Samuwele Wa Vumbirhi 20:1-26
20 A ku ri ni munhu loyi a a ri xipandza nhloko, vito ra yena a ku ri Xeba+ n’wana wa Bikiri, wa ka Benjamini. A ba nanga+ a ku: “Davhida a hi hosi ya hina, a hi na ndzhaka eka n’wana wa Yese.+ Wena Israyele,+ un’wana ni un’wana a a tlhelele eka swikwembu swakwe!”*
2 Hiloko vavanuna hinkwavo va Israyele va tshika ku landzela Davhida va landzela Xeba n’wana wa Bikiri;+ kambe vavanuna va Yuda va namarhela hosi ya vona ku suka eYordani ku ya eYerusalema.+
3 Loko Davhida a fika endlwini* yakwe eYerusalema,+ a teka vasati va yena lavatsongo va khume lava a a va siye leswaku va khathalela yindlu,+ a va veka endlwini leyi a yi rindziwa. A a va nyika swakudya kambe a nga etlelanga na vona.+ Va tshame endlwini yoleyo kukondza va fa, a va hanya onge i tinoni hambileswi nuna wa vona a ha hanya.
4 Kutani hosi yi ku eka Amasa:+ “Hlengeleta vavanuna va Yuda ku nga si hela masiku manharhu va ta eka mina, na wena u fanele u va kona.”
5 Hiloko Amasa a famba a ya hlengeleta vavanuna va Yuda, kambe a fika endzhaku ka nkarhi lowu a a vekeriwe wona.
6 Kutani Davhida a ku eka Abixayi:+ “Xeba+ n’wana wa Bikiri u ta hi karhata ku tlula Absalomu.+ Teka malandza ya mina* u n’wi hlongorisa leswaku a nga tshuki a kuma miti leyi biyeriweke ivi a hi balekela.”
7 Hiloko vanhu va Yowabu,+ Vakereti, Vapeleti+ ni tinhenha hinkwato va n’wi hlongorisa; va huma eYerusalema va hlongorisa Xeba n’wana wa Bikiri.
8 Loko va ri ekusuhi ni ribye lerikulu leri nga eGibiyoni,+ Amasa+ a ta a va hlanganisa. Yowabu a a ambale swiambalo swakwe swa nyimpi naswona a a tlhome banga enkwameni wa rona lowu a a wu bohele emasengeni. Loko a tshinela, banga ri wa.
9 Yowabu a ku eka Amasa: “Xana u pfukile makwerhu?” Hiloko Yowabu a khoma malepfu ya Amasa hi voko ra xinene onge hi loko a lava ku n’wi tswontswa.
10 Amasa a a nga ri voni banga leri a ri ri evokweni ra Yowabu, hiloko Yowabu a n’wi tlhava ekhwirini+ ha rona, kutani marhumbu yakwe ma wela ehansi. U n’wi tlhave kan’we ntsena. Kutani Yowabu na Abixayi makwavo, va ya emahlweni va hlongorisa Xeba n’wana wa Bikiri.
11 Un’wana wa malandza ya Yowabu a yima etlhelo ka yena, a ku: “Un’wana ni un’wana loyi a seketelaka Yowabu ni loyi a nga nandza wa Davhida, a a landzele Yowabu!”
12 Nkarhi wolowo hinkwawo Amasa a a vumbuluka engatini yakwe exikarhi ka ndlela. Loko nandza loyi a vona leswaku vanhu hinkwavo a va yima loko va fika kwalaho, a susa Amasa endleleni a n’wi susumetela enhoveni. Kutani a n’wi funengeta hi nguvu, hikuva a a vona leswaku lava fikaka eka yena a va yima va nga fambi.
13 Loko a n’wi susile endleleni, vavanuna hinkwavo va landzela Yowabu, va hlongorisa Xeba+ n’wana wa Bikiri.
14 Xeba u hundze tinyimba hinkwato ta Israyele a ya fika eAvele wa Beta-maka.+ Va ka Bikiri na vona va hlengeletana kutani va n’wi landzela.
15 Yowabu ni vanhu va yena va fike va n’wi rhendzela va lwa na yena eAvele wa Beta-maka kutani va aka khumbi leri nga ta va pfuna ku hlasela muti wolowo. Vanhu lava a va ri na Yowabu va sungula ku cela khumbi leswaku ri ta wa.
16 Kutani wansati un’wana wo tlhariha a huwelela a ri emutini, a ku: “Vavanuna, yingisani, yingisani! Ndzi kombela mi byela Yowabu mi ku, ‘Tana haleni, ndzi lava ku vulavula na wena.’”
17 Hiloko a ya ekusuhi na yena, kutani wansati a ku: “Xana hi wena Yowabu?” Yena a ku: “Hi mina.” Wansati a ku eka yena: “Yingisa marito ya nandza wa wena.” Yena a ku: “Ndzi yingisile.”
18 Wansati a ku: “Khale a va hamba va ku, ‘A va vutise eAvele, kutani wolawo a ku ri makumu ya mhaka.’
19 Ndzi muyimeri wa vanhu va ku rhula ni vo tshembeka va Israyele. U lava ku herisa muti lowu fanaka ni manana eIsrayele. Hikwalaho ka yini u fanele u lovisa* ndzhaka ya Yehovha?”+
20 Yowabu a hlamula a ku: “A ndzi nge swi endli sweswo, a ndzi nge wu lovisi.
21 Xexo a hi xona xikongomelo xa mina. Mhaka hileswaku wanuna loyi a vuriwaka Xeba+ n’wana wa Bikiri loyi a humaka endhawini ya tintshava ya Efrayimi,+ u xandzukele* Hosi Davhida. Loko mo nyiketa wanuna loyi ntsena, ndzi ta suka emutini lowu.” Hiloko wansati loyi a ku eka Yowabu: “Waswivo! Nhloko yakwe yi ta hoxiwa eka wena hi le khumbini!”
22 Xikan’wekan’we wansati loyi wo tlhariha a ya eka vanhu hinkwavo, kutani va tsema nhloko ya Xeba n’wana wa Bikiri, va yi hoxela Yowabu. Endzhaku ka sweswo Yowabu a ba nanga, hiloko va suka emutini, un’wana ni un’wana a muka;+ Yowabu a tlhelela eka hosi eYerusalema.
23 Wanuna loyi Yowabu a a ri ndhuna ya masocha hinkwawo ya Israyele;+ Benaya+ n’wana wa Yoyada+ a a lawula Vakereti ni Vapeleti.+
24 Adoramu+ a a ri ndhuna ya lava hosi a yi lerise leswaku va yi tirhela; Yehoxafati+ n’wana wa Ahiludi a a ri mutsari wa matimu.
25 Xevha a a ri matsalana; Sadoki+ na Abiyatara+ a va ri vaprista.
26 Ira wa Muyayiri na yena u ve ndhunankulu* ya Davhida.
Tinhlamuselo ta le hansi
^ Kumbexana “emitsongeni yakwe.”
^ Kumbe “endlwini ya vuhosi.”
^ Hi Xiheveru, “malandza ya hosi ya wena.”
^ Hi Xiheveru, “mita.”
^ Hi Xiheveru, “u tlakuse voko ku lwa na.”
^ Hi Xiheveru, “u ve muprista.”
