Samuwele Wa Vumbirhi 5:1-25
5 Hi ku famba ka nkarhi tinyimba hinkwato ta Israyele ti ya eka Davhida eHebroni,+ ti fika ti ku: “Vona! Hina na wena hi vana va munhu.*+
2 Khale loko Sawulo a ha ri hosi ya hina, hi wena loyi a wu rhangela Israyele etinyimpini ta rona.+ Kutani Yehovha u ku byele a ku: ‘U ta risa vanhu va mina ku nga Vaisrayele naswona u ta va murhangeri wa Israyele.’”+
3 Vakulukumba hinkwavo va Israyele va ya eka hosi eHebroni, hiloko Hosi Davhida a endla ntwanano na vona+ eHebroni emahlweni ka Yehovha. Kutani va chela Davhida mafurha leswaku a va hosi ya Israyele.+
4 Davhida a a ri ni malembe ya 30 loko a sungula ku fuma naswona u fume malembe ya 40.+
5 EHebroni u fume Yuda malembe ya nkombo ni tin’hweti ta tsevu, kasi eYerusalema+ u fume malembe ya 33 etikweni hinkwaro ra Israyele ni ra Yuda.
6 Kutani hosi ni vanhu va yona va ya eYerusalema va ya lwa ni Vayebusi+ lava a va tshama kwalaho. Vayebusi va tlhontlha Davhida va ku: “A wu nge pfuki u nghenile laha! Hambi mabofu ni lava lamaleke va ta ku hlongola.” A va tibyela va ku, ‘Davhida a nge pfuki a nghenile laha.’+
7 Hambiswiritano, Davhida a teka khokholo ra Siyoni, leri sweswi ri nga Muti wa Davhida.+
8 Hi siku rero Davhida a ku: “Lava nga ta hlasela Vayebusi va fanele va nghena hi mugerho wa mati leswaku va hlasela ‘mabofu ni lava lamaleke,’ lava vengaka Davhida!” Hi yona mhaka ku ri ni xivuriso lexi nge: “Mabofu ni lava lamaleke a va nge pfuki va nghenile endlwini leyi.”
9 Kutani Davhida a sungula ku tshama ekhokholweni, hiloko ri thyiwa* Muti wa Davhida; Davhida a sungula ku aka a rhendzela hinkwako ku sukela eXitsungeni*+ ni ku ya endzeni.+
10 Hikwalaho Davhida a ya a va ni matimba+ swinene naswona Yehovha Xikwembu xa mavuthu a a ri na yena.+
11 Hosi Hiramu+ wa le Tiri a rhuma vanhu eka Davhida a rhumela ni timhandzi ta mukedari+ ni vanhu lava tivaka ntirho wo vatla ni lava tivaka ku tirha hi maribye leswaku va ta aka makhumbi, kutani va sungula ku akela Davhida yindlu.*+
12 Davhida a a swi tiva leswaku Yehovha u tiyise vuhosi byakwe eIsrayele+ naswona u tlakuse mfumo+ wakwe hikwalaho ka vanhu va Yena, ku nga Vaisrayele.+
13 Davhida a teka vavasati lavatsongo lava engetelekeke+ swin’we ni vasati van’wana eYerusalema endzhaku ka loko a suke eHebroni, kutani a va ni vana van’wana va majaha ni va vanhwanyana.+
14 Lawa i mavito ya lava a velekeriweke vona eYerusalema: Xamuwa, Xobabu, Nathani,+ Solomoni,+
15 Ibehari, Elixuwa, Nefege, Yafiya,
16 Elixama, Eliyada na Elifalete.
17 Loko Vafilista va twa leswaku Davhida u hlawuriwe ku va hosi eIsrayele,+ Vafilista hinkwavo va ta va ta n’wi hlota.+ Loko Davhida a swi twa, a rhelela a ya ekhokholweni.+
18 Vafilista va fika va rhendzeleka eNkoveni wa Refayimi.+
19 Davhida a vutisa Yehovha+ a ku: “Xana ndzi nga tlhandluka ndzi ya lwa ni Vafilista? Xana u ta ndzi pfuna leswaku ndzi va hlula?” Yehovha a hlamula Davhida a ku: “Tlhandluka, hikuva kunene ndzi ta ku pfuna leswaku u va hlula.”+
20 Kutani Davhida a fika eBali-perazimi, a va dlaya kwalaho. Hiloko a ku: “Yehovha u hangalase valala+ va mina emahlweni ka mina, ku fana ni khumbi leri mbundzumuxiweke hi mati.” Hi yona mhaka a thyeke ndhawu yoleyo vito ra Bali-perazimi.*+
21 Vafilista va siya swikwembu swa vona kwalaho kutani Davhida ni vanhu vakwe va swi teka va famba na swona.
22 Hi ku famba ka nkarhi Vafilista va tlhela va vuya va hangalaka ni Nkova wa Refayimi.+
23 Davhida a vutisa Yehovha, kambe Yena a ku: “U nga tlhandluki u va kongoma. Tana hi le ndzhaku ka vona u fika u lwa na vona emahlweni ka swihlahla swa bakha.
24 Loko u twa swigingi ehenhla ka swihlahla swa bakha, u nga ha yimayimi hikuva Yehovha u ta va se a ku rhangerile ku ya hlasela vuthu ra Vafilista.”
25 Hikwalaho Davhida a endla hilaha Yehovha a n’wi leriseke hakona, a dlaya Vafilista+ ku suka eGeba+ ku ya fika eGezere.+
Tinhlamuselo ta le hansi
^ Kumbe “maxaka ya ngati.”
^ Kumbexana “hiloko a wu thya.”
^ Kumbe “Milo.” Ku nga rito ra Xiheveru leri vulaka “ku tata.”
^ Kumbe “yindlu ya vuhosi.”
^ Leswi vulaka “Loyi A Kotaka Ku Mbundzumuxa.”
