Samuwele Wa Vumbirhi 10:1-19
-
Ku hluriwa ka Vaamoni ni Vasiriya (1-19)
10 Endzhaku ka sweswo, hosi ya Vaamoni+ yi fa, kutani Hanunu n’wana wa yona a va hosi ematshan’weni ya yona.+
2 Hiloko Davhida a ku: “Hanunu n’wana wa Nahaxi ndzi ta n’wi kombisa rirhandzu lerikulu hilaha tata wakwe a ndzi kombiseke rirhandzu lerikulu hakona.” Kutani Davhida a rhumela malandza yakwe leswaku ma ya n’wi chavelela hikwalaho ka rifu ra tata wakwe. Kambe loko malandza ya Davhida ma fika etikweni ra Vaamoni,
3 tihosana ta Vaamoni ti byela Hanunu hosi ya tona ti ku: “Xana u ehleketa leswaku Davhida u xixima tata wa wena hileswi a rhumeke vachaveleri lava eka wena? Xana Davhida a nga rhumelanga malandza yakwe eka wena ku kambela muti lowu leswaku a ta wu hlula?”
4 Hiloko Hanunu a teka malandza ya Davhida a ma byevula hafu ya malepfu+ ya wona a tlhela a tsema swiambalo swa wona hi le xisutini, a ma tshika ma famba.
5 Loko Davhida a byeriwa mhaka leyi, u nambe a rhumela vanhu leswaku va ya va hlanganisa, hikuva vavanuna lava a va khomisiwe tingana swinene; kutani hosi yi ku eka vona: “Tshamani eYeriko+ kukondza malepfu ya n’wina ma kula, hi kona mi nga ta vuya.”
6 Hi ku famba ka nkarhi, Vaamoni va xiya leswaku va vange rivengo lerikulu exikarhi ka vona na Davhida, hiloko Vaamoni va hakela masocha ya 20 000 lama fambaka hi milenge ya Vasiriya va le Beta-rehobo+ ni Vasiriya va le Soba+ leswaku va ta lwa na Davhida; ni hosi ya Maka+ yi ri ni vavanuna va 1 000; ku katsa ni vavanuna va 12 000 lava a va huma le Ixitobo.*+
7 Loko Davhida a twa mhaka leyi, a rhuma Yowabu ni vuthu hinkwaro ku katsa ni tinhenha ta yena ta matimba swinene.+
8 Kutani Vaamoni va huma va lunghekela ku lwa egedeni ya muti, kasi Vasiriya va le Soba ni va le Rehobo swin’we ni masocha ya le Ixitobo* ni ya Maka a va yime va ri voxe erivaleni.
9 Loko Yowabu a vona leswaku valala va n’wi hlasela hi le mahlweni ni le ndzhaku, a hlawula man’wana ya masocha lama nga tinhenha eIsrayele, ma hloma leswaku ma ta lwa ni Vasiriya.+
10 Masocha lama saleke u ma veke ehansi* ka Abixayi+ makwavo, leswaku ma hloma ma ta lwa ni Vaamoni.+
11 Kutani a ku: “Loko Vasiriya va ndzi tsandza, u fanele u ta ndzi pfuna; kambe loko Vaamoni va ku tsandza ndzi ta ta ndzi ta ku pfuna.
12 Hi fanele hi tiya hi va ni xivindzi+ hikwalaho ka vanhu va ka hina ni hikwalaho ka miti ya Xikwembu xa hina, naswona Yehovha u ta endla leswi nga swinene ematihlweni yakwe.”+
13 Hiloko Yowabu ni vanhu vakwe va kongoma Vasiriya va ya lwa na vona, kutani Vasiriya va n’wi baleka.+
14 Loko Vaamoni va vona leswaku Vasiriya va balekile, va baleka emahlweni ka Abixayi va ya emutini. Endzhaku ka sweswo, Yowabu a vuya hi le ku lweni ni Vaamoni a fika eYerusalema.
15 Loko Vasiriya va vona leswaku va hluriwile hi Vaisrayele, va tlhela va hlengeletana.+
16 Kutani Hadadezera+ a rhumela rito leswaku ku vitaniwa Vasiriya lava a va ri exifundzheni lexi nga le kusuhi ni Nambu,*+ va fike eHelama naswona a va rhangeriwe hi Xobaki ndhuna ya vuthu ra Hadadezera.
17 Loko Davhida a vikeriwile, xikan’wekan’we a hlengeleta masocha hinkwawo ya Israyele kutani va pela Yordani va ya eHelama. Kutani Vasiriya va hloma leswaku va hlangana na Davhida va lwa na yena.+
18 Kambe Vasiriya va baleka emahlweni ka Israyele; Davhida a dlaya vachayeri va makalichi va 700 ni vagadi va tihanci va 40 000 va Vasiriya, a tlhava na Xobaki ndhuna ya vuthu ra vona, a fela kwalaho.+
19 Loko tihosi hinkwato, ku nga malandza ya Hadadezera ti vona leswaku Vaisrayele va ti hlurile, ti hatla ti endla ntwanano wa ku rhula ni Vaisrayele kutani ti va malandza ya vona;+ naswona Vasiriya se a va chava ku pfuna Vaamoni.
Tinhlamuselo ta le hansi
^ Kumbe “vavanuna va le Tobo.”
^ Kumbe “vavanuna va le Tobo.”
^ Hi Xiheveru, “evokweni ra.”
^ Ku nga Yufrata.
