Tihosi Ta Vumbirhi 11:1-21
11 Loko Ataliya+ mana wa Ahaziya a vona leswaku n’wana wakwe u file,+ a dlaya vana hinkwavo va le vuhosini.+
2 Hambiswiritano, Yehoxeba n’wana wa Hosi Yehorama, makwavo wa xisati wa Ahaziya, a teka Yehowaxi+ n’wana wa Ahaziya a n’wi yiva exikarhi ka vana va hosi lava a va ta dlayiwa a n’wi tumbeta ekamareni ra le ndzeni swin’we ni wansati loyi a a n’wi hlayisa. Va swi kotile ku n’wi tumbetela Ataliya kutani a nga dlayiwanga.
3 U tshame na yena ku ringana malembe ya tsevu a n’wi tumbete endlwini ya Yehovha, hi nkarhi lowu Ataliya a a fuma tiko.
4 Hi lembe ra vunkombo, Yoyada a rhumela rito eka tindhuna ta vanhu va madzana ta varindzi va Vakariya ni ta lava rindzaka yindlu ya hosi+ leswaku ti ta eka yena endlwini ya Yehovha. A endla ntwanano na tona a tlhela a ti hlambanyisa endlwini ya Yehovha kutani a ti komba n’wana wa hosi.+
5 A ti lerisa a ku: “Mi ta endla leswi: Ntlawa wun’we eka mitlawa yinharhu ya n’wina wu ta tirha hi Savata naswona wu ta rindza yindlu ya hosi hi vukheta,+
6 ntlawa lowun’wana wu ta va eGedeni ya Masungulo naswona ntlawa lowun’wana wu ta va egedeni leyi nga endzhaku ka yindlu ya hosi. Mi ta cincana ku rindza yindlu leyi.
7 Mitlawa ya n’wina yimbirhi leyi faneleke yi nga tirhi hi Savata, yi fanele yi rindza yindlu ya Yehovha hi vukheta leswaku yi sirhelela hosi.
8 Mi fanele mi yima ematlhelo hinkwawo ya hosi, un’wana ni un’wana a khome tlhari rakwe. Loyi a nga ta hundza varindzi u ta dlayiwa. Fambani ni hosi hinkwako laha yi yaka kona.”
9 Tindhuna ta vanhu va madzana+ ti endla leswi muprista Yoyada a ti leriseke swona. Ndhuna ha yin’we yi teka varindzi va yona lava a va tirha hi Savata ni lava a va nga tirhi hi Savata, kutani va ya eka muprista Yoyada.+
10 Hiloko muprista a nyika tindhuna ta vanhu va madzana matlhari ni switlhangu swa xirhendzevutana, leswi a swi ri swa Hosi Davhida, leswi a swi ri endlwini ya Yehovha.
11 Kutani varindzi va yindlu ya hosi+ va yima laha va averiweke kona, un’wana ni un’wana a a khome matlhari yakwe, ku sukela etlhelweni ra xinene ra yindlu ku ya etlhelweni ra ximatsi ra yindlu, ekusuhi ni altari+ ni le kusuhi ni yindlu, va sirhelela hosi matlhelo hinkwawo.
12 Hiloko Yoyada a humesa n’wana wa hosi+ a n’wi tlhandleka harhi ya vuhosi ni buku ya Nawu,+ kutani va n’wi endla hosi, va n’wi chela mafurha. Va sungula ku phokotela mavoko va ku: “Hosi a yi hanye hilaha ku nga heriki!”+
13 Loko Ataliya a twa swigingi swa vanhu lava tsutsumaka, na yena a nghena hi ku hatlisa eka vanhu lava a va ri endlwini ya Yehovha.+
14 Hiloko a vona hosi yi yime ekusuhi ni phuphu hi ku ya hi ntolovelo wa kona.+ Tindhuna ni vachayi va timhalamhala+ a va yime ekusuhi ni hosi naswona vanhu hinkwavo va tiko a va tsakile va ri karhi va chaya timhalamhala. Kutani Ataliya a handzula swiambalo swakwe, a huwelela a ku: “Vaxengi! Vaxengi!”
15 Kambe muprista Yoyada a lerisa tindhuna ta vanhu va madzana+ leti hlawuriweke ku rhangela enyimpini, a ku eka tona: “N’wi humeseni, loko ku ri ni loyi a yimaka na yena, n’wi dlayeni hi banga!” Hikuva muprista a a te: “Mi nga n’wi dlayeli endlwini ya Yehovha.”
16 Hiloko va n’wi khoma, kutani loko va fika laha tihanci ti nghenaka endlwini ya hosi+ hi kona, va n’wi dlayela kwalaho.
17 Kutani Yoyada a endla ntwanano na Yehovha ni hosi ni vanhu,+ leswaku va ta tshama va ri vanhu va Yehovha naswona a tlhela a endla ntwanano exikarhi ka hosi ni vanhu.+
18 Endzhaku ka sweswo, vanhu hinkwavo va tiko va ya endlwini* ya Bali va fika va mbundzumuxa tialtari takwe,+ va faya swifaniso swakwe hinkwaswo,+ va tlhela va dlaya Matani muprista wa Bali+ emahlweni ka tialtari.
Kutani muprista a hlawula vanhu leswaku va langutela yindlu ya Yehovha.+
19 Ku tlula kwalaho, a teka tindhuna ta vanhu va madzana,+ varindzi va Vakariya, varindzi va yindlu ya hosi+ ni vanhu hinkwavo va tiko leswaku va famba ni hosi loko yi huma endlwini ya Yehovha yi ya endlwini ya vuhosi, va fambe hi ndlela leyi hundzaka hi le gedeni ya varindzi va yindlu ya hosi. Kutani yi fika yi tshama exitulwini xa tihosi.+
20 Vanhu hinkwavo etikweni va tsaka hikuva se a ku ri ni ku rhula emutini hikwalaho ka leswi Ataliya a dlayiweke hi banga endlwini ya hosi.
21 Yehowaxi+ a a ri ni malembe ya nkombo loko a va hosi.+
Tinhlamuselo ta le hansi
^ Kumbe “etempeleni.”
