Vakorinto Wo Sungula 6:1-20
6 Xana u kona exikarhi ka n’wina loyi loko a holova ni un’wanyana,+ a nga chaviki ku yisa mhaka ya yena ehubyeni eka vanhu lava nga lulamangiki, ematshan’weni yo yi yisa eka vakwetsimi?
2 Kumbe, xana a mi swi tivi leswaku vakwetsimi va ta avanyisa misava?+ Naswona loko misava yi ta avanyisiwa hi n’wina, xana mi nga tsandzeka ku tenga timhaka leti nga nyawuriki?
3 Xana a mi swi tivi leswaku hi ta avanyisa tintsumi?+ Kutani hikwalaho ka yini hi nga avanyisi swiphiqo leswi tolovelekeke leswi endlekaka sweswi?
4 Loko mi ri ni swiphiqo leswi faneleke ku tengiwa,+ hikwalaho ka yini mi ya eka vanhu lava nga riki swirho swa vandlha leswaku va mi avanyisa?
5 Leswi ndzi swi vulela ku mi khomisa tingana. Xana a ku na munhu wo tlhariha exikarhi ka n’wina loyi a kotaka ku avanyisa exikarhi ka vamakwavo?
6 Ku ri na sweswo, makwavo u mangalela makwavo ehubyeni emahlweni ka lava nga riki vapfumeri!
7 Kunene, swi vula leswaku se mi hlulekile hi leswi mi mangalelanaka. Hikwalaho ka yini mi nga pfumeli ku hoxeriwa?+ Naswona hikwalaho ka yini mi nga pfumeli ku dyeleriwa?
8 Ematshan’weni ya sweswo, mi hoxela van’wana ni ku va dyelela naswona mi swi endla eka vamakwenu!
9 Kumbe, xana a mi swi tivi leswaku vanhu lava nga lulamangiki a va nge yi dyi ndzhaka ya Mfumo wa Xikwembu?+ Mi nga xisiwi.* Vanhu lava tikhomaka ku biha hi swa masangu,*+ vagandzeri va swikwembu,+ vaoswi,+ vavanuna lava endlaka timhaka ta masangu ni vavanunakulobye,*+
10 makhamba, vanhu va makwanga,+ swidakwa,+ varhuketeri ni vadyeleri, a va nge yi dyi ndzhaka ya Mfumo wa Xikwembu.+
11 Kambe hi leswi van’wana va n’wina a mi ri swona. Kambe mi hlantswiwile mi basa;+ mi kwetsimisiwile;+ mi vuriwe lava lulameke+ hi vito ra Hosi Yesu Kreste ni hi moya wa Xikwembu xa hina.
12 Swilo hinkwaswo swa pfumeleleka eka mina kambe a hi swilo hinkwaswo swi pfunaka.+ Swilo hinkwaswo swa pfumeleleka eka mina kambe a xi kona lexi ndzi nga ta pfumela ku lawuriwa hi xona.
13 Swakudya i swa khwiri, ni khwiri i ra swakudya kambe Xikwembu xi ta swi herisa haswimbirhi.+ Miri a hi wa ku tikhoma ku biha hi swa masangu* kambe i wa Hosi+ naswona Hosi i n’wini wa miri.
14 Kambe Xikwembu xi pfuxe Hosi+ naswona xi ta tlhela xi pfuxa na hina eku feni+ hi matimba ya xona.+
15 Xana a mi swi tivi leswaku mimiri ya n’wina i swirho swa Kreste?+ Kutani, xana ndzi fanele ndzi teka swirho swa Kreste ndzi swi hlanganisa ni nghwavava? Nikatsongo!
16 Xana a mi swi tivi leswaku loyi a tihlanganisaka ni nghwavava u va miri wun’we na yona? Hikuva xi ri, “lavambirhi va ta va nyama yin’we.”+
17 Kambe loyi a tihlanganisaka ni Hosi u va ni moya wun’we na yona.+
18 Balekelani ku tikhoma ko biha hi swa masangu!*+ Xidyoho xin’wana ni xin’wana lexi munhu a nga xi endlaka xi le handle ka miri wakwe kambe loyi a hanyaka hi ku tikhoma ko biha hi swa masangu u dyohela miri wakwe.+
19 Xana a mi swi tivi leswaku miri wa n’wina i tempele+ ya moya lowo kwetsima lowu nga endzeni ka n’wina, lowu mi nga na wona lowu humaka eka Xikwembu?+ Nakambe, a mi tifumi,+
20 hikuva mi xaviwile hi nxavo.+ Hikwalaho, vangamisani Xikwembu+ hi miri wa n’wina.+
Tinhlamuselo ta le hansi
^ Kumbe “kanganyisiwi.”
^ Vona Tinhlamuselo, “Ku tikhoma ko biha hi swa masangu.”
^ Laha Xigriki xi tirhisa marito mambirhi yo hambana; marito wolawo ma katsa vavanuna lava etlelaka ni vavanuna van’wana ni vavanuna lava pfumelaka ku endliwa vavasati hi vavanuna van’wana.
^ Hi Xigriki, i por·nei′a. Vona Tinhlamuselo.
^ Hi Xigriki, i por·nei′a. Vona Tinhlamuselo.
