Samuwele Wa Vumbirhi 9:1-13
-
Davhida a komba Mefiboxete rirhandzu (1-13)
9 Kutani Davhida a ku: “Xana ka ha ri ni loyi a saleke eka ndyangu wa Sawulo leswaku ndzi ta n’wi komba musa hikwalaho ka Yonathani?”+
2 A ku ri na nandza wa ndyangu wa Sawulo loyi vito rakwe a ku ri Ziba.+ Hiloko va n’wi yisa eka Davhida, kutani hosi yi ku eka yena: “Xana hi wena Ziba?” Yena a ku: “Hi mina nandza wa wena.”
3 Hosi yi ya emahlweni yi ku: “Xana ka ha ri ni loyi a saleke eka ndyangu wa Sawulo leswaku ndzi ta n’wi komba musa wa Xikwembu?” Ziba a hlamula hosi a ku: “Ku sele n’wana un’we wa Yonathani; u lamale milenge.”+
4 Hosi yi n’wi vutisa yi ku: “U le kwihi?” Ziba a byela hosi a ku: “U le ndlwini ya Makiri+ n’wana wa Amiyele eLo-debara.”
5 Hi ku hatlisa Hosi Davhida a rhumela vanhu leswaku va n’wi landza endlwini ya Makiri n’wana wa Amiyele eLo-debara.
6 Loko Mefiboxete n’wana wa Yonathani, n’wana wa Sawulo a fika eka Davhida, a khinsama, xikandza xakwe xi khumba ehansi. Kutani Davhida a ku: “Mefiboxete,” yena a ku: “Hi loyi nandza wa wena.”
7 Davhida a ku eka yena: “U nga chavi, hikuva kunene ndzi ta ku komba musa+ hikwalaho ka Yonathani tata wa wena, ndzi ta ku tlherisela masimu hinkwawo ya kokwa wa wena Sawulo, kasi wena u ta hamba u dya* etafuleni ra mina.”+
8 Hiloko a khinsama a ku: “Xana mina nandza wa wena ndzo va yini, lerova u nga kala u komba mbyana+ leyi feke yo kota mina musa?”
9 Kutani hosi yi vitana Ziba nandza wa Sawulo yi ku eka yena: “Hinkwaswo leswi a swi ri swa Sawulo ni ndyangu wakwe hinkwawo ndzi swi nyika ntukulu wa n’wini wa wena.+
10 U ta n’wi rimela masimu, wena ni vana va wena ni malandza ya wena, naswona u ta hlengeleta ntshovelo wa wona leswaku wu va swakudya eka lava nga va ntukulu wa n’wini wa wena. Kambe Mefiboxete ntukulu wa n’wini wa wena u ta hamba a dya etafuleni ra mina.”+
Ziba a a ri ni vana va 15 ni malandza ya 20.+
11 Kutani Ziba a byela hosi a ku: “Nandza wa wena u ta endla hinkwaswo leswi hosi yi lerisaka nandza wa yona ku swi endla.” Kambe Mefiboxete a a dya etafuleni ra Davhida* ku fana ni un’wana wa vana va hosi.
12 Mefiboxete a a ri ni n’wana wa mufana loyi vito rakwe a ku ri Mika;+ hinkwavo lava a va tshama endlwini ya Ziba va ve malandza ya Mefiboxete.
13 Mefiboxete a a tshama eYerusalema, hikuva a a hamba a dya etafuleni ra hosi;+ naswona a a lamale milenge.+
