Tihosi Ta Vumbirhi 15:1-38
15 Azariya*+ n’wana wa Hosi Amaziya+ wa le Yuda a va hosi+ hi lembe ra vu-27 ra ku fuma ka Hosi Yerobuwamu* wa Israyele.
2 A a ri ni malembe ya 16 loko a va hosi naswona u fume malembe ya 52 eYerusalema. Vito ra mana wakwe a ku ri Yekoliya wa le Yerusalema.
3 U ye emahlweni a endla leswinene emahlweni ka Yehovha, hilaha Amaziya tata wakwe a endleke hakona.+
4 Hambiswiritano, tindhawu leti tlakukeke a ti susiwanga+ naswona vanhu a va ha endla magandzelo va tlhela va endla leswaku nun’hwelo wa magandzelo wolawo wu tlhandluka etindhawini leti tlakukeke.+
5 Yehovha a xupula hosi kutani yi va ni nhlokonho+ kukondza yi fa; naswona a yi tshama endlwini yin’wana+ kasi n’wana wa yona Yohatama+ a a tshama endlwini ya vuhosi, a avanyisa vanhu va tiko.+
6 Loko ku ri matimu ya Azariya+ hinkwawo, hinkwaswo leswi a swi endleke, xana a swi tsariwanga ebukwini ya matimu ya tihosi ta Yuda?
7 Hiloko Azariya a fa a lahliwa ni vakokwa wakwe+ eMutini wa Davhida; kutani Yohatama n’wana wakwe a va hosi.
8 Hi lembe ra vu-38 ra ku fuma ka Hosi Azariya+ wa Yuda, Zakariya+ n’wana wa Yerobuwamu a va hosi ya Israyele eSamariya naswona u fume ku ringana tin’hweti ta tsevu.
9 U dyohele Yehovha hilaha vakokwa wakwe va endleke hakona. A nga swi tshikanga swidyoho swa Yerobuwamu n’wana wa Nebati, leswi a dyohiseke Israyele ha swona.+
10 Hiloko Xalumu n’wana wa Yabexe a n’wi bohela xikungu, a n’wi dlaya+ eIbileyamu.+ Endzhaku ko n’wi dlaya a va hosi.
11 Loko ku ri matimu ya Zakariya hinkwawo, ma tsariwile ebukwini ya matimu ya tihosi ta Israyele.
12 Ku endleke leswi Yehovha a swi byeleke Yehu a ku: “Vana va wena va ta fuma eIsrayele+ ku ya fika eka xitukulwana xa vumune+ hikwalaho ka wena.” Kutani swi ve tano.
13 Xalumu n’wana wa Yabexe, a va hosi hi lembe ra vu-39 ra ku fuma ka Hosi Uziya+ wa Yuda, u fume n’hweti yin’we eSamariya.
14 Hiloko Menahema n’wana wa Gadi a ta a huma hi le Tirisa+ a fika eSamariya a hlasela Xalumu+ n’wana wa Yabexe eSamariya. Endzhaku ko n’wi dlaya, a va hosi.
15 Loko ku ri matimu ya Xalumu hinkwawo ni xikungu lexi a xi boheke, swi tsariwile ebukwini ya matimu ya tihosi ta Israyele.
16 A ku ri hi wona nkarhi wolowo loko Menahema a suka eTirisa a ta hlasela vanhu va le Tifisa ni hinkwaswo leswi a swi ri eka wona, hikuva va ale ku n’wi pfulela tigede. U hlasele muti a tlhela a handzula makhwiri ya vavasati lava tikeke.
17 Hi lembe ra vu-39 ra ku fuma ka Hosi Azariya wa Yuda, Menahema n’wana wa Gadi u ve hosi ya Israyele naswona u fume malembe ya khume eSamariya.
18 U ye emahlweni a endla swo biha emahlweni ka Yehovha. A nga swi tshikanga swidyoho hinkwaswo swa Yerobuwamu n’wana wa Nebati, leswi a dyohiseke Israyele ha swona,+ vutomi byakwe hinkwabyo.
19 Ku te Hosi Pulu+ wa Asiriya etikweni kutani Menahema a n’wi nyika titalenta* ta silivhere ta 1 000, leswaku a ta n’wi seketela leswaku mfumo wa yena wu ta tiya.+
20 Menahema u kume silivhere leyi hi ku hakerisa vavanuna va ndhuma lava fuweke xibalo.+ Wanuna ha un’we u n’wi hakerise swiphemu swa silivhere* swa 50 leswaku a ta kota ku hakela hosi ya Asiriya. Hiloko hosi ya Asiriya yi tlhela, a ya ha tshamanga etikweni.
