Samuwele Wa Vumbirhi 3:1-39
3 Nyimpi exikarhi ka yindlu ya Sawulo ni yindlu ya Davhida yi ya emahlweni; Davhida a a ya a va ni matimba,+ kasi yindlu ya Sawulo a yi ya yi hela matimba.+
2 Hi nkarhi wolowo, Davhida u velekeriwe vana va majaha eHebroni.+ Mativula yakwe a ku ri Aminoni,+ u velekiwe hi Ahinowama+ wa le Yizriyele.
3 Wa vumbirhi a ku ri Khiliyabu, n’wana wa Abigayele+ nsati wa mufi Nabali wa le Karimeli; wa vunharhu a ku ri Absalomu,+ n’wana wa Maka, n’wana wa Talimayi+ hosi ya le Gexura.
4 Wa vumune a ku ri Adoniya+ n’wana wa Hagiti, wa vuntlhanu a ku ri Xefatiya n’wana wa Abitali.
5 Wa vutsevu a ku ri Itereyamu, u velekiwe hi Egla nsati wa Davhida. Lava hi vona vana va Davhida lava velekiweke eHebroni.
6 Loko nyimpi yi ri karhi yi ya emahlweni exikarhi ka yindlu ya Sawulo ni yindlu ya Davhida, Abinere+ yena a a ya a tiyisa xikhundlha xakwe endlwini ya Sawulo.
7 Sawulo a a ri ni nsati lontsongo loyi vito ra yena a ku ri Risipa,+ n’wana wa Aya. Hi ku famba ka nkarhi Ixi-boxeti+ a ku eka Abinere: “Hikwalaho ka yini u etlele ni nsati lontsongo wa tatana?”+
8 Marito ya Ixi-boxeti ma endle leswaku Abinere a hlundzuka ngopfu kutani a ku: “Xana ndzi nhloko ya mbyana leyi humaka eYuda? Ku ta fikela sweswi ndza ha tshembekile eka yindlu ya Sawulo tata wa wena hambi ku ri eka vamakwavo ni vanghana vakwe, na wena a ndzi ku xavisanga eka Davhida; kambe namuntlha wa ndzi konanisa hikwalaho ka wansati.
9 Onge Xikwembu xi nga xupula Abinere swinene, loko ndzo ka ndzi nga endli eka Davhida hilaha Yehovha a n’wi hlambanyeleke hakona:+
10 leswaku ndzi susa mfumo endlwini ya Sawulo ni leswaku ndzi tiyisa xiluvelo xa Davhida eIsrayele ni le Yuda, ku suka eDani ku ya eBera-xeba.”+
11 Ixi-boxeti u lo namba a timiyelela a nga n’wi hlamuli Abinere hikuva a a n’wi chava.+
12 Xikan’wekan’we Abinere a rhuma vanhu eka Davhida a ku: “Xana tiko i ra mani?” A tlhela a ku: “Endla ntwanano na mina, kutani ndzi ta endla hinkwaswo leswi ndzi nga swi kotaka* ku kokela Vaisrayele hinkwavo eka wena.”+
13 Hiloko yena a ku: “Swi kahle! Ndzi ta endla ntwanano na wena. Nchumu wun’we lowu ndzi wu kombelaka eka wena hileswaku u nga ringeti ku vona xikandza xa mina handle ka loko wo ta na Mikala+ n’wana wa Sawulo, loko u ta.”
14 Kutani Davhida a rhuma vanhu eka Ixi-boxeti+ n’wana wa Sawulo, a ku: “Ndzi nyike nsati wa mina Mikala, loyi ndzi n’wi lovoleke hi minsuvu ya 100 ya Vafilista.”+
15 Hiloko Ixi-boxeti a rhumela vanhu va ya n’wi teka eka nuna wakwe Palatiyele,+ n’wana wa Layixi.
16 Kambe nuna wakwe a n’wi landzelela a ri karhi a rila ku ya fika eBahurimi.+ Kutani Abinere a ku: “Tlhela!” Hiloko a tlhela.
17 Hi hala tlhelo Abinere a a rhumele rito eka vakulukumba va Israyele, a ku: “I khale mi lava leswaku Davhida a va hosi ya n’wina.
18 Sweswi endlani tano, hikuva Yehovha u byele Davhida a ku: ‘Ndzi ta ponisa vanhu va mina, ku nga Vaisrayele eka Vafilista ni le ka valala va vona hinkwavo, hi ku tirhisa Davhida+ nandza wa mina.’”
19 Hiloko Abinere a vulavula ni vanhu va ka Benjamini.+ Abinere u tlhele a ya vulavula na Davhida va ri vambirhi eHebroni a n’wi byela hinkwaswo leswi tiko ra Israyele ni yindlu hinkwayo ya Benjamini va twananeke ha swona.
20 Loko Abinere a fika eka Davhida eHebroni a ri ni vavanuna va 20, Davhida a endlela Abinere nkhuvo ni vavanuna lava a ri na vona.
21 Abinere a ku eka Davhida: “Ndzi pfumelele ndzi famba ndzi ya hlengeletela hosi yanga tiko hinkwaro ra Israyele leswaku ri ta endla ntwanano na wena, kutani u ta va hosi ya rona hinkwaro.” Hiloko Davhida a tshika Abinere a tifambela hi ku rhula.
