Samuwele Wa Vumbirhi 6:1-23
6 Davhida a tlhela a hlengeleta masocha hinkwawo lama nga tinhenha eIsrayele, vavanuna va 30 000.
2 Kutani Davhida ni vavanuna hinkwavo lava a va ri na yena va ya eBale-yuda va landza Areka ya Xikwembu xa ntiyiso kwalaho,+ leyi vanhu va vitanaka vito ra Yehovha wa mavuthu eka yona,+ loyi a tshamaka ehenhla* ka makerubu.+
3 Hambiswiritano, va rhwala Areka ya Xikwembu xa ntiyiso hi golonyi leyintshwa+ ku suka endlwini ya Abinadaba,+ leyi a yi ri exintshabyanini; naswona Uza na Ahiyo vana va Abinadaba, hi vona lava a va rhangele golonyi yoleyo leyintshwa.
4 Kutani va rhwala Areka ya Xikwembu xa ntiyiso yi suka endlwini ya Abinadaba leyi a yi ri exintshabyanini, Ahiyo a a famba emahlweni ka Areka.
5 Davhida ni yindlu hinkwayo ya Israyele a va ri karhi va cina va tsakile va cinela Yehovha va chaya swichayachayana leswi endliweke hi murhi wa yunipa, tiharipa, switende,+ swingomana,+ swiphambati ni swichayachayana swin’wana.+
6 Kambe loko va fika exivuyeni* xa Nakona, Uza a tshambulutela voko eka Areka ya Xikwembu xa ntiyiso a yi khoma,+ hikuva a ku sale katsongo tihomu ti yi wisa.
7 Kutani Yehovha a hlundzukela Uza, Xikwembu xa ntiyiso xi n’wi dlaya+ kwalaho hikwalaho ka xiendlo xakwe xa ku nga xiximi,+ a fela kwalaho ekusuhi ni Areka ya Xikwembu xa ntiyiso.
8 Kambe Davhida a hlundzuka hileswi Yehovha a dlayeke Uza; kutani ndhawu yoleyo yi thyiwa Perezi-uza* ku ta fikela namuntlha.
9 Davhida a chava Yehovha+ ngopfu esikwini rero kutani a ku: “Xana Areka ya Yehovha yi ta tisa ku yini eka mina?”+
10 Davhida a a nga swi lavi ku tisa Areka ya Yehovha eMutini wa Davhida+ laha a a tshama kona. Kambe, u lerise leswaku yi yisiwa endlwini ya Obede-edomu+ wa Mugati.
11 Areka ya Yehovha yi tshame endlwini ya Obede-edomu wa Mugati tin’hweti tinharhu, kutani Yehovha a ya emahlweni a katekisa Obede-edomu ni ndyangu wakwe hinkwawo.+
12 Hosi Davhida a kuma xiviko lexi nge: “Yehovha u katekise ndyangu wa Obede-edomu ni hinkwaswo leswi nga swa yena hikwalaho ka Areka ya Xikwembu xa ntiyiso.” Hiloko Davhida a landza Areka ya Xikwembu xa ntiyiso endlwini ya Obede-edomu, a yi yisa eMutini wa Davhida hi ku tsaka.+
13 Kuteloko lava rhwaleke+ Areka ya Yehovha va fambe magoza ya tsevu, a endla gandzelo hi nkuzi ni xifuwo xo nona.
14 Davhida a a ri karhi a chanchula swinene emahlweni ka Yehovha hi matimba ya yena hinkwawo; nkarhi wolowo hinkwawo Davhida a a ambale* efodi leyi endliweke hi lapi.+
15 Davhida ni yindlu hinkwayo ya Israyele a va ri eku tiseni ka Areka+ ya Yehovha va ri karhi va huwelela hi ku tsaka+ va chaya ni tinanga.+
16 Kambe loko Areka ya Yehovha yi fika eMutini wa Davhida, Mikala+ n’wana wa Sawulo, a hlometela hi fasitere kutani a vona Hosi Davhida a ri karhi a chanchula emahlweni ka Yehovha hikwalaho ko tsaka; a sungula ku n’wi langutela ehansi embilwini yakwe.+
17 Kutani va nghenisa Areka ya Yehovha va yi veka endhawini ya yona etendeni leri Davhida a yi endleleke rona.+ Hiloko Davhida a endlela Yehovha+ magandzelo yo hisiwa+ ni magandzelo yo kombela ku rhula.+
18 Loko Davhida a heta ku endla magandzelo yo hisiwa ni magandzelo yo kombela ku rhula, a katekisa vanhu hi vito ra Yehovha wa mavuthu.
19 A tlhela a nyika vanhu hinkwavo, ntshungu hinkwawo wa Israyele, wanuna un’wana ni un’wana ni wansati un’wana ni un’wana, xinkwa lexi endliweke ku fana ni xingwavila, khekhe ra mihandzu ya micindzu ni khekhe ra madiriva lama omisiweke, endzhaku ka sweswo vanhu hinkwavo va muka.
20 Loko Davhida a muka leswaku na yena a ta katekisa ndyangu wa yena, Mikala+ n’wana wa Sawulo a n’wi hlanganisa. A ku: “Vona ndlela leyi hosi ya Israyele yi tivangamiseke ha yona namuntlha hi ku tifunungula emahlweni ka mahlonga ya xisati ya malandza ya yona, ku fana ni loko xiphukuphuku xi tifunungula exikarhi ka vanhu!”+
21 Hiloko Davhida a ku eka Mikala: “A ndzi tlangela emahlweni ka Yehovha, loyi a ndzi hlawuleke ematshan’weni ya tata wa wena ni vandyangu wakwe hinkwavo, a tlhela a ndzi veka ku va murhangeri wa vanhu va Yehovha, ku nga Israyele.+ Hikwalaho, a ndzi nge tshiki ku tlangela emahlweni ka Yehovha,
22 ndza ha ta endla swo tlula sweswo, ndzi tiyisa ehansi hambi ku ri ematihlweni ya mina n’wini. Kambe ndzi ta tivangamisa hi mahlonga ya xisati lawa u ma vuleke.”
23 Hikwalaho Mikala+ n’wana wa Sawulo u fe a nga ri na n’wana.
Tinhlamuselo ta le hansi
^ Kumbexana “exikarhi.”
^ Ndhawu leyi ku peperhiwaka mavele.
^ Leswi vulaka “Ku Hlundzukeriwa Ka Uza.”
^ Hi Xiheveru, “tikhame hi.”
