Tikronika Ta Vumbirhi 19:1-11
19 Hiloko Hosi Yehoxafati wa Yuda a tlhelela endlwini yakwe eYerusalema a hlayisekile.+
2 Yehu+ n’wana wa Hanane+ loyi a vonaka swivono a huma a ya hlangana na Hosi Yehoxafati a fika a ku: “Xana u fanele u pfuna lavo homboloka+ naswona xana u fanele u rhandza lava vengaka Yehovha?+ Yehovha u ku hlundzukerile hikwalaho ka sweswo.
3 Nilokoswiritano, Xikwembu xi vone swilo leswinene eka wena,+ hikuva u suse timhandzi ta Axera* etikweni u tlhela u lavisisa Xikwembu xa ntiyiso hi ku tiyimisela.”*+
4 Yehoxafati a ya emahlweni a tshama eYerusalema kutani a huma eBera-xeba a ya endhawini ya tintshava ya Efrayimi+ a ya khutaza vanhu leswaku va tlhela va gandzela Yehovha Xikwembu xa vakokwa wa vona.+
5 U tlhele a veka vaavanyisi etikweni hinkwaro ra Yuda, emitini hinkwayo leyi biyeriweke.+
6 A byela vaavanyisi a ku: “Tivoneleni loko mi avanyisa, hikuva a mi avanyiseli munhu kambe mi avanyisela Yehovha naswona u na n’wina loko mi avanyisa.+
7 Chavani Yehovha.+ Vanani ni vuxiyaxiya eka leswi mi swi endlaka hikuva Yehovha Xikwembu xa hina u rhandza vululami,+ a nga na xihlawuhlawu+ naswona a nga xaviwi.”+
8 Yehoxafati a endla tano ni le Yerusalema, a veka Valevhi ni vaprista van’wana ni tindhuna ta mindyangu ya Israyele leswaku ti va vaavanyisi va Yehovha ni leswaku ti avanyisa milandzu ya vaaki va le Yerusalema.+
9 Kutani a va lerisa a ku: “Mi fanele mi endla leswi landzelaka leswaku mi chava Yehovha, endlani tano hi ku tshembeka ni hi mbilu hinkwayo:
10 Loko vamakwenu lava tshamaka emitini ya vona va tisa nandzu lowu katsaka ku dlaya+ kumbe va vutisa mayelana ni nawu, xileriso, swiletelo, kumbe xiboho xo karhi, mi fanele mi va lemukisa leswaku va nga dyoheli Yehovha; loko mi nga endli tano, u ta mi hlundzukela n’wina ni vamakwenu. Mi fanele mi endla tano leswaku mi nga vi na nandzu.
11 Hi loyi Amariya muprista lonkulu loyi a nga ta mi pfuna eka mhaka yin’wana ni yin’wana ya Yehovha.+ Zebadiya n’wana wa Iximayele i murhangeri wa ndyangu wa Yuda eka mhaka yin’wana ni yin’wana leyi khumbanaka na hosi. Valevhi va ta va tindhuna ta n’wina. Vanani ni xivindzi mi endla leswinene, Yehovha u ta seketela lava endlaka leswinene.”+
