Samuwele Wa Vumbirhi 24:1-25
24 Hiloko vukarhi bya Yehovha byi tlhela byi pfurhela Israyele,+ endzhaku ka loko un’wana a kucetele Davhida, a ku: “Famba u ya hlaya+ vanhu va Israyele ni va Yuda+ hinkwavo.”
2 Kutani hosi yi byela Yowabu+ ndhuna ya masocha, loyi a a ri na yona, yi ku: “Ndzi kombela u ya eka tinyimba hinkwato ta Israyele, ku sukela eDani ku ya fika eBera-xeba,+ u ya hlayela vanhu ndzi ta tiva leswaku i vangani.”
3 Kambe Yowabu a ku eka hosi: “Onge Yehovha Xikwembu xa wena a nga andzisa vanhu ka dzana naswona onge matihlo ya hosi yanga ma nga swi vona, kambe hikwalaho ka yini hosi yanga yi lava ku endla nchumu wo tano?”
4 Kambe hosi yi hlula Yowabu ni tindhuna ta masocha hi marito. Hiloko Yowabu ni tindhuna ta masocha va suka emahlweni ka hosi va ya hlaya vanhu va Israyele.+
5 Va pela Yordani va dzima mixaxa eArowere+ exineneni* xa muti lowu nga exikarhi ka nkova, kutani va ya etlhelweni ra va ka Gadi ni ra Yazere.+
6 Endzhaku ka sweswo, va ya eGiliyadi+ ni le tikweni ra Tahatimi-hodaxi ku ya fika ni le Dani-yani va jika va ya eSidoni.+
7 Hiloko va ya ni le ndlwini ya vuhosi eTiri+ ni le mitini hinkwayo ya Vahivhi+ ni ya Vakanana, va hetelela eNegebu+ wa Yuda le Bera-xeba.+
8 Xisweswo va fambe tiko hinkwaro va tlhela va vuya eYerusalema endzhaku ka tin’hweti ta kaye ni masiku ya 20.
9 Kutani Yowabu a nyika hosi nhlayo ya vanhu lava a va hlayeke. EIsrayele a ku ri ni tinhenha leti hlomeke hi mabanga ta 800 000, kasi vavanuna va le Yuda a va ri 500 000.+
10 Kambe Davhida a sungula ku kingindziwa hi ripfalo+ endzhaku ka loko a hlaye vanhu. Kutani Davhida a byela Yehovha a ku: “Ndzi dyohe+ ngopfu hi ku endla leswi. Yehovha, ndzi kombela u ndzi rivalela+ hikuva leswi ndzi swi endleke i vuphukuphuku lebyikulu.”+
11 Loko Davhida a pfuka nimixo, Yehovha a byela muprofeta Gadi+ loyi a a ri muvoni wa swivono swa Davhida, a ku:
12 “Famba u ya byela Davhida u ku, ‘Yehovha u ri: “Ndzi veka swigwevo swinharhu emahlweni ka wena. Tihlawulele xin’we lexi ndzi nga ta ku ba ha xona.”’”+
13 Hiloko Gadi a fika eka Davhida a ku: “Xana u lava ku weriwa hi malembe ya nkombo ya ndlala etikweni ra wena?+ Kumbe tin’hweti tinharhu u ri karhi u hlongorisiwa hi valala va wena?+ Kumbe masiku manharhu ya ntungu etikweni ra wena?+ Ehleketisisa kahle hi mhaka leyi leswaku ndzi ta hlamula Loyi a ndzi rhumeke.”
14 Hiloko Davhida a hlamula Gadi a ku: “Swa ndzi tikela swinene. Ndzi kombela leswaku hi wela evokweni ra Yehovha,+ hikuva u ni musa swinene;+ kambe u nga ndzi tshiki ndzi wela emavokweni ya vanhu.”+
15 Hiloko Yehovha a vanga ntungu+ eIsrayele ku sukela nimixo ku ya fika enkarhini lowu vekiweke, lerova ku fa+ vanhu va 70 000 ku suka eDani ku ya eBera-xeba.+
16 Loko ntsumi yi tlakusa voko yi lava ku lovisa Yerusalema, Yehovha a tisola hikwalaho ka khombo leri,+ kutani a byela ntsumi leyi a yi lovisa vanhu a ku: “Swi ringene! Ehlisa voko ra wena.” Ntsumi ya Yehovha a yi ri ekusuhi ni xivuya* xa Arawuna+ wa Muyebusi.+
17 Loko Davhida a vona ntsumi leyi a yi dlayetela vanhu a byela Yehovha, a ku: “Hi mina loyi a dyoheke, hi mina loyi a endleke xihoxo; kambe xana tinyimpfu+ leti ti fela yini? Ndzi kombela u xupula mina ni ndyangu wa tatana.”+
18 Hiloko Gadi a fika eka Davhida hi siku rero a ku eka yena: “Tlhandluka u ya akela Yehovha altari exivuyeni* xa Arawuna wa Muyebusi.”+
19 Kutani Davhida a tlhandluka hilaha Gadi a n’wi byeleke hakona, hi ku landza xileriso xa Yehovha.
20 Loko Arawuna a languta kutani a vona hosi ni malandza ya yona va ri karhi va ta eka yena, xikan’wekan’we a huma a khinsama emahlweni ka hosi, xikandza xakwe xi langute ehansi.
21 Arawuna a ku: “Hikwalaho ka yini hosi yanga yi ta eka mina nandza wa yona?” Davhida a hlamula a ku: “Ndzi tele ku ta xava xivuya* xa wena ndzi ta akela Yehovha altari, leswaku ntungu wu ta hela.”+
22 Kambe Arawuna a ku eka Davhida: “Hosi yanga a yi xi teke yi endla leswi yi vonaka swi fanerile.* Hi leti tihomu leti u nga endlaka ha tona gandzelo ro hisiwa, xileyi xo hula mavele ni majoko ya tihomu hi lawa, u ta tshivela ndzilo ha swona.
23 Hinkwaswo leswi, wena hosi, Arawuna u swi nyika hosi.” Arawuna a tlhela a ku eka hosi: “Yehovha Xikwembu xa wena a a ku katekise.”
24 Kambe hosi yi hlamula Arawuna yi ku: “E-e, u fanele u ndzi xavisela swona. A ndzi nge endleli Yehovha Xikwembu xa mina magandzelo yo hisiwa hi swilo leswi ndzi nga swi xavangiki.” Hiloko Davhida a xava xivuya* ni tihomu hi swiphemu* swa silivhere swa 50.+
25 Kutani Davhida a akela Yehovha altari+ kwalaho, a endla magandzelo yo hisiwa ni magandzelo yo kombela ku rhula. Yehovha a amukela magandzelo wolawo,+ a rivalela tiko kutani ntungu wu hela eIsrayele.
Tinhlamuselo ta le hansi
^ Kumbe “edzongeni.”
^ Ku nga ndhawu leyi ku peperhiwaka mavele.
^ Ku nga ndhawu leyi ku peperhiwaka mavele.
^ Ku nga ndhawu leyi ku peperhiwaka mavele.
^ Hi Xiheveru, “leswi nga swinene ematihlweni ya yona.”
^ Ku nga ndhawu leyi ku peperhiwaka mavele.
^ Hi Xiheveru, “tixikele.” Xikele a yi tika 11,4 wa tigiramu. Vona Xiengetelo B14.
