Samuwele Wa Vumbirhi 16:1-23
16 Loko Davhida a hundzilenyana ehenhla ka ntshava,+ Ziba+ nandza wa Mefiboxete+ a a ri kwalaho a n’wi rindzile a ri ni timbhongolo timbirhi ti rhwale swinkwa swa 200, makhekhe ya 100 lama endliweke hi madiriva lama omisiweke, makhekhe ya 100 ya mihandzu leyi dyiwaka hi ximumu* ni khuwana lerikulu ra vhinyo.+
2 Kutani hosi yi vutisa Ziba yi ku: “Hikwalaho ka yini u te ni swilo leswi?” Ziba a hlamula a ku: “Timbhongolo leti i ta vandyangu wa hosi leswaku va ti gada, swinkwa ni mihandzu leyi dyiwaka hi ximumu i swa majaha leswaku ma dya, vhinyo yona yi ta nwiwa hi lava nga ta karhala emananga.”+
3 Hosi yi ku: “Xana u kwihi ntukulu wa n’wini wa wena?”+ Hiloko Ziba a ku: “U sale eYerusalema, hikuva u te, ‘Namuntlha Vaisrayele va ta ndzi tlherisela vuhosi bya kokwana.’”+
4 Hosi yi byela Ziba yi ku: “Yingisa! Hinkwaswo leswi nga swa Mefiboxete i swa wena.”+ Ziba a hlamula a ku: “Ndza khinsama emahlweni ka wena. Onge u nga ndzi komba musa hosi yanga.”+
5 Loko Hosi Davhida a fika eBahurimi, wanuna un’wana wa ndyangu wa Sawulo loyi a vuriwaka Ximeyi,+ n’wana wa Gera, a huma a rhuketela a ri karhi a tshinela.+
6 A a hoxetela Davhida hi maribye ni malandza hinkwawo ya Hosi Davhida, ni vanhu hinkwavo ku katsa ni tinhenha leti a ti famba exineneni ni le ximatsini xa hosi.
7 Loko Ximeyi a ri karhi a rhuketela a a ku: “Famba, famba, mudlayi ndziwena, munhu loyi a nga pfuniki nchumu!
8 Yehovha wa ku xupula hikwalaho ka nandzu wa ngati wa ndyangu wa Sawulo, loyi u tekeke vuhosi bya yena kambe Yehovha u teka vuhosi a byi nyika Absalomu n’wana wa wena. Sweswi u weriwe hi khombo hikuva u mudlayi!”+
9 Endzhaku ka sweswo Abixayi n’wana wa Seruya+ a ku eka hosi: “Hikwalaho ka yini mbyana leyi, leyi feke+ yi fanele yi rhuketela hosi yanga?+ Ndzi kombela u ndzi pfumelela ndzi ya n’wi tsema nhloko.”+
10 Kambe hosi yi ku: “Mi nghene hi yini n’wina vana va Seruya?+ N’wi tshike a ndzi rhukana+ hikuva Yehovha u n’wi byele a ku,+ ‘Rhukana Davhida!’ Kutani i mani loyi a faneleke a ku, ‘Hikwalaho ka yini u endla leswi?’”
11 Xisweswo Davhida a byela Abixayi ni malandza yakwe hinkwawo a ku: “Loko n’wananga loyi ndzi nga lo n’wi tswala a lava ku ndzi dlaya,+ xana loyi wa ka Benjamini+ u ta tsandza hi yini? N’wi tshikeni a ndzi rhuketela, hikuva u lerisiwe hi Yehovha!
12 Kumbexana Yehovha u ta vona maxangu ya mina,+ kutani Yehovha a ndzi katekisa ematshan’weni ya ndzhukano lowu ndzi langutaneke na wona namuntlha.”+
13 Hiloko Davhida ni vanhu vakwe va tifambela hi ndlela, kambe Ximeyi a a famba hi le tlhelo ka ntshava, a longoloka na Davhida a ri karhi a n’wi rhukana,+ a n’wi hoxa hi maribye a tlhela a n’wi haxa hi ritshuri.
14 Endzhaku ko famba mpfhuka wo lehanyana, hosi ni vanhu hinkwavo lava a va ri na yona va fika laha a va ya kona va karhele, kutani va wisa.
15 Hi nkarhi wolowo, Absalomu ni vavanuna hinkwavo va Israyele va fika eYerusalema naswona Ahitofele+ a a ri na yena.
16 Loko Huxayi+ wa Muariki,+ munghana wa Davhida a fika eka Absalomu, u fike a ku eka Absalomu: “Hosi a yi hanye hi masiku!+ Hosi a yi hanye hi masiku!”
17 Hiloko Absalomu a ku eka Huxayi: “Xana u xavisa munghana wa wena? Hikwalaho ka yini u nga fambanga na yena?”
18 Kutani Huxayi a ku eka Absalomu: “E-e, mina ndzi seketela loyi a hlawuriweke hi Yehovha, vanhu lava ni vavanuna hinkwavo va Israyele. Ndzi ta tshama na yena.
19 Nakambe ndzi ri, Xana ndzi fanele ndzi tirhela mani? Xana a ku fanelanga ku va n’wana wakwe? Ndzi ta ku tirhela hilaha ndzi tirheleke tata wa wena hakona.”+
20 Endzhaku ka sweswo Absalomu a ku eka Ahitofele: “Ndzi nyike xitsundzuxo xa wena.+ Xana hi fanele hi endla yini?”
21 Hiloko Ahitofele a ku eka Absalomu: “Etlela ni vasati lavatsongo+ va tata wa wena, lava a va siyeke leswaku va khathalela yindlu.*+ Vaisrayele hinkwavo va ta swi twa leswaku u tiendle nala lonkulu wa tata wa wena, kutani lava ku seketelaka va ta tiya nhlana.”
22 Kutani va endlela Absalomu tende ehenhla ka lwangu,+ kutani Absalomu a etlela ni vasati lavatsongo va tata wakwe,+ Vaisrayele hinkwavo va ri karhi va swi vona.+
23 Emasikwini wolawo switsundzuxo swa Ahitofele+ a swi tekiwa ku fana ni rito ra Xikwembu xa ntiyiso. Hi yona ndlela leyi Davhida na Absalomu a va swi teka swi ri swa nkoka ha yona switsundzuxo swa Ahitofele.
Tinhlamuselo ta le hansi
^ Ngopfungopfu makuwa kumbexana ni mihandzu ya micindzu.
^ Kumbe “yindlu ya vuhosi.”
