Vakorinto Wo Sungula 3:1-23
3 Vamakwerhu, a ndzi swi kotanga ku vulavula na n’wina tanihi vanhu lava kongomisiwaka hi moya wa Xikwembu,+ kambe ndzi vulavule na n’wina tanihi vanhu va nyama, ku fana ni swihlangi+ eka Kreste.
2 Ndzi mi wundle hi ntswamba, ku nga ri hi swakudya leswi tiyeke, hikuva a mi nga si tiyela. Kahlekahle nisweswi a mi si tiyela,+
3 ma ha ri vanhu va nyama.+ Leswi ka ha riki ni mavondzo ni madzolonga exikarhi ka n’wina, xana a mi vanhu va nyama+ naswona a mi hanyi ku fana na vona?
4 Hikuva loko un’wana a ku, “Mina ndzi wa Pawulo,” un’wanyana a ku, “Mina ndzi wa Apolosi,”+ xana sweswo a hi ku tikhoma ku fana ni vanhu va matiko?
5 Apolosi i mani? Pawulo i mani? Ho va malandza+ ntsena lama endlaka ntirho wa Hosi, lama mi veke vapfumeri hikwalaho ka wona.
6 Mina ndzi byarile,+ Apolosi a cheleta+ kambe Xikwembu hi xona xi swi kurisaka.
7 Loyi a byalaka ni loyi a cheletaka a hi nchumu, kambe i Xikwembu lexi swi kurisaka.+
8 Loyi a byalaka ni loyi a cheletaka va ni xikongomelo xin’we, kambe un’wana ni un’wana u ta kuma hakelo yakwe hi ku ya hi ntirho wakwe.+
9 Hikuva hina hi vatirhikulobye ni Xikwembu. N’wina mi nsimu ya Xikwembu leyi rimiwaka, muako wa Xikwembu.+
10 Hi ku ya hi musa lowukulu wa Xikwembu lowu ndzi nyikiweke wona, ndzi veke masungulo+ tanihi leswi ndzi nga muaki loyi a nga ni vuswikoti* kambe ku aka un’wana ehenhla ka wona. Hambswiritano un’wana ni un’wana a a tshame a languta ndlela leyi a akaka ha yona ehenhla ka wona.
11 Hikuva a ku na munhu loyi a nga vekaka masungulo man’wana handle ka lama vekiweke, ku nga Yesu Kreste.+
12 Loko munhu a aka ehenhla ka masungulo lawa hi nsuku, silivhere, maribye ya risima, timhandzi, byanyi kumbe mahlanga,
13 ntirho wakwe wu ta vonaka leswaku i wa njhani,* hikuva siku ra kona ri ta fika ri ri ni ndzilo,+ lowu nga ta komba leswi ntirho wa un’wana ni un’wana wu nga swona, kutani ndzilo wu ta swi kombisa leswaku ntirho wa kona wu tiye ku fikela kwihi.
14 Loko ndzilo wu nga swi hisi leswi munhu yoloye a akeke masungulo hi swona, u ta katekisiwa;
15 kambe loko ntirho wa munhu yoloye wo tshwa, u ta lahlekeriwa, hambiswiritano yena u ta ponisiwa; nilokoswiritano swi ta fana ni loko a hundze endzilweni.
16 Xana a mi swi tivi leswaku n’wina mi tempele ya Xikwembu+ ni leswaku moya wa Xikwembu wu tshama eka n’wina ke?+
17 Loko munhu a lovisa tempele ya Xikwembu, Xikwembu xi ta n’wi lovisa; hikuva tempele ya Xikwembu ya kwetsima naswona n’wina mi tempele yoleyo.+
18 Ku nga tshuki ku va ni loyi a tikanganyisaka: Loko un’wana exikarhi ka n’wina a ehleketa leswaku u tlharihile eka vanhu va misava leyi, a a ve xiphukuphuku leswaku a ta va wo tlhariha.
19 Hikuva vutlhari bya misava leyi i vuphukuphuku eka Xikwembu, hikuva ku tsariwile: “Xi phasa tintlhari hi makungu ya tona.”+
20 Nakambe ku tsariwile: “Yehovha* wa swi tiva leswaku mianakanyo ya vanhu vo tlhariha a yi pfuni nchumu.”+
21 Hikwalaho ku nga vi na loyi a tibumaka hi vanhu; hikuva swilo hinkwaswo i swa n’wina,
22 hambi i Pawulo kumbe Apolosi kumbe Khefasi*+ kumbe misava kumbe vutomi kumbe rifu kumbe swilo leswi nga kona sweswi kumbe swilo leswa ha taka, swilo hinkwaswo i swa n’wina;
23 n’wina mi va Kreste;+ kasi Kreste yena i wa Xikwembu.
Tinhlamuselo ta le hansi
^ Kumbe “mufambisi wo tlhariha wa mitirho.”
^ Hi Xigriki, “wu ta endliwa wu vonaka.”
^ Vona Xiengetelo A5.
^ Vito ra yena rin’wana i Petro.
