlhangu swa xirhendzevutana swa nsuku eka malandza ya Hadadezera a swi yisa eYerusalema.
8 Davhida a teka koporo yo tala ngopfu eTibihata ni le Kuni, ku nga miti leyi a yi ri ehansi ka Hadadezera. Solomoni u endle thangi* ra mati ra koporo+ ni tiphuphu ni swibya swa koporo ha yona.+
9 Loko Hosi Tohu wa Hamati a twa leswaku Davhida u hlule vuthu hinkwaro ra Hosi Hadadezera+ wa Soba,+
10 hi ku hatlisa a rhuma Hadorama n’wana wakwe eka Hosi Davhida a ya n’wi pfuxela ni ku n’wi khensisa hileswi a lweke a tlhela a hlula Hadadezera, (hikuva Hadadezera a a tala ku lwa na Tohu), naswona u ye ni swilo swa mixaka hinkwayo swa nsuku, silivhere ni koporo.
11 Hosi Davhida a nyika Yehovha swilo leswi+ ku katsa ni silivhere ni nsuku leswi a swi tekeke ematikweni yo hambanahambana: ku suka eka Edomu na Mowabu, ku suka eka Vaamoni,+ Vafilista+ ni Vaamaleke.+
12 Abixayi+ n’wana wa Seruya,+ a dlaya Vaedomu va 18 000 eNkoveni wa Munyu.+
13 A veka masocha eEdomu, kutani Vaedomu hinkwavo va va malandza ya Davhida.+ Yehovha a a endla leswaku Davhida a hlula hinkwako laha a a ya kona.+
14 Davhida a ya emahlweni a fuma tiko hinkwaro ra Israyele,+ a a avanyisa vanhu va yena hinkwavo hi ndlela leyinene.+
15 Yowabu n’wana wa Seruya a a ri ndhuna ya vuthu ra nyimpi,+ Yehoxafati+ n’wana wa Ahiludi a a ri mutsari wa matimu.
16 Sadoki n’wana wa Ahithuba na Ahimeleke n’wana wa Abiyatara a va ri vaprista, Xavhixa a a ri matsalana.
17 Benaya n’wana wa Yoyada a a ri ndhuna ya Vakereti+ ni Vapeleti.+ Vana va Davhida a va ri vaholobyenkulu.
Tinhlamuselo ta le hansi
^ Hi Xiheveru, “Lwandle.”