21 Loko ku ri matimu ya Menahema+ hinkwawo, hinkwaswo leswi a swi endleke, xana a swi tsariwanga ebukwini ya matimu ya tihosi ta Israyele?
22 Hiloko Menahema a fa a lahliwa ni vakokwa wakwe; kutani n’wana wakwe Pekahiya a va hosi.
23 Hi lembe ra vu-50 ra ku fuma ka Hosi Azariya wa Yuda, Pekahiya n’wana wa Menahema a va hosi ya Israyele eSamariya, u fume malembe mambirhi.
24 U ye emahlweni a endla swo biha emahlweni ka Yehovha. U endle swidyoho leswi Yerobuwamu n’wana wa Nebati a dyohiseke Israyele ha swona.+
25 Hiloko ndhuna yakwe Peka+ n’wana wa Remaliya, a n’wi bohela xikungu kutani a n’wi dlaya eSamariya exihondzweni lexi a xi ri endlwini ya hosi, a ri na Arigobi na Ariye. A a ri ni vavanuna va 50 va le Giliyadi; endzhaku ka loko a n’wi dlayile a va hosi.
26 Loko ku ri matimu ya Pekahiya hinkwawo, hinkwaswo leswi a swi endleke, swi tsariwile ebukwini ya matimu ya tihosi ta Israyele.
27 Hi lembe ra vu-52 ra ku fuma ka Hosi Azariya wa Yuda, Peka+ n’wana wa Remaliya a va hosi ya Israyele eSamariya naswona u fume malembe ya 20.
28 A ya emahlweni a endla swo biha emahlweni ka Yehovha. A nga swi tshikanga swidyoho leswi Yerobuwamu n’wana wa Nebati a dyohiseke Israyele ha swona.+
29 Hi nkarhi wa ku fuma ka Hosi Peka wa Israyele, Hosi Tiglata-pilizere+ wa Asiriya u fike a hlasela a teka miti ya Iyona, Avele-bete-maka,+ Yanowa, Kedexi,+ Hasora, Giliyadi+ na Galeliya, tiko hinkwaro ra vana va Neftali,+ kutani a teka lava a va tshama kwalaho a ya va endla mahlonga eAsiriya.+
30 Kutani Hoxeya+ n’wana wa Elaha a bohela Peka n’wana wa Remaliya xikungu, a n’wi dlaya; a va hosi hi lembe ra vu-20 ra ku fuma ka Yohatama+ n’wana wa Uziya.
31 Loko ku ri matimu ya Peka hinkwawo, hinkwaswo leswi a swi endleke, swi tsariwile ebukwini ya matimu ya tihosi ta Israyele.
32 Hi lembe ra vumbirhi ra ku fuma ka Peka n’wana wa Remaliya hosi ya Israyele, Yohatama+ n’wana wa Hosi Uziya+ wa Yuda a va hosi.
33 A a ri ni malembe ya 25 loko a va hosi naswona u fume malembe ya 16 eYerusalema. Vito ra mana wakwe a ku ri Yeruxa n’wana wa Sadoki.+
34 U ye emahlweni a endla leswinene emahlweni ka Yehovha hilaha tata wakwe Uziya a endleke hakona.+
35 Hambiswiritano, tindhawu leti tlakukeke a ti susiwanga naswona vanhu a va ha endla magandzelo va tlhela va endla leswaku nun’hwelo wa magandzelo wolawo wu tlhandluka etindhawini leti tlakukeke.+ Hi yena loyi a akeke gede ya le henhla ya yindlu ya Yehovha.+
36 Loko ku ri matimu ya Yohatama hinkwawo, leswi a swi endleke, xana a swi tsariwanga ebukwini ya matimu ya tihosi ta Yuda?
37 Emikarhini yoleyo Yehovha a sungula ku rhumela Resini hosi ya Siriya na Peka+ n’wana wa Remaliya leswaku va ya lwa na Yuda.+
38 Kutani Yohatama a fa a lahliwa ni vakokwa wakwe eMutini wa Davhida kokwa wakwe. Hiloko Akazi n’wana wakwe a va hosi.
Tinhlamuselo ta le hansi
^ Leswi vulaka “Yehovha U Pfunile.” U vitaniwa Uziya eka 2Th 15:13; 2Tk 26:1-23; Esa 6:1 na Zk 14:5.
^ Ku nga Yerobuwamu wa Vumbirhi.
^ Talenta a yi tika 34,2 wa tikhilogiramu. Vona Xiengetelo B14.
^ Hi Xiheveru, “tixikele.” Xikele a yi tika 11,4 wa tigiramu. Vona Xiengetelo B14.
