Samuwele Wa Vumbirhi 12:1-31
12 Hiloko Yehovha a rhuma Nathani+ eka Davhida. A fika eka yena+ a ku: “Emutini wun’wana a ku ri ni vavanuna vambirhi, un’wana a a fuwile kasi lowun’wana a a ri xisiwana.
2 La fuweke a a ri ni tinyimpfu ni tihomu to tala swinene;+
3 kambe lowa xisiwana a a ri ni xinyimpfana xin’we ntsena xa ntswele lexi a a tixavele xona.+ A xi hlayisa xi kula xi tshama na yena ni vana vakwe va majaha. A xi dya swakudyanyana leswi a ri na swona xi tlhela xi nwa eka xinwelo xakwe naswona a xi etlela exifuveni xakwe. A xi fana ni n’wana wa nhwanyana eka yena.
4 Siku rin’wana wanuna la fuweke a va ni muendzi, kambe a nga pambulanga nyimpfu kumbe homu eka swifuwo swakwe leswaku a dlayela muendzi wakwe. U ye a ya teka xinyimpfana xa wanuna wa xisiwana a xi dlayela muendzi wakwe.”+
5 Hiloko Davhida a hlundzuka ngopfu hikwalaho ka wanuna loyi, kutani a byela Nathani a ku: “Ndza hlambanya hi Yehovha Xikwembu lexi hanyaka+ leswaku wanuna loyi a endleke mhaka yoleyo u faneriwa hi rifu!
6 U fanele a humesa swinyimpfana swa mune a riha lexi a xi dlayeke,+ hikwalaho ka leswi a endleke sweswo ni hileswi a nga vangiki ni ntwelavusiwana.”
7 Kutani Nathani a ku eka Davhida: “Wanuna wa kona hi wena! Yehovha Xikwembu xa Israyele u ri: ‘Mina ndzi ku hlawurile leswaku u va hosi ya Israyele,+ ndzi tlhela ndzi ku ponisa evokweni ra Sawulo.+
8 A ndzi tiyimiserile ku ku nyika ndyangu wa n’wini wa wena+ ndzi veka vasati va n’wini wa wena+ emavokweni ya wena naswona ndzi ku nyike yindlu ya Israyele ni ya Yuda.+ Naswona loko sweswo swi nga ringananga, a ndzi tiyimiserile ni ku ku endlela swo tlula sweswo.+
9 Hikwalaho ka yini u delele rito ra Yehovha hi ku endla leswo biha ematihlweni yakwe? U dlaye Uriya wa Muheti hi banga!+ U tlhela u teka nsati wakwe+ endzhaku ko n’wi dlaya hi banga ra Vaamoni.+
10 Sweswi swi tive leswaku ndyangu wa wena wu ta tshama wu ri karhi wu hlaseriwa hi banga,+ hikuva u ndzi delerile hi ku teka nsati wa Uriya wa Muheti a va nsati wa wena.’
11 Yehovha u vula leswi: ‘Waswivo! Ndzi tisa khombo endlwini ya wena;+ ndzi ta teka vasati va wena u langutile ndzi va nyika wanuna un’wana,*+ kutani yena u ta etlela ni vasati va wena dyambu ri lo hosi!+
12 Hambileswi swilo sweswo u swi endleke exihundleni,+ mina ndzi ta swi endla swi voniwa hi tiko hinkwaro ra Israyele, dyambu ri lo hosi!’”
13 Kutani Davhida a ku eka Nathani: “Ndzi dyohele Yehovha.”+ Nathani a hlamula Davhida a ku: “Yehovha na yena wa ku rivalela.*+ A wu nge fi.+
14 Nilokoswiritano, hikwalaho ka leswi u nga n’wi xiximangiki Yehovha emhakeni leyi, n’wana loyi a ha ku velekiwaka u ta fa hakunene.”
15 Hiloko Nathani a muka.
Kutani Yehovha a hlasela n’wana loyi nsati wa Uriya a n’wi tswaleleke Davhida, a sungula ku vabya.
16 Davhida a khongela hi matimba eka Xikwembu xa ntiyiso hikwalaho ka mufana loyi, a titsona swakudya, a nghena ekamareni rakwe a pavalala ehansi vusiku hinkwabyo.+
17 Kutani vakulukumba va yindlu yakwe va yima ekusuhi na yena va n’wi khongotela leswaku a pfuka, kambe a a nga pfumeli naswona a a ala ni ku dya na vona.
