Timotiya Wo Sungula 3:1-16
3 Mhaka leyi ya tshembeka: Loko munhu a lava ku va mulanguteri+ u navela ntirho lowunene.
2 Hikwalaho mulanguteri u fanele a nga vi na xisolo, a va ni nsati un’we, a endla swilo hi ku ringanisela, a ehleketa kahle,+ a hleleka, a va ni malwandla,+ a fanelekela ku dyondzisa,+
3 a nga vi xidakwa,+ a nga vi ni madzolonga kambe a anakanyela,+ a nga rhandzi timholovo,+ a nga rhandzi mali,+
4 a va wanuna loyi a wu rhangelaka kahle ndyangu wakwe, vana vakwe va n’wi xixima+
5 (hikuva loko munhu a tsandzeka ku rhangela ndyangu wakwe, xana u ta ri rhangela njhani vandlha ra Xikwembu?),
6 ku nga vi munhu loyi a ha ku hundzukaka,+ hi ku chava leswaku a nga tikukumuxa kutani a avanyisiwa hilaha Diyavulosi a avanyisiweke hakona.
7 Ku tlula kwalaho, u fanele a tlhela a va ni ndhuma leyinene eka vanhu va le handle,+ leswaku a nga soriwi hi van’wana kutani a wela entlhan’wini wa Diyavulosi.
8 Malandza ya vutirheli hilaha ku fanaka ma fanele ma xiximeka,* ma nga kanganyisi loko ma vulavula, ma nga tinyiketeli eka vhinyo yo tala, ma nga vi na makwanga yo lava ku vuyeriwa hi ndlela ya vukanganyisi,+
9 ma khomelela eka xihundla xo kwetsima xa ripfumelo hi ripfalo leri baseke.+
10 Nakambe, lava hlawuriwaka ku va malandza ya vutirheli a va rhange va kamberiwa ku vona loko va faneleka kutani loko va nga ri na xisolo+ hi kona va nga vaka malandza ya vutirheli.
11 Hilaha ku fanaka, vavasati va fanele va xiximeka, va nga onhi vanhu vito,+ va endla swilo hi ku ringanisela, va tshembeka eka swilo hinkwaswo.+
12 Nandza wa vutirheli a ve ni nsati un’we, a rhangela vana vakwe ni ndyangu wakwe hi ndlela leyinene.
13 Hikuva vavanuna lava tirhaka hi ndlela leyinene evandlheni va ni ndhuma leyinene naswona va ni ntshunxeko lowukulu wo vulavula hi ripfumelo ra vona eka Kreste Yesu.
14 Ndzi ku tsalela swilo leswi, hambileswi ndzi tshembaka leswaku ndzi ta ta eka wena ku nga ri khale,
15 kambe loko ndzo tshuka ndzi hlwela, u ta tiva ndlela leyi u faneleke u tikhoma ha yona endyangwini wa Xikwembu,+ lowu nga vandlha ra Xikwembu lexi hanyaka, phuphu tlhelo xiseketelo xa ntiyiso.
16 Hakunene, xihundla xo kwetsima xa ku tinyiketela loku eka Xikwembu i xikulu: ‘U humelele a ri munhu,+ a vuriwa loyi a lulameke loko a va munhu wa moya,+ a humelela eka tintsumi,+ ku chumayeriwa hi yena exikarhi ka matiko,+ misava yi n’wi khorwile,+ u amukeriwile ehenhla hi ku vangama.’
Tinhlamuselo ta le hansi
^ Kumbe “tiyimisela.”
