Samuwele Wa Vumbirhi 15:1-37
15 Endzhaku ka swilo leswi hinkwaswo, Absalomu a tilavela kalichi ni tihanci ni vavanuna va 50 lava a va ta tsutsuma emahlweni ka yena.+
2 Absalomu a a pfuka ka ha ri mpundzu a yima etlhelo ka ndlela leyi yaka egedeni ya muti.+ Loko ku ri ni munhu loyi a a ri ni mhaka leyi a a lava leswaku yi ya tengiwa hi hosi,+ Absalomu a a vitana munhu yoloye a ku: “Xana u huma emutini wihi?” yena a ku: “Nandza wa wena u huma eka yin’wana ya tinyimba ta Israyele.”
3 Absalomu a a ku eka yena: “Vona, mhaka ya wena ya twala, kambe a ku na munhu wa le vuhosini loyi a nga ta ku yingisela.”
4 Absalomu a a ku: “Loko mina a ndzi lo vekiwa ku va muavanyisi etikweni! Munhu un’wana ni un’wana loyi a nga ni mhaka leyi lavaka ku tengiwa, a a ta ta eka mina, naswona a ndzi ta tiyiseka leswaku mhaka yakwe yi avanyisiwa kahle.”
5 Naswona loko munhu a tshinela eka yena a n’wi khinsamela, Absalomu a a n’wi khoma hi voko a tlhela a n’wi tswontswa.+
6 Absalomu a a endla tano eka Vaisrayele hinkwavo lava a va tela ku vika timhaka eka hosi leswaku ti ta avanyisiwa; hi ndlela yoleyo Absalomu a a tshamela ku yiva timbilu ta Vaisrayele.+
7 Endzhaku ka malembe ya mune,* Absalomu a byela hosi a ku: “Ndzi kombela u ndzi pfumelela ndzi ya endla leswi ndzi swi tshembiseke Yehovha le Hebroni.+
8 Hikuva mina nandza wa wena ndzi endle xihlambanyo+ lexi loko ndza ha tshama eGexura+ eSiriya, ndzi ku: ‘Loko Yehovha o ndzi tlherisela eYerusalema, ndzi ta endlela Yehovha gandzelo.’”
9 Hiloko hosi yi ku eka yena: “Famba hi ku rhula.” Endzhaku ka sweswo a suka a yima a ya eHebroni.
10 Kutani Absalomu a rhuma tinhlori etinyimbeni hinkwato ta Israyele, a ku: “Hi ku hatlisa loko mi twa mpfumawulo wa nanga huwelelani mi ku, ‘Absalomu i hosi eHebroni!’”+
11 A ku ri ni vavanuna va 200 lava humaka eYerusalema lava yeke kwalaho na Absalomu; a va rhambiwile naswona va ye va nga tivi nchumu, a va nga swi tivi leswaku ku endleka yini.
12 Nakambe loko a endla magandzelo, Absalomu a vitana Ahitofele+ wa le Gilo, mutsundzuxi+ wa Davhida, a suka emutini wa yena eGilo.+ Xikungu a xi ya xi tiya naswona nhlayo ya vanhu lava a va seketela Absalomu a yi ya yi andza.+
13 Hi ku famba ka nkarhi munhu un’wana a fika eka Davhida a ku: “Vavanuna va Israyele va landzela Absalomu.”
14 Xikan’wekan’we Davhida a byela malandza yakwe hinkwawo lawa a ma ri na yena eYerusalema, a ku: “Sukani mi yima, a hi balekeni+ hikuva a hi nge poni eka Absalomu! Hatlisani, hikuva a nga tshuka a hatlisa a hi kuma, kutani a hi dlaya a tlhela a herisa muti hi banga!”+
15 Malandza ya hosi ma yi byela ma ku: “Hi tiyimisele ku endla xin’wana ni xin’wana lexi hosi yi xi lavaka.”+
16 Kutani hosi yi famba yi landzeriwa hi vandyangu wa yona hinkwavo, kambe yi siye vavasati lavatsongo+ va khume leswaku va ta khathalela yindlu.*
17 Hiloko hosi yi ya emahlweni ni ndlela ya yona yi ri karhi yi landzeriwa hi vanhu hinkwavo, va fika va wisa eBeta-meraka.
18 Malandza ya yona hinkwawo lama a ma famba na yona ni Vakereti hinkwavo, Vapeleti+ ni Vagati,+ vavanuna va 600 lava n’wi landzeleke ku suka eGati,+ a va hundza emahlweni ka hosi yi ri karhi yi va kambela.
19 Kutani hosi yi ku eka Itayi+ wa le Gati: “A swi bohi leswaku u famba na hina. Tlhela u ya tshama ni hosi leyintshwa hikuva u muluveri, u balekile etikweni ra ka n’wina.