22 Hi nkarhi wolowo, malandza ya Davhida na Yowabu va vuya hi le ku hlaseleni, va vuye ni swilo swo tala leswi va swi phangeke. Kambe Abinere se a a sukile eka Davhida eHebroni, hikuva u n’wi tshike a tifambela hi ku rhula.
23 Loko Yowabu+ ni masocha hinkwawo lawa a ma ri na yena va fika, Yowabu u byeriwe leswi: “Abinere+ n’wana wa Nere+ u tile eka hosi, kambe yi n’wi tshike a tifambela hi ku rhula.”
24 Kutani Yowabu a ya eka hosi, a fika a ku: “U endle yini? Abinere a a tile eka wena. Hikwalaho ka yini u n’wi tshike a famba hi ku rhula?
25 U n’wi tiva kahle Abinere n’wana wa Nere. A a tele ku ta ku endla xiphukuphuku ni ku tiva lomu u fambafambelaka kona ni ku kumisisa hinkwaswo leswi u swi endlaka.”
26 Hiloko Yowabu a suka eka Davhida, kutani a rhuma vanhu leswaku va landza Abinere, va n’wi tlherise exihlobyeni xa Sira; kambe Davhida a a nga tivi nchumu hi mhaka leyi.
27 Loko Abinere a fika eHebroni,+ Yowabu u n’wi vitanele etlhelo endzeni ka gede ya muti onge hiloko a lava ku vulavula na yena exihundleni. Hambiswiritano, kwalaho a n’wi tlhava ekhwirini a fa;+ a a fela leswi a dlayeke* makwavo Asahele.+
28 Loko Davhida a twa mhaka leyi endzhakunyana ka nkarhi, a ku: “Mina ni mfumo wa mina a hi na nandzu wa ngati+ ya Abinere n’wana wa Nere emahlweni ka Yehovha hilaha ku nga heriki.
29 Nandzu lowu a wu ve ehenhla ka Yowabu+ ni le ndyangwini wa tata wakwe hinkwawo. Endyangwini wa Yowabu ku nga pfumaleki wanuna loyi a humaka thyaka eka xirho xakwe xa rimbewu+ kumbe la nga ni nhlokonho+ kumbe la lamaleke kumbe loyi a dlayiwaka hi banga kumbe la pfumalaka swakudya!”+
30 Yowabu ni makwavo Abixayi+ va dlaye Abinere+ hi ndlela yoleyo hikwalaho ka leswi a dlayeke Asahele makwavo wa vona enyimpini+ eGibiyoni.
31 Kutani Davhida a byela Yowabu ni vanhu hinkwavo lava a va ri na yena a ku: “Handzulani swiambalo swa n’wina mi ambala leswo khwaxa, mi rilela Abinere.” Hosi Davhida hi byakwe a a famba endzhaku ka rihlaka* ra mufi.
32 Va lahla Abinere eHebroni; kutani hosi yi tlakusa rito yi rila esirheni ra Abinere, vanhu hinkwavo na vona va ku xibuku, va rila.
33 Hosi yi yimbelelela Abinere risimu ra xirilo, yi ku:
“Xana Abinere u fanele a fa ku fana ni xiphukuphuku?
34 Mavoko ya wena a ma nga bohiwanga,Ni milenge ya wena a yi nga bohiwanga hi tinsimbhi.*
U we ku fana ni munhu loyi a hlanganeke ni swigevenga.”*+
Hiloko vanhu hinkwavo va tlhela va n’wi rila.
35 Endzhaku ka sweswo vanhu hinkwavo va ta va ta nyika Davhida xinkwa leswaku va n’wi chavelela ri nga si pela, kambe Davhida a hlambanya, a ku: “Xikwembu a xi ndzi xupule swinene loko ndzo dya xinkwa kumbe nchumu wihi ni wihi dyambu ri nga si pela!”+
36 Vanhu hinkwavo va swi xiya, swi va tsakisa tanihi leswi xin’wana ni xin’wana lexi endliwaka hi hosi a xi tsakisa vanhu hinkwavo.
37 Vanhu hinkwavo ni tiko hinkwaro ra Israyele va swi vonile hi siku rero leswaku hosi a hi yona leyi nga endla leswaku Abinere n’wana wa Nere a dlayiwa.+
38 Hosi yi vutisa malandza ya yona yi ku: “Xana a mi swi tivi leswaku ku fe hosana leyi nga nhenha eIsrayele namuntlha?+
39 Ndzi hele matimba namuntlha hambileswi ndzi hlawuriweke ku va hosi,+ vavanuna lava, vana va Seruya+ va ni nsele swinene.+ Yehovha a a xupule mudyohi hi ku landza swiendlo swakwe.”+
Tinhlamuselo ta le hansi
^ Hi Xiheveru, “voko ra mina ri na wena.”
^ Hi Xiheveru, “a a fela ngati ya.”
^ Ku nga nchumu lowu khale a wu tirhisiwa ku rhwala mufi.
^ Hi Xiheveru, “koporo.”
^ Hi Xiheveru, “vana lava endlaka leswo biha.”
