Samuwele Wa Vumbirhi 2:1-32
2 Endzhaku ka sweswo Davhida a vutisa Yehovha,+ a ku: “Xana ndzi nga tlhandlukela eka wun’wana wa miti ya Yuda?” Yehovha a ku eka yena: “Tlhandluka.” Davhida a ya emahlweni a vutisa a ku: “Ndzi tlhandlukela kwihi?” A hlamula a ku: “EHebroni.”+
2 Hikwalaho Davhida a tlhandluka ni vasati vakwe vambirhi, Ahinowama+ wa le Yizriyele na Abigayele+ nsati wa mufi Nabali wa le Karimeli.
3 Davhida u fambe ni vavanuna lava a a ri na vona,+ un’wana ni un’wana a ri ni ndyangu wakwe, va fika va tshama emitini leyi nga eHebroni.
4 Kutani vavanuna va Yuda va fika va chela Davhida mafurha a va hosi ya yindlu ya Yuda.+
Va byela Davhida va ku: “Vavanuna va Yabexe-giliyadi hi vona lava lahleke Sawulo.”
5 Kutani Davhida a rhumela vanhu eka vavanuna va Yabexe-giliyadi a ku: “Onge Yehovha a nga mi katekisa hikuva mi kombe hosi ya n’wina Sawulo rirhandzu hi ku n’wi lahla.+
6 Yehovha a a mi kombe rirhandzu ni ku tshembeka. Na mina ndzi ta mi komba musa hikwalaho ka xiendlo lexi lexinene.+
7 Tiyani mi va ni xivindzi hikuva hosi ya n’wina Sawulo u file naswona yindlu ya Yuda yi ndzi hlawurile leswaku ndzi va hosi ya yona.”
8 Kambe Abinere+ n’wana wa Nere, ndhuna ya vuthu ra Sawulo, a teka Ixi-boxeti+ n’wana wa Sawulo a n’wi perisela eMahanayimi+
9 a n’wi endla hosi ya Giliyadi,+ ya Vaaxuri, ya Yizriyele,+ ya Efrayimi,+ ya Benjamini ni ya tiko hinkwaro ra Israyele.
10 Ixi-boxeti n’wana wa Sawulo a a ri ni malembe ya 40 loko a va hosi eIsrayele naswona u fume malembe mambirhi. Kambe yindlu ya Yuda a yi seketela Davhida.+
11 Nkarhi lowu Davhida a veke hosi eHebroni a fuma yindlu ya Yuda a ku ri malembe ya nkombo ni tin’hweti ta tsevu.+
12 Siku rin’wana Abinere n’wana wa Nere ni malandza ya Ixi-boxeti n’wana wa Sawulo va suka eMahanayimi+ va ya eGibiyoni.+
13 Yowabu+ n’wana wa Seruya+ ni malandza ya Davhida na vona va humile va ya hlangana na vona exidziveni xa Gibiyoni; ntlawa wun’we a wu tshame etlhelo leri ra xidziva, kasi ntlawa lowun’wana a wu tshame etlhelo lerin’wana ra xidziva.
14 Eku heteleleni Abinere a ku eka Yowabu: “A hi qege majaha hi vona leswaku ku ta hlula mani.” Yowabu a ku: “A va lwe.”
15 Kutani va tsemakanya va ri nhlayo leyi pimiweke, 12 eka va ka Benjamini na Ixi-boxeti n’wana wa Sawulo na 12 eka malandza ya Davhida.
16 Va khomana hi tinhloko, va tlhavana matsheve hi mabanga, kutani hinkwavo va wa va fa. Hikwalaho ndhawu yoleyo leyi nga eGibiyoni yi thyiwa Helikati-hasurima.
17 Nyimpi leyi sukeke siku rero a yi ri yikulu ngopfu, kutani Abinere ni vavanuna va Israyele va hetelela va hluriwile hi malandza ya Davhida.
18 Vana vanharhu va Seruya+ a va ri kona kwalaho, Yowabu,+ Abixayi+ na Asahele;+ Asahele a a tsutsuma ku fana ni mhala enhoveni.
19 Asahele a hlongorisa Abinere, a n’wi landza hi ku kongoma a nga tlheli.
20 Loko Abinere a languta endzhaku, a vutisa a ku, “Xana hi wena Asahele?” yena a ku, “Hi mina.”
21 Abinere a ku eka yena: “Tshika ku ndzi hlongorisa, khoma un’wana wa majaha u teka xin’wana ni xin’wana eka yena.” Kambe Asahele a nga tshikanga ku n’wi hlongorisa.
22 Hiloko Abinere a tlhela a ku: “Tshika ku ndzi hlongorisa, hikuva ndzi ta kala ndzi ku dlaya. Loko u file, mina ni makwenu Yowabu hi ta sala hi langutana njhani?”
23 Kambe Asahele a ala ku tlhela, hiloko Abinere a n’wi tlhava ekhwirini hi le ndzhaku ka tlhari+ kutani ri ya huma hi le nhlaneni; a wela kwalaho a fa. Hinkwavo lava a va fika endhawini leyi Asahele a weke ni ku fela eka yona a va fika va yimanyana.
24 Kutani Yowabu na Abixayi va hlongorisa Abinere. Loko dyambu ri pela a va fika exintshabyanini xa Ama, lexi langutaneke na Giya endleleni leyi yaka emananga ya Gibiyoni.
25 Kwalaho va ka Benjamini va hlengeletana endzhaku ka Abinere, va va ntlawa wun’we va yima ehenhla ka xintshabyana xo karhi.
26 Kutani Abinere a huwelela Yowabu a ku: “Xana hi ta dlayana ku fikela rini? Xana a wu swi tivi leswaku makumu ya kona ku ta va nhlomulo? Kasi u ta va byela rini vanhu lava leswaku va tshika ku hlongorisa vamakwavo?”
27 Hiloko Yowabu a ku: “Ndza hlambanya hi Xikwembu xa ntiyiso lexi hanyaka leswaku loko a wu nga vulavulanga, vanhu lava a va ta hlongorisa vamakwavo kukondza ku va mundzuku nimixo.”
28 Kutani Yowabu a ba nanga, vanhu vakwe va tshika ku hlongorisa Israyele, nyimpi ya kona yi herisa xisweswo.
29 Abinere ni vavanuna lava a a ri na vona va fambe vusiku byebyo hinkwabyo va tsemakanya Araba,+ va pela Nambu wa Yordani va famba enkoveni wolowo kukondza va ya fika eMahanayimi.+
30 Loko Yowabu a tshike ku hlongorisa Abinere, a hlengeleta vanhu hinkwavo. Eka malandza ya Davhida a ku kayivela 19 loko ku nga hlayiwi na Asahele.
31 Kambe malandza ya Davhida ma hlule va ka Benjamini ni vanhu va Abinere, eka vona ku fe vavanuna va 360.
32 Ma teka Asahele+ ma ya n’wi lahla esirheni ra tata wakwe leri nga eBetlehema.+ Kutani Yowabu ni vanhu vakwe va famba vusiku hinkwabyo, va fika eHebroni+ loko ri xa.
