Tihosi Ta Vumbirhi 8:1-29
8 Kutani Elixa a byela wansati loyi a pfuxeke n’wana wakwe a ku:+ “Famba, wena ni ndyangu wa wena mi ya luvela etikweni rin’wana ni rin’wana leri mi ri tsakelaka, hikuva Yehovha u ta tisa ndlala etikweni leri+ ku ringana malembe ya nkombo.”
2 Hiloko wansati yoloye a famba, a endla leswi nandza wa Xikwembu xa ntiyiso a swi vuleke. Yena ni ndyangu wakwe va fike va tshama etikweni ra Vafilista+ malembe ya nkombo.
3 Loko malembe ya nkombo ma hundzile, wansati loyi a vuya hi le tikweni ra Vafilista, kutani a ya eka hosi a ya kombela leswaku yi n’wi tlherisela yindlu yakwe ni nsimu yakwe.
4 Hosi a yi ri karhi yi vulavula na Gehazi mutirheli wa nandza wa Xikwembu xa ntiyiso yi ku: “Ndzi kombela u ndzi byela swilo hinkwaswo swo hlamarisa leswi Elixa a swi endleke.”+
5 Loko a ri karhi a rungulela hosi ndlela leyi Elixa a n’wi pfuxeke ha yona munhu loyi a a file,+ wansati loyi n’wana wakwe a pfuxiweke a fika eka hosi a ta kombela leswaku yi n’wi tlherisela yindlu yakwe ni nsimu yakwe.+ Xikan’wekan’we Gehazi a ku: “Hosi yanga, hi yena wansati loyi naswona hi yena n’wana wakwe loyi Elixa a n’wi pfuxeke eku feni.”
6 Loko hosi yi twa sweswo yi vutisa wansati yoloye kutani a yi rungulela mhaka ya kona. Kutani hosi yi byela mutirhi wa le hubyeni yi ku: “N’wi tlherisele swilo swakwe hinkwaswo ni ntshovelo hinkwawo, ku sukela hi siku leri a fambeke ha rona etikweni ku fikela namuntlha.”
7 Elixa u ye eDamaska+ hi nkarhi lowu Beni-hadadi+ hosi ya Siriya a a vabya. Kutani hosi yi kuma xiviko lexi nge: “Ku fike nandza wa Xikwembu xa ntiyiso.”+
8 Kutani hosi yi byela Hazayele yi ku:+ “Teka nyiko u famba na yona eka nandza wa Xikwembu xa ntiyiso.+ U ya n’wi kombela leswaku a ndzi vutisela Yehovha a ku, ‘Xana ndzi ta hola eka vuvabyi lebyi?’”
9 Hazayele a famba a ya hlangana na yena a khome nyiko, swilo hinkwaswo leswinene swa le Damaska, swi rhwariwe hi tikamela ta 40. Kutani a fika a yima emahlweni ka yena a ku: “N’wana wa wena Beni-hadadi hosi ya Siriya u ndzi rhume eka wena, u ri, ‘Xana ndzi ta hola eka vuvabyi lebyi?’”
10 Elixa a ku eka yena: “Famba u ya n’wi byela, u ku, ‘U ta hola,’ kambe Yehovha u ndzi kombe leswaku entiyisweni u ta fa.”+
