Timotiya Wo Sungula 1:1-20
1 Hi mina Pawulo, muapostola wa Kreste Yesu hi xileriso xa Xikwembu Muponisi wa hina ni xa Kreste Yesu ntshembo wa hina,+
2 eka Timotiya,*+ mupfumerikulorhi loyi a fanaka ni n’wana+ eka mina:
Onge u nga va ni musa lowukulu ni tintswalo ni ku rhula leswi humaka eka Xikwembu Tatana na Kreste Yesu Hosi ya hina.
3 Hilaha ndzi ku kombeleke hakona leswaku u tshama eEfesa loko mina ndzi ri kusuhi ni ku ya eMakedoniya, ndza ku kombela ni sweswi leswaku u tshinya vanhu van’wana leswaku va nga dyondzisi dyondzo leyi hambaneke,
4 hambi ku ri ku yingisela mitsheketo*+ ni matimu ya swivongo. Swilo sweswo a swi pfuni nchumu+ kambe swi endla leswaku vanhu va vulavula hi timhaka leti nga pfuniki nchumu, ku ri ni ku vulavula hi swilo leswi humaka eka Xikwembu leswi fambisanaka ni ripfumelo.
5 Xikongomelo xa xileriso lexi hi leswaku hi rhandzana+ hi mbilu yo basa ni ku va ni ripfalo lerinene ni ripfumelo+ leri nga riki na vukanganyisi.
6 Hikwalaho ka leswi va fularheleke swilo leswi, van’wana va sungule ku vulavula swilo leswi nga pfuniki nchumu.+
7 Va lava ku va vadyondzisi+ va nawu kambe a va swi twisisi swilo leswi va swi vulaka kumbe swilo leswi va hisekelaka ku swi dyondzisa.
8 Sweswi ha swi tiva leswaku Nawu i wunene loko munhu a hanya hi wona,
9 hi ku tiva leswaku nawu a wu vekeriwanga munhu loyi a lulameke kambe wu vekeriwe vanhu lava wu tlulaka+ ni vaxandzuki, lava nga xiximiki Xikwembu ni vadyohi, lava nga tshembekiki ni lava thyakeke, lava dlayaka vatata wa vona ni lava dlayaka vamana wa vona, lava dlayaka vanhu van’wana,
10 vanhu lava tikhomaka ku biha hi swa masangu,* vavanuna lava endlaka timhaka ta masangu ni vavanunakulobye, lava tlhakisaka vanhu, vahembi, lava hlambanyaka hi mavunwa ni xilo xin’wana ni xin’wana lexi lwisanaka ni dyondzo leyi pfunaka+
11 leyi fambisanaka ni mahungu lamanene lama vangamaka ya Xikwembu lexi tsakeke, lawa ndzi nyikiweke wona.+
12 Ndzi khensa Kreste Yesu Hosi ya hina, loyi a ndzi nyikeke matimba hikuva u ndzi teke ndzi tshembekile hi ku ndzi nyika ntirho wo kwetsima,+
13 hambileswi khale a ndzi ri musandzi ni muxanisi ni murhuketeri.+ Nilokoswiritano, ndzi kombiwe tintswalo hikuva a ndzi nga ri na vutivi naswona a ndzi nga ri na ripfumelo.
14 Kambe Hosi ya hina yi ndzi kombe musa lowukulu naswona ndzi kume ripfumelo ni rirhandzu eka Kreste Yesu.
15 Mhaka leyi ya tshembeka naswona yi fanele yi amukeriwa hilaha ku heleleke: Kreste Yesu u tile emisaveni a ta ponisa vadyohi.+ Mina ndzi mudyohi lonkulu.+
16 Nilokoswiritano, ndzi kombiwe tintswalo leswaku Kreste Yesu a ta kombisa ku lehisa mbilu kakwe hinkwako eka mina mudyohi lonkulu, a ndzi endla xikombiso eka lava nga ta va ni ripfumelo eka yena leswaku va kuma vutomi lebyi nga heriki.+
17 Sweswi ku xiximiwa ni ku vangama a swi ye eka Hosi ya hilaha ku nga heriki,+ leyi nga onhakiki,+ leyi nga vonakiki,+ leyi nga Xikwembu xi ri xin’we,+ hilaha ku nga heriki. Amen.
18 N’wananga Timotiya, ndzi ku nyika xileriso lexi hikwalaho ka vuprofeta lebyi vuriweke ha wena, leswaku u ta ya emahlweni u lwa nyimpi leyinene+ hikwalaho ka byona,
19 u va ni ripfumelo ni ripfalo lerinene+ leri van’wana va ri lahleke, kutani ripfumelo ra vona ri tshoveka ku fana ni xikepe lexi tshovekeke.
20 Himenayo+ na Alekzanda i van’wana va vona naswona ndzi va nyikete eka Sathana+ leswaku va ta dyondzisiwa hi ku tshinyiwa leswaku va nga sandzi.
Tinhlamuselo ta le hansi
^ Leswi vulaka “Loyi A Xiximaka Xikwembu.”
^ Hi Xigriki, “switori leswi nga riki ntiyiso.”
^ Vona Tinhlamuselo, “Ku tikhoma ko biha hi swa masangu.”