18 Hi siku ra vunkombo n’wana a fa, kambe malandza ya Davhida a ma chava ku n’wi byela leswaku n’wana u file. A ma ku: “Loko n’wana a ha hanya hi vulavule na yena, kambe a nga hi yingisanga. Kutani hi ta n’wi byerisa ku yini leswaku n’wana u file? A nga tshuka a endla swin’wana swo biha.”
19 Loko Davhida a vona malandza yakwe ma ri karhi ma hlevahleva, u swi xiyile leswaku n’wana u file. Davhida a vutisa malandza yakwe a ku: “Xana n’wana u file?” Ma ku: “U file.”
20 Kutani Davhida a suka a yima. A hlamba, a tola mafurha,+ a ambala swiambalo swin’wana, a ya endlwini+ ya Yehovha a fika a khinsama a khongela. Endzhaku ka sweswo a ya endlwini yakwe* a kombela ku tiseriwa swakudya kutani a dya.
21 Malandza yakwe ma n’wi vutisa ma ku: “Hikwalaho ka yini u endla hi ndlela leyi? Loko n’wana a ha hanya, a wu titsona swakudya u tshamela ku rila; kambe hi ku hatlisa loko n’wana a file u pfukile u dya swakudya.”
22 A hlamula a ku: “Loko n’wana a ha hanya a ndzi titsona swakudya+ naswona a ndzi tshamela ku rila hikuva a ndzi ku, ‘Kumbexana Yehovha a nga ndzi twela vusiwana, a tshika n’wana a hanya.’+
23 Leswi se a nga fa, ndza ha titsonela yini swakudya? Xana ndzi nga n’wi vuyisa?+ Mina ndzi nga ya eka yena,+ kambe yena a nge vuyeli eka mina.”+
24 Kutani Davhida a chavelela Bati-xeba+ nsati wakwe. A etlela na yena. Hi ku famba ka nkarhi a veleka n’wana wa jaha loyi a thyiweke Solomoni.*+ Naswona Yehovha a a n’wi rhandza,+
25 kutani a rhumela rito hi ku tirhisa muprofeta Nathani+ leswaku a n’wi thya vito ra Yedidaya,* hikwalaho ka Yehovha.
26 Yowabu a ya emahlweni a hlasela Rhaba+ wa Vaamoni+ kutani a teka ntsindza wa wona.+
27 Hiloko Yowabu a rhumela vanhu eka Davhida, a ku: “Ndzi hlasele Rhaba+ naswona ndzi teke muti wa mati.*
28 Sweswi hlengeleta masocha hinkwawo lama saleke u dzima mixaxa ekusuhi ni muti, u lwa na wona u wu teka. Handle ka swona, ndzi ta wu teka kutani ku ta dzunisiwa mina.”*
29 Hiloko Davhida a hlengeleta masocha hinkwawo a ya eRhaba, a fika a wu hlasela, a wu teka.
30 Kutani a teka harhi leyi a yi ri enhlokweni ya Malikomo. Harhi leyi a yi endliwe hi nsuku naswona a yi tika 34,2 wa tikhilogiramu* naswona a yi khavisiwe hi maribye ya risima, kutani yi vekiwa enhlokweni ya Davhida. U tlhele a teka swilo swo tala+ emutini wolowo.+
31 A teka vanhu lava a va ri emutini wolowo, a va tirhisa ku saha maribye ni ku tirha hi switirho leswi karihaka swa nsimbhi ni swihloka swa nsimbhi ni ku endla switina. Davhida u endle tano emitini hinkwayo ya Vaamoni. Eku heteleleni, Davhida ni masocha yakwe va tlhelela eYerusalema.
Tinhlamuselo ta le hansi
^ Kumbe “warikwenu.”
^ Kumbe “u sula xidyoho xa wena.”
^ Kumbe “endlwini ya vuhosi.”
^ Ri huma eka rito ra Xiheveru leri vulaka “Ku Rhula.”
^ Leswi vulaka “Loyi A Rhandziwaka Hi Yah.”
^ Swi nga endleka ku vulavuriwa hi mphakelo wa mati wa muti wolowo.
^ Hi Xiheveru, “kutani vito ra mina ri ta vitaniwa ehenhla ka wona.”
^ Hi Xiheveru, “talenta.” Vona Xiengetelo B14.