20 U fike tolo kunene, a swi bohi leswaku u yingayinga na hina. Tlhela ni vamakwenu naswona onge Yehovha a nga ku komba rirhandzu ni ku tlhela a tshembeka eka wena!”+
21 Kambe Itayi a hlamula hosi a ku: “Ndza hlambanya emahlweni ka Yehovha Xikwembu lexi hanyaka ni le mahlweni ka wena hosi yanga, laha hosi yanga yi nga ta va kona, hambi ku ri eku feni kumbe eku hanyeni, nandza wa wena u ta va kwalaho!”+
22 Loko Davhida a twa sweswo a ku eka Itayi:+ “Famba u tsemakanya.” Kutani Itayi wa le Gati a tsemakanya swin’we ni vanhu vakwe hinkwavo ni vana.
23 Vanhu hinkwavo etikweni a va kalakala loko vanhu lava hinkwavo va ri karhi va tsemakanya, hosi yona a yi yime eNkoveni wa Kedroni;+ vanhu lava hinkwavo a va tsemakanya va khoma ndlela leyi yaka emananga.
24 Sadoki+ na yena a a ri kwalaho ku katsa ni Valevhi+ hinkwavo lava a va rhwale areka+ ya ntwanano ya Xikwembu xa ntiyiso;+ kutani va veka Areka ya Xikwembu xa ntiyiso ehansi; Abiyatara+ na yena a a ri kona loko vanhu hinkwavo va ri karhi va tsemakanya va huma emutini.
25 Kambe hosi yi ku eka Sadoki: “Tlherisela Areka ya Xikwembu xa ntiyiso emutini.+ Loko ndzo kuma tintswalo ematihlweni ya Yehovha, u ta ndzi vuyisa leswaku ndzi ta yi vona ndzi vona ni laha yi tshamaka kona.+
26 Kambe loko o vula a ku, ‘A wu ndzi tsakisi,’ a a ndzi endle leswi a vonaka swi lulamile.”
27 Hosi yi ku eka muprista Sadoki: “Xana a wu muvoni wa swivono?+ Tlhelela emutini hi ku rhula u famba ni n’wana wa wena Ahimazi. Abiyatara na yena a a tlhele ni n’wana wa yena Yonathani.+
28 Vona, ndzi ta rindzanyana etindhawini leti ku tsemakanyiwaka eka tona emananga kukondza mi ndzi byela leswaku ku endleka yini.”+
29 Kutani Sadoki na Abiyatara va teka Areka ya Xikwembu xa ntiyiso va yi tlherisela eYerusalema, va fika va tshama kona.
30 Loko Davhida a ri karhi a khupuka Ntshava ya Mitlhwari+ a a rila loko a tlhandluka; a a tifunengete nhloko naswona a nga ambalanga nchumu emilengeni. Vanhu hinkwavo lava a va ri na yena na vona a va tifunengete tinhloko va rila loko va ri karhi va tlhandluka.
31 Kutani Davhida a byeriwa leswi: “Ahitofele i un’wana wa lava bohaka xikungu+ na Absalomu.”+ Hiloko Davhida a ku: “Yehovha,+ ndzi kombela u pfilunganya switsundzuxo swa Ahitofele!”+
32 Loko Davhida a fika ehenhla ka ntshava laha vanhu a va gandzela Xikwembu kona, u kume Huxayi+ wa Muariki+ a n’wi rindzile, a ambale xiambalo lexi handzukeke naswona a ri ni ritshuri enhlokweni.
33 Hambiswiritano, Davhida a ku eka yena: “Loko wo famba na mina u ta va ndzhwalo eka mina.
34 Kambe loko wo tlhelela emutini kutani u byela Absalomu u ku, ‘Ndzi nandza wa wena, Hosi yanga. A ndzi ri nandza wa tata wa wena, kambe sweswi ndzi nandza wa wena,’+ wena u ta kota ku ndzi pfilunganyela switsundzuxo swa Ahitofele.+
35 Xana Sadoki na Abiyatara lava nga vaprista a va na wena kwale? U fanele u byela muprista Sadoki na muprista Abiyatara xin’wana ni xin’wana lexi u xi twaka xi huma endlwini ya hosi.+
36 Waswivo! Va ni vana va vona vambirhi, Ahimazi+ n’wana wa Sadoki na Yonathani+ n’wana wa Abiyatara, loko wo twa swo karhi u nga rhuma vona leswaku va ta ndzi tivisa.”
37 Kutani Huxayi munghana wa Davhida+ a nghena emutini a kotlana na Absalomu a ri karhi a nghena eYerusalema.