11 Kutani a n’wi honolela swinene lerova a kala a khomiwa hi tingana. Hiloko nandza wa Xikwembu xa ntiyiso a rila.
12 Hazayele a ku: “Xana hosi yanga yi rilela yini?” Elixa a ku: “Ndzi tiva swilo swo biha leswi u nga ta swi endla eka Vaisrayele.+ U ta hisa miti ya vona leyi biyeriweke, u ta dlaya tinhenha ta vona hi banga, u ta tsemelela vana va vona naswona u ta handzula makhwiri ya vasati va vona lava tikeke.”+
13 Hazayele a ku: “Xana nandza wa wena loyi a ngo va mbyana yinene a nga swi endlisa ku yini sweswo?” Kambe Elixa a ku: “Yehovha u ndzi kombile leswaku u ta va hosi ya Siriya.”+
14 Hiloko a suka eka Elixa a ya eka hosi yakwe, leyi n’wi vutiseke yi ku: “Xana Elixa u ku byele yini?” A hlamula a ku: “U ndzi byele leswaku u ta hola.”+
15 Kambe hi siku leri landzelaka, Hazayele a teka nkumba a wu peta ematini, kutani a funengeta hosi xikandza a yi pfala leswaku yi nga ha hefemuli kukondza yi fa.+ Kutani Hazayele a va hosi.+
16 Hi lembe ra vuntlhanu ra ku fuma ka Yehorama+ n’wana wa Akabu hosi ya Israyele, hi nkarhi lowu Yehoxafati a a ri hosi ya Yuda, Yehorama+ n’wana wa Hosi Yehoxafati wa Yuda u ve hosi.
17 A a ri ni malembe ya 32 loko a va hosi naswona u fume malembe ya nhungu eYerusalema.
18 U tekelele mahanyelo ya tihosi ta Israyele,+ hilaha ndyangu wa Akabu wu endleke hakona+ hikuva a a teke n’wana wa Akabu a va nsati wakwe;+ kutani a ya emahlweni a dyohela Yehovha.+
19 Kambe Yehovha a a nga swi lavi ku lovisa Yuda hikwalaho ka Davhida nandza wakwe,+ hikuva a a n’wi tshembise ku n’wi nyika rivoni+ yena ni vana vakwe hilaha ku nga heriki.
20 Hi nkarhi wa ku fuma kakwe, tiko ra Edomu ri pfukele tiko ra Yuda+ kutani ri tivekela hosi.+
21 Hiloko Yehorama a tsemakanya a ya eZayiri ni makalichi yakwe hinkwawo kutani a pfuka nivusiku a hlula Vaedomu lava a va n’wi rhendzerile ni tindhuna ta makalichi; hiloko masocha ma balekela ematendeni ya wona.
22 Kambe tiko ra Edomu a ri tshikanga ku pfukela tiko ra Yuda ku fikela namuntlha. Tiko ra Libna+ na rona ri sungule ku ri pfukela hi nkarhi wolowo.
23 Matimu ya Yehorama hinkwawo, hinkwaswo leswi a swi endleke, xana a swi tsariwanga ebukwini ya matimu ya tihosi ta Yuda?
24 Kutani Yehorama a fa a lahliwa ni vakokwa wakwe eMutini wa Davhida.+ Hiloko Ahaziya+ n’wana wakwe a va hosi.
25 Hi lembe ra vu-12 ra ku fuma ka Yehorama n’wana wa Akabu hosi ya Israyele, Ahaziya n’wana wa Hosi Yehorama wa Yuda a va hosi.+
26 Ahaziya a a ri ni malembe ya 22 loko a va hosi naswona u fume lembe rin’we eYerusalema. Vito ra mana wakwe a ku ri Ataliya+ ntukulu wa Hosi Omri+ wa Israyele.
27 U fambe endleleni ya ndyangu wa Akabu+ naswona u ye emahlweni a endla swo biha emahlweni ka Yehovha, ku fana ni ndyangu wa Akabu, hikuva a a ri xaka ra ndyangu wa Akabu.+
28 Kutani a famba na Yehorama n’wana wa Akabu va ya lwa na Hosi Hazayele wa Siriya eRhamoti-giliyadi,+ kambe Vasiriya va vavisa Yehorama.+
29 Kutani Hosi Yehorama a tlhelela eYizriyele+ leswaku a ya hlakarhela eka timbanga leti Vasiriya va n’wi vangeleke tona eRhama loko a lwa na Hosi Hazayele wa Siriya.+ Ahaziya n’wana wa Yehorama hosi ya Yuda u ye eYizriyele a ya pfuxela Yehorama n’wana wa Akabu, hikuva a a vavisekile.*
Tinhlamuselo ta le hansi
^ Kumbe “vabya.”
